Ляхавіччына: мір нашаму дому
У трэці дзень ліпеня каторы год запар беларусы адзначаюць свята святаў — Дзень Незалежнасці Рэспублікі Беларусь і чарговую гадавіну вызвалення рэспублікі ад фашысцкіх захопнікаў. Сімвалічна, што дзве гэтыя светлыя даты адзначаюцца адначасова. Раённая ўлада паклапацілася, каб дзень 3 ліпеня на ляхавіцкай зямлі прайшоў урачыста і прыгожа.
Як заўсёды, галоўнае свята беларускай дзяржаўнасці ляхавічане і госці горада сустракалі з добрым настроем, радасцю і натхненнем. Такія розныя і такія салідарныя ў памкненні жыць і працаваць у свабоднай і незалежнай краіне, прыйшлі нашы землякі на свята.
На абноўленай плошчы Перамогі адбыўся мітынг «Салдатам Вялікай Айчынай прысвячаецца…» Усё менш на ўрачыстасцях салдат-вызваліцеляў — ветэранаў Вялікай Айчыннай вайны, дзякуючы якім мы атрымалі шчасце жыць пад мірным небам. Ім, шаноўным ветэранам, — словы віншаванняў, пашана, любоў і кветкі ад удзячных нашчадкаў. Мы не маем права забыць людзей, якія цаной свайго жыцця набліжалі пераможныя дні. Метраном у цішыні адлічваў мінуты маўчання: святлом удзячнай памяці няхай азараюцца імёны загінуўшых на той вайне.
Адкрыў мітынг старшыня раённага Савета дэпутатаў Яўгеній Юрлевіч, які пажадаў землякам святочнага настрою, шчасця, дабра, новых поспехаў у працы. Са словамі віншавання да прысутных звярнуўся і ваенны камісар раёна падпалкоўнік Ігар Гусак.
Роўным строем прайшлі перад помнікам загінуўшым героям і землякамі воіны сённяшніх Узброенных Сіл Рэспублікі Беларусь. У небе над горадам вышэйшы пілатаж дэманстравалі на самалётах СУ-27 і МІГ-29 авіятары 61-й авіяцыйнай базы з Баранавіч.
А потым свята перамясцілася на плошчу Леніна, дзе прайшло тэатралізаванае прадстаўленне «Квітней, родная Белая Русь!». Урачыста, натхнёна вітаў ляхавічан і гасцей горада старшыня раённага выканаўчага камітэта Дзмітрый Бурдук. Ён падзякаваў ветэранам Вялікай Айчыннай вайны за мужнасць, самаахвярнасць, за мір і незалежнасць, а сённяшняму пакаленню маладых — за добрасумленную працу, падтрымку і клопат пра родную Беларусь, пажадаў усім землякам дабрабыту, міру і працвітання.
Хвалюючы момант: узрушаныя падымаліся на сцэну маладыя спецыялісты — сям’я ўрачоў — Юрый і Ганна Фядзько. Кіраўнік раёна ўручыў ім ключы ад службовай кватэры. Добрая традыцыя — клопат улады пра маладыя кадры пастаянна знаходзіць свой працяг. Нагадаем, што год таму на святкавані Дня Незалежнасці ключы ад службовай кватэры атрымала сям’я Марчыкаў, таксама ўрачоў Ляхавіцкай райбальніцы. А яшчэ
Дзмітрый Бурдук уручыў Ганаровую грамату райвыканкама салісту народнай эстраднай студыі «Экспрэс», уладальніку дыплома ІІІ ступені Нацыянальнага конкурсу маладых выканаўцаў беларускай эстраднай песні Андрэю Цямчыку і падзячнае пісьмо райвыканкама клубу гульні, песні і гумару «Вечарніца» Навасёлкаўскага СДК.
Цікавым было і вяртанне ў мінулае разам са старадаўнімі персанажамі Раціборам, Чарнявай, Барыславай, ролі якіх у тэатралізаванай пастаноўцы выканалі культработнікі, і паслухаць легенду пра назву ракі Ведзьма — прыгожую гісторыю кахання. Кахання мужчыны і жанчыны, любві людзей да сваёй зямлі.
А свята працягвалася. Апладысментамі сустракалі гледачы выступленні лепшых самадзейных артыстаў раёна. Якое ж раённае свята без знакамітай «Вечарніцы», якая парадавала відовішчнай канцэртнай праграмай. Не згубіліся сярод дарослых удзельнікаў і юныя самадзейныя артысты паэтычнага тэатра «Равеснік» Тухавіцкага СДК. Сапраўдным падарункам сталі творчыя праграмы дзіцячай харэаграфічнай школы мас-тацтваў «Карусель» з горада Баранавічы і цыганскага калектыву «Жамчугі».
Нельга было не звярнуць увагу на выставу работ мясцовых майстроў з розных куточкаў Ляхавіччыны.
Як і заўсёды на масавых святах, калі разам і дзеці, і дарослыя, папулярнасцю карысталіся разнастайныя атракцыёны. Колькі ўсяго цікавага і захапляльнага прыдумалі супрацоўнікі дзіцяча-юнацкай спартыўнай школы! Кожны жадаючы мог паспытаць сябе ў спрытнасці, вытрымцы, хуткасці, сіле, розуме.
І без прысмакаў не абышлося — працавалі гандлёвыя рады.
Заключным акордам свята стала вячэрняя танцавальная праграма, сярод сюрпрызаў якой — вогненнае шоу.
А потым разам з усёй краінай у адзіным патрыятычным памкненні ляхавічане спявалі Гімн сваёй незалежнай Беларусі. І мірнае неба над горадам расквеціў святочны салют.
Любім цябе, Беларусь!
Галіна КАНЬКО.
Фота Сяргея ВАРАНОВІЧА.
Больш фота з святкавання Дня Незалежнасці глядзіце ў фотагалерэі