Пра тэхнічнае здароўе машыны. На прамой лініі «ЛВ» працаваў начальнік дыягнастычнай станцыі № 241 УП «Белтэхагляд»

Каб не дапусціць удзелу ў дарожным руху няспраўных транспартных сродкаў, кожны ўладальнік павінен забяспечыць праходжанне тэхнічнага агляду аўтамабіля. Як запісацца для праходжання тэхагляду, каб не стаяць у чарзе, і дзе аплаціць паслугу, якія дзейнічаюць патрабаванні да тэхнічнага стану транспартнага сродку – на гэтыя і многія іншыя пытанні землякоў падчас прамой лініі «ЛВ» адказаў начальнік дыягнастычнай станцыі № 241 УП «Белтэхагляд» Юрый Цітко.

– Юрый Сцяпанавіч, па якім графіку працуе дыягнастычная станцыя?
Таццяна, Ляхавічы.

– Дыягнастычная станцыя № 241 УП «Белтэхагляд» знаходзіцца ў Ляхавічах на вуліцы Працоўнай, 3.
Мы працуем з 8 да 17 гадзін. З 12 да 12.45 гадзін – абед. У суботу станцыя працуе з 8 да 15.45 гадзін. Выхадныя дні – нядзеля, панядзелак.
Нагадаю, што кошт тэхагляду для бензінавых аўтамабіляў складае
30 рублёў 30 капеек, для дызельных – 31 рубель. 8 рублёў 70 капеек (0,3 базавай велічыні) каштуе выдача дазволу на ўдзел у дарожным руху.

– Як вадзіцеля з невялікім стажам мяне цікавіць, на што перш за ўсё неабходна звярнуць увагу пры падрыхтоўцы транспартнага сродку да тэхагляду? А яшчэ пракансультуйце, які існуе алгарытм праходжання тэхагляду.
Аляксей, Ляхавічы.

– Перад дыягностыкай аўтамабіль абавязкова трэба прывесці ў парадак. Па-першае, добра памыць. Па-другое, праверыць цэласнасць кузава (агледзець машыну на адсутнасць скразной карозіі), стан святлогукавых прыбораў (фары, паваротнікі, гукавы сігнал), работу дворнікаў і шклоабмывальніка, спраўнасць тармазной сістэмы і ручнога тормаза. Варта ўпэўніцца, што не працякаюць масла і іншыя тэхнічныя вадкасці, у адваротным выпадку давядзецца прыехаць на станцыю паўторна пасля ліквідацыі працёку.
І яшчэ. Даліце вадкасць у бачок шклоабмывальніка – без вадкасці праверыць сістэму ачысткі шкла не атрымаецца.
Немалаважны момант – наяўнасць вогнетушыцеля, знака аварыйнага прыпынку і аўтамабільнай медыцынскай аптэчкі, укамплектаванай згодна з зацверджаным пералікам.
Калі прыехалі на станцыю, неабходна пакласці на пярэдняе сядзенне аптэчку, вогнетушыцель і знак. Далей падаём у акенца неабходныя дакументы. Пасля гэтых маніпуляцый інжынеры право-
дзяць праверку тэхнічнага стану транспартнага сродку.

– Купіў аўтамабіль, у якога пройдзены тэхагляд. Ці можна пры змене гаспадара аўто перанесці адзнаку аб тэхаглядзе?
Аляксей, Ляхавіцкі раён.

– Так. Паслуга гэта платная і складае 10 рублёў 20 капеек.

– У мяне такое пытанне. Калі з-за знешняга выгляду ці нейкіх тэхнічных праблем не прайшоў тэхагляд, ці дае дыягнастычная карта дазвол на ўдзел у дарожным руху?
Іван Андрэевіч, Ляхавіцкі раён.

– Адназначна не. Дыягнастычная карта не дае права на ўдзел у дарожным руху, нават калі аўтамабіль спраўны. Згодна з парадкам правядзення тэхагляду, калі ўстаноўлена, што транспартны сродак не адпавядае патрабаванням тэхнічных нарматыўных прававых актаў Рэспублікі Беларусь, ён павінен паўторна прайсці дзяржтэхагляд не пазней за 20 дзён пасля даты правя-
дзення гэтай працэдуры. Гэты тэрмін даецца на ўхіленне выяўленых падчас правядзення кантрольна-дыягнастычных работ недахопаў і прадстаўленне транспартнага сродку на паўторную праверку. У гэтым выпадку дыягнастычная карта спрашчае працэдуру паўторнага тэхагляду.
Калі 20 дзён мінулі, то працэдура ажыццяўляецца ў агульным парадку.

