«Служу я Радзіме сваёй!» У нядзелю ў Беларусі адзначаецца Дзень танкістаў

«Клянуся годна выконваць воінскі абавязак…» – з гэтых слоў пачынаецца армейская служба маладога чалавека, грамадзяніна Рэспублікі Беларусь. Гаворачы тэкст Ваеннай прысягі, кожны ваеннаслужачы клянецца свята выконваць Канстытуцыю Рэспублікі Беларусь, патрабаванні воінскіх статутаў, а таксама загады камандзіраў і начальнікаў.

У трэцяй гвардзейскай школе падрыхтоўкі спецыялістаў танкавых і артылерыйскіх падраздзяленняў 72-га гвардзейскага аб’яднанага вучэбнага цэнтра падрыхтоўкі прапаршчыкаў і малодшых спецыялістаў многія ваеннаслужачыя тэрміновай ваеннай службы сваім асабістым прыкладам паказваюць, што тэкст Ваеннай прысягі – гэта не пустыя словы. Спасцігаючы азы ваеннага рамяства, выконваючы ўсе задачы з высокай якасцю, ваеннаслужачыя годна працягваюць традыцыі нашых продкаў непарушна стаяць на варце міру і стабільнасці ў нашай дзяржаве.

Сярод тых, хто з’яўляецца прыкладам узорнага выканання воінскага абавязку, варта выдзеліць гвардыі радавога Рамана Мысла (на здымку). Ураджэнец Ляхавіцкага раёна служыць ва Узброеных Сілах Рэспублікі Беларусь усяго пяць месяцаў, але ўжо зарэкамендаваў сябе як старанны і добрасумленны ваеннаслужачы. Праходзячы навучанне па спецыяльнасці «камандзір танка Т- 72Б», Раман імкнецца спасцігнуць усе тонкасці сваёй армейскай прафесіі, не прапусціць галоўнае ў ваенным рамястве:

– Быць танкістам для мяне вельмі адказна і ганарова, бо гэты род войскаў асацыюецца з такімі словамі, як «трываласць», «спрытнасць» і «вынослівасць». Развіццё гэтых якасцяў дазволіць мне ў далейшым вырасці ў маіх вачах, стаць больш самастойным, навучыцца прымаць правільнае рашэнне ў любой жыццёвай сітуацыі. Кожны раз, калі я саджуся ў танк, лаўлю сябе на думцы, што мне ёсць чым ганарыцца.

Армейская служба дае мне многае: сяброў, магчымасць у рэальнасці кіраваць баявой машынай, якой раней кіраваў толькі віртуальна. Тым, каму давядзецца яшчэ прайсці армейскі шлях, я хацеў бы параіць: трэба ісці служыць і нічога не баяцца, праверка сябе ў армейскіх умовах не будзе лішняй. А насычаныя і разнапланавыя мерапрыемствы армейскай службы пакінуць у вашай памяці цёплыя і светлыя ўспаміны.

Міхаіл КУМЯКОЎ, гвардыі маёр.