Клещи осени не боятся
Кляшчоў не палохаюць ні спякота, ні холад. Як інакш можна растлумачыць, што, напрыклад, сёлета ў верасні на Брэстчыне зарэгістраваны 1021 выпадак укусу кляшчамі. Гэта больш, чым за ўвесь летні перыяд. Згодна інфармацыі Брэсцкага абласнога цэнтра гігіены, эпідэміялогіі і грамадскага здароўя, асабліва ”разбушаваліся” гэтыя насякомыя ў Белавежскай і Ружанскай пушчах, у лясах Камянецкага, Пружанскага, Маларыцкага, Івацэвіцкага раёнаў, на асобных участках Брэсцкага, Жабінкаўскага, Кобрынскага, Баранавіцкага і Ляхавіцкага раёнаў.
Па даных раённага цэнтра гігіены і эпідэміялогіі, у Ляхавіцкім раёне сёлета зарэгістравана 85 выпадкаў укусаў кляшчоў (24 прыйшліся менавіта на восень). У адным выпадку зняты клешч па выніках даследаванняў аказаўся носьбітам хваробы лайм-барэліёзу. Чалавек, да якога ён прысмактаўся, знаходзіцца пад дыспансерным наглядам.
Што датычыцца геаграфіі распаўсюджвання гэтых малапрыемных насякомых у нашым раёне, то найбольш яны аблюбавалі лясныя масівы свяціцкай, альхоўскай, тухавіцкай, востраўскай, куршынавіцкай зон, скверы і паркі горада, дачныя ўчасткі.
Так што асцярожнасць і яшчэ раз асцярожнасць падчас прагулак у лес, парк ці работы на дачных участках. Кляшчы – адны з асноўных захавальнікаў у прыродзе і пераносчыкаў некаторых небяспечных інфекцыйных захворванняў, у прыватнасці, клешчавога энцэфаліту і лайм-барэліёзу. Часцей за ўсё заражэнне чалавека адбываецца пры ўкусе кляшча. Таксама вірус можна падхапіць пры ўжыванні малака хворых коз і (вельмі рэдка) кароў. Захворванне пачынаецца востра, тэмпература цела павышаецца да 38,5 градуса, з’яўляюцца агульная млявасць, галаўны боль у лобнай частцы, галавакружэнне, ваніты, ірвота, лёгкія болі ў вобласці мышцаў шыі і канечнасцяў. Калі не будзе своечасова прызначана лячэнне, хвароба набудзе хранічнае цячэнне і можа прывесці да інваліднасці. На месцы ўкусу можа з’явіцца шчыльны інфільтрат, які потым пакрываецца карычневай скарынкай з ружовай каймой. Ліхаманка доўжыцца 12-14 дзён. Можа ўзнікнуць вострая ныркавая і лёгачная недастатковасць, менінгаэнцэфаліт.
Вось чаму важна выконваць усе прафілактычныя мерапрыемствы, а калі клешч усё ж прысмактаўся, трэба акуратна яго выдаліць самастойна з дапамогай ніткі, завязанай каля хабатка насякомага, ці пінцэтам (паварочваючы галоўку з боку ў бок ці супраць гадзіннікавай стрэлкі). Месца, адкуль даставалі кляшча, абавязкова прыпячыце ёдам ці іншым спіртаўтрымліваючым растворам, рукі вымыйце мылам. Ні ў якім выпадку не цягніце і не сціскайце цела кляшча, каб не раздушыць, бо інфекцыя можа трапіць у ранку.
Але лепш за ўсё звярнуцца за медыцынскай дапамогай.
Таццяна УСЦЮШКОВА,
урач-валеолаг.