Субота кліча на лыжню. У Ляхавічах прайшлі спаборніцтвы па лыжах і біятлоне, прымеркаваныя да Сусветнага дня снегу
«Надзя, наперад! Саша, паднацісні!» – падтрымліваюць балельшчыкі сваіх прадстаўнікоў каманд. Мінулая субота для ляхавічан выдалася эмацыянальнай і спартыўнай. На стадыёне «Колас» у райцэнтры прайшлі спаборніцтвы па лыжах і біятлоне, прымеркаваныя да Сусветнага дня снегу.
Выйшлі на лыжню ў гэты дзень прадстаўнікі розных арганізацый і прадпрыемстваў горада і раёна: каманды ўпраўлення па працы, занятасці і сацыяльнай абароне райвыканкама, цэнтра забеспячэння дзейнасці бюджэтных арганізацый раёна, устаноў адукацыі, ПМС, ПМК-13, ДРБУ-200, РАУС, упраўлення па сельскай гаспадарцы і харчаванні, кансервавага і малочнага заводаў, школы мастацтваў і БРСМ, цэнтральнай раённай бальніцы і цэнтра гігіены і эпідэміялогіі, РАНС, ЖКГ, сельвыканкамаў і ААТ «Жарабковічы», гаргаза.
Да ўдзельнікаў спаборніцтваў звярнуўся старшыня райвыканкама Мікалай Мароз.
– Бясспрэчна, мы паспелі ўжо засумаваць па зімовых спаборніцтвах. Сёлета пашанцавала, снег ёсць, і мы ўдзячны надвор’ю. 2021 год аб’яўлены Годам адзінства. Летась з-за пандэміі мы адасобіліся адзін ад аднаго, але што як не спартыўныя мерапрыемствы аб’ядноўвае людзей, – адзначыў старшыня раёна.
Старт дадзены, і лыжнікі адпраўляюцца на свае дыстанцыі. Аматары лыжнага спорту спаборнічалі ў наступных відах: лыжная эстафета, лыжныя гонкі, біятлон, эстафета сямейных каманд.
Пакуль на лыжні кіпяць страсці, не менш «горача» на трыбунах, дзе іх падтрымліваюць каманды балельшчыкаў. Да гэтага пытання яны падышлі адказна і крэатыўна: намалявалі плакаты, падрыхтавалі крычалкі, эмблемы.
– Лясгас заўсёды з вялікім задавальненнем прымае ўдзел у любых спаборніцтвах. А па зімовых відах спорту мы сапраўды засумавалі. Сёння ўсё склалася: сонечнае надвор’е, выдатны настрой, годныя сапернікі, – дзеліцца ўражаннямі намеснік дырэктара лясгаса Наталля Адаменка.
– Мінулы год нас снегам не парадаваў, але ў гэты мы атрымалі асалоду ад прыгажос-ці горада ў снежным убранні. Самы лепшы адпачынак – актыўны. Пракаціцца на свежым паветры на лыжах, што можа быць лепш? – перакананы галоўны спецыяліст упраўлення па працы, занятасці і сацыяльнай абароне райвыканкама Мікалай Бурбуць.
Самая прыемная частка любых спаборніцтваў – узнагароджанне пераможцаў.
У лыжнай гонцы сярод дзяўчат трэцяе месца заняла Надзея Гатоўчыц, другое – Анастасія Матарас, на першую прыступку п’едэстала паднялася Аліна Пятліцкая. У гэтым жа відзе сярод хлопцаў на трэцім месцы Вячаслаў Кірыковіч, на другім – Іван Карповіч, на першым – Міхаіл Гатоўчыц.
У біятлоне месцы размеркаваліся наступным чынам: трэцяе – у каманды лясгаса, другое заняла каманда ААТ «Жарабковічы», першай стала каманда РАНС.
У эстафеце першай таксама стала каманда РАНС, на другім –каманда малочнага завода, на трэцім – ААТ «Жарабковічы».
У гэтых сем’ях дакладна ведаюць, як жыць здарова і актыўна. І паказваюць гэта на ўласным прыкладзе. У эстафеце сямейных каманд трэцяй стала сям’я Івашка, на другім месцы спартыўная сям’я Кендыш, першай стала сям’я Гатоўчыц. Пакуль у спаборніцтвах прымалі ўдзел галава сям’і Віктар, сын Міхаіл і дачка Надзя, за іх на трыбунах актыўна балела мама Марына.
Не засталіся без прызоў і каманды балельшчыкаў. Самымі запальнымі і актыўнымі былі прызнаны групы падтрымкі Ляхавіцкага малочнага завода і цэнтра забеспячэння дзейнасці бюджэтных арганізацый Ляхавіцкага раёна.
Ірына КУЗЬМІЧ.
Фота Сяргея ВАРАНОВІЧА.
Больш фота ТУТ, ці у нашай групе ў АДНАКЛАСНІКАХ.