2 чэрвеня УП «Ляхавіцкае ПМС» адзначыць прафесійнае свята

31/05/2013 172 redakcyja 0 Comment

Інжынерна-тэхнічныя работнікі ПМС на чале з дырэктарам Сяргеем Юшкевічам.

Валодае вельмі вузкай інфармацыяй той, хто асацыіруе меліярацыю адзіна толькі з асушэннем забалочаных ці проста пераўвільготненых месцаў. Меліярацыя — гэта карэннае паляпшэнне зямель у выніку ажыццяўлення шырокага комплексу мер. Асушэннем, у тым ліку і, бадай, у найбольшай ступені. Але і арашэнне, і барацьба з кустоўем-купінамі, і вапнаванне-гіпсаванне, і супрацьэразійныя мерапрыемствы, і ўмацаванне сыпучых пяскоў таксама знаходзіцца ў сферы клопатаў меліяратараў, у тым ліку УП «Ляхавіцкае ПМС».

Эканоміка правіць баль, уяўляецца печкай, ад якой і вакол якой і адбываюцца ўсе падзеі. Сёлета ПМС праводзіць маштабныя работы па падрыхтоўцы нашага райцэнтра да ролі сталіцы абласнога фестывалю-кірмашу працаўнікоў вёскі «Дажынкі-2013». У якім выглядзе паўстане ў верасні горад, у немалой ступені залежыць і ад Ляхавіцкага ПМС. Напрыклад, адказны і інжынерна зусім няпросты праект па пракладцы гарадской ліўневай каналізацыі даручана ажыццявіць іменна меліяратарам. Не проста, што называецца, «па-зямляцку», а зыходзячы з іх рэальных вытворчых і кадравых магчымасцяў, выканальніцкай адказнасці, што ў суме і выліваецца ў патрэбную якасць зробленага.
Зроблена, дарэчы, ужо нямала і, як падзяліўся думкамі дырэктар прадпрыемства меліярацыйных сістэм Сяргей Юшкевіч, паказальным і асабліва напружаным выдаўся ў гэтым сэнсе красавік: «Анамальны снег сакавіка фактычна выключыў нас з работы. Якая выніковасць можа быць у такіх умовах надвор’я? Дагнаць не па сваёй віне ўпушчанае пастараліся ўжо ў красавіку. Часта працавалі звышурочна, да 9-10 гадзін вечара, каб завяршыць аб’ект максімальна хутка, звесці тым самым да мінімуму нязручнасці для гараджан. Нашы людзі з разуменнем успрынялі такі графік работы. Ніякіх адмоў, за што вялікі ім дзякуй».

Майстры Андрэй Крук і Андрэй Шумік

Добраўпарадкаванне гарадской зоны адпачынку на рацэ Ведзьма таксама з’яўляецца зонай адказнасці меліяратараў. Ювелірная работа экскаватара ўжо на працягу дзясяткаў прыбярэжных метраў. Работы працягнуцца, і на фінішы пляжнае наваколле будзе не пазнаць: з’явяцца пешаходныя дарожкі, пераходныя масткі, лесвічны спуск да вады. Мяркуецца ўладкаванне прычала, спартыўных пляцовак і многае іншае. Будзем чакаць.
Рэканструяваць меліярацыйную сістэму «Ведзьма», задача якой у асушэнні нізкіх ваколіц горада, — работа для ПМС, што называецца, па ўмаўчанні. Чыстка каналаў ужо ажыццяўляецца, у далейшым запраектавана добраўпарадкаванне тэрыторый, сяўба траў, іншае. «Работа штатная. Хіба крыніцы, якіх тут нямала, уносяць некаторыя карэктывы: бьюць проста з-пад гусеніц экскаватара», — спыняецца на падрабязнасцях кіраўнік прадпрыемства.
Магутнасць і майстэрства калектыву ПМС «на ўра» ідуць і ў сельскагаспадарчых прадпрыемствах раёна. У цэйтноце сёлетняй яравой кампаніі дапамога меліяратараў прыйшлася некаторым з гаспадарак асабліва дарэчы. Да гэтай пары трактары прадпрыемства знаходзяцца ў карыстанні СВК «Тальмінавічы», «Ліпнянка», ДП «Нача». «Як выкарыстоўваюцца? У прынцыпе, гатовы выконваць любыя сельгасработы. З кіраўніцтвам большасці сельгасарганізацый у нас поўнае паразуменне, хоць, канешне, і не без рабочых спрэчак. Напрыклад, начаўскі дырэктар Мікалай Тарлюк у любых пытаннях ідзе нам насустрач. Не адмаўляе ў месцах для стаянкі машын, садзейнічае іх рамонту ў выпадку такой неабходнасці. Адпаведна і мы — адказваем той жа «манетай», — гаворыць Сяргей Вікенцьевіч.
У працяг — пра «знешнія» стасункі ляхавіцкіх меліяратараў.
«Па чэрвеню» — дырэктарскі выраз — ПМС «закрывае» меліярацыйную сістэму «Альманы» ў Столінскім раёне. Праведзеная рэканструкцыя — уладкаванне новых і ачыстка існуючых каналаў, карчаванне кустоўя і іншыя культуртэхнічныя мерапрыемствы — настолькі задаволіла столінцаў, што кіраўніцтва тамашняга сельгаскааператыва хадайнічае аб далейшым супрацоўніцтве. Прапаноўваецца праект удвая больш аб’ёмны, чым «Альманы».