– Нагадайце, калі ласка, якія дакументы патрабуюцца для прахо-
джання тэхагляду?
Уладзімір, Ляхавічы.

– Неабходны пасведчанне вадзіцеля на кіраванне транспартным сродкам адпаведнай катэгорыі, тэхпашпарт аўтамабіля, страхавы поліс абавязковага страхавання грамадзянскай адказнасці транспартных сродкаў і квітанцыя з аплатай паслуг дыягнастычнай станцыі.
Дарэчы, з нядаўняга часу для зручнасці нашых кліентаў на станцыі ўстаноўлены тэрмінал бескантактавай аплаты. І зараз усе разлікі можна ажыццявіць на месцы банкаўскай карткай.
Калі ў аўтамабілі ўстаноўлена газавае абсталяванне, дадаткова трэба мець акт аб аглядзе газавага балона.
Раней неабходна было перад праходжаннем тэхагляду аплаціць дарожны збор. Цяпер гэта выплата адвязана ад тэхнічнага агляду.

– На лабавым шкле маёй машыны невялікая трэшчынка. Можа яна паўплываць на атрыманне дазволу на ўдзел у дарожным руху?

– Завочна нічога не адкажу. Усё вызначаецца візуальна на месцы. Але згодна з парадкам правядзення і праверкі тэхнічнага стану транспартных сродкаў, не дапускаецца наяўнасць на лабавым шкле з боку вадзіцеля расколін або іншых пашкоджанняў, якія знаходзяцца ў зоне дзеяння шклоачышчальніка.

– Сябар падказаў, што для праходжання тэхагляду можна папярэдне запісацца праз інтэрнэт. Ці праўда гэта?
Валерый, Ляхавічы.

– Так. Зараз дзеля эканоміі часу для праходжання тэхагляду можна запісацца анлайн на афіцыйным сайце «Белтэхагляду» па адрасе gto.by. На сайце неабходна выбраць патрэбную вам дыягнастычную станцыю – ДС. Наша змешчана пад нумарам 241. Далей выбіраеце катэгорыю транспартнага сродку і націскаеце кнопку «запісацца». З’явіцца адпаведная табліца, дзе пазначаны свабодныя для запісу дні, і выбіраеце зручны для вас час. Таксама неабходна пазначыць кантактныя даныя ўладальніка машыны, яе дзяржаўны нумар і марку. Звярну ўвагу на такую акалічнасць. Нават калі сабралася чарга жадаючых прайсці тэхагляд, па запісе вы трапіце ў пазначаны час. Варта толькі прыехаць крыху загадзя і папярэдзіць супрацоўніка ў акенцы прыёму і выдачы дакументаў.
Калектыў дыягнастычнай станцыі № 241 стараецца працаваць зладжана, так, каб нашым кліентам было зручна, і яны не марнавалі ўласны час у чарзе.
Дарэчы, аўтаўладальнік можа прайсці дзяржаўны тэхнічны агляд транспартнага сродку незалежна ад яго месца рэгістрацыі на любой дыягнастычнай станцыі Рэспублікі Беларусь.

Пытанне ад «ЛВ»:
– Якія санкцыі прадугледжаны, калі адсутнічае адзнака аб праходжанні тэхагляду?

– Тэхнічны агляд транспартнага сродку – гэта не ўласнае жаданне аўтаўладальніка. Працэдура абавязковая, прадугледжаная заканадаўствам у дачыненні да ўсіх аўтаўладальнікаў, якія ўдзельнічаюць у дарожным руху.
Пратэрмінаваны ці няпройдзены тэхагляд азначае, што транспартны сродак не мае допуску да ўдзелу ў дарожным
руху. На першы раз супрацоўнікі міліцыі могуць абмежавацца папярэджаннем. Памер штрафу складае 1 – 3 базавыя велічыні, пры паўторным парушэнні пакаранне становіцца больш жорсткім.

На прамой лініі працавала
Наталля ПЕРАПЕЧКА.