Вадзіцелі прадпрыемства: дарога — іх стыхія.

Ёсць у ляхавічан і дзелавая прапанова ад калег са Столінскага ПМС, з Ганцавіцкага раёна, працягваецца супрацоўніцтва з Баранавіцкім раёнам.
Нестандартным падаецца імкненне нашых меліяратараў атрымаць сертыфікат на права выконваць укладку тратуарнай пліткі і бардзюрнага каменя. Праведзена неабходная падрыхтоўка, і ёсць спадзяванне, што дазвол «прыйдзе» ў бліжэйшы час. «Каб паспець яшчэ папрацаваць на добраўпарадкаванні горада. У камандзіроўках добра, а дома лепш», — тлумачыць пазіцыю дырэктар.
Лічбы, канешне, не зусім фармат для святочнага матэрыялу. Але дзеля дакладнага разумення маштабнасці адзначым: бізнес-план 2013 года вызначае для ПМС падрад у грашовым выражэнні на 13,1 мільярда рублёў. «Але мяркуем выйсці мільярдаў на 18. На гэту лічбу і настройваем людзей. Каб добра жыць», — гаворыць Сяргей Юшкевіч.
Банальны штамп пра сплаў вопыту і маладосці, тым не менш, характарызуе і Ляхавіцкае ПМС. Побач са спрактыкаванымі за дзесяцігоддзі службы прафесіі і прадпрыемству ветэранамі працуюць маладыя спецыялісты. Скарбніца вопыту і майстэрства Ганаровыя меліяратары Белмеліявадгасу Міхаіл Дзянішчык, Іван Краўчук, Аляксандр Гутырчык. Экскаватаршчыкі-ювеліры, за плячамі кожнага цэлая працоўная эпоха, мабыць, сотні тысяч кубаметраў выцягнутага грунту. За працоўныя заслугі да сёлетняга свята «ганаровы» спіс Ляхавіцкага ПМС дапоўніць Анатолій Цімашкевіч. Бульдазерыст Уладзімір Халецкі — адзін з лепшых у сваёй справе сярод меліяратараў вобласці. Прапанову перасесці на іншую марку машыны адхіляў неаднойчы. Угаварылі: параўнальна нядаўна «здрадзіў» свайму далёка не першай маладосці ДТ-75 з прынцыпова іншай машынай айчыннай вытворчасці. Выканаўчай дысцыплінай, якасцю работы вызначаюцца трактарысты Вікенцій Дыдышка, Сяргей Клімовіч і многія іншыя з ляхавіцкіх меліяратараў.

Майстар Аляксей Кулікоў, руславыя рабочыя Віктар Кожан і Аляксей Петух, экскаватаршчык Сяргей Сайко.

«Прыходзіць у калектыў ініцыятыўная моладзь са сваімі ідэямі. Усе — «камп’ютарызаваныя», і, у многім дзякуючы ім, у чэрвені мы завершым распрацоўку і запусцім свой сайт. Гэта не модная тэндэнцыя — неабходнасць. Многія здзелкі, конкурсы, аўкцыёны праводзяцца зараз у «сетцы». Граматным спецыялістам паказаў сябе майстар Вячаслаў Кірыковіч, на такую ж пасаду вярнуўся пасля службы ў войску і Андрэй Шумік. За імі будучыня. Але прыходзяць не толькі ІТР — трактарысты, бульдазерысты, экскаватаршчыкі. Можна нават гаварыць пра канкурэнцыю ў асяродку названых прафесій,» — не без задавальнення адзначае дырэктар.
Здаецца, гаворачы пра заўтрашні дзень ПМС, правільна было б пачаць з Сяргея Юшкевіча. За няпоўны дзясятак пасляўніверсітэцкіх гадоў ён прайшоў на прадпрыемстве ўсе прыступкі службовай лесвіцы. Майстар, прараб, галоўны інжынер, цяпер — дырэктар.
Жыць добра, па версіі Ляхавіцкага ПМС, гэта, у тым ліку, і добра адпачываць. Актыўна, разнастайна, пазнавальна, з карысцю для сябе і на агульную карысць. Спартспаборніцтвы, калектыўныя экскурсіі і экспрэс-туры — трэнд, як модна казаць, ляхавіцкіх меліяратараў. Гэтымі днямі дадатковым для іх святочным бонусам стане паездка ў Нясвіж з наведваннем, у прыватнасці, знакамітага палацавага комплексу і адной з мясцовых аграсядзіб.
Далей — работа. У тым ліку і па стварэнні музея меліярацыі Ляхавіцкага раёна. Пачатак пакладзены. У далейшым жа фарміраванні яго экспазіцый можаце прыняць удзел і вы, паважаныя жыхары раёна. Калі падзеліцеся фотаздымкамі, старымі прыладамі працы, абсталяваннем. Усім, што складае гісторыю меліярацыі раёна.
Іван КАВАЛЕНКА.
Фота Сяргея ВАРАНОВІЧА.