Успешным можно назвать выступление команды Ляховичского района на областных соревнованиях «Вертикаль»
Паспяховым можна назваць выступленне каманды Ляхавіцкага раёна на абласных спаборніцтвах “Вертыкаль”. На жаль, у агульнакамандным заліку ляхавіцкія спартсмены-аматары не трапілі ў тройку прызёраў. Затое паказалі клас у індывідуальных іспытах. Лепшым стралком у сваёй намінацыі прызнаны намеснік старшыні райвыканкама Уладзімір Дзяжурны. Не падвяла яго трапнасць і ў дартсе, дзе Уладзімір Уладзіміравіч заняў 2 месца, саступіўшы толькі старшыні Брэсцкага аблвыканкама Канстанціну Сумару.
Чарговы раз прадэманстраваў майстар-клас у гульні ў більярд і намеснік начальніка райсельгасхарчу Міхаіл Новік. Яго вынік – 3 месца ў асабістым заліку. Зусім крыху не хапіла да п’едэстала гонару і лепшай шашыстцы Ляхавіцкага райвыканкама – галоўнаму спецыялісту аддзела арганізацыйна-кадравай работы Іне Косцінай, яна заняла 4 месца.
Праз тыдзень спартыўную эстафету перанялі Ляхавічы. У мінулую суботу на стадыёне “Колас” і ў дзіцяча-юнацкай спартыўнай школе прайшоў другі этап раённай спартакіяды працоўных калектываў. У ім узялі ўдзел 12 каманд. Свае спартыўныя дружыны прадставілі СААТ “Ляхавіцкі малочны завод”, райпо, раённы аддзел па надзвычайных сітуацыях, ДРБУ-200, прадпрыемства меліярацыйных сістэм, ДЛГУ “Ляхавіцкі лясгас”, СВК “Жарабковічы”, КУМВП ЖКГ “Ляхавіцкая ЖКГ”, аддзел адукацыі, спорту і турызму райвыканкама, райбальніца, ПМК-17, раён электрычных сетак. Жанчыны і мужчыны спаборнічалі ў гіравым спорце, дартсе, лёгкай атлетыцы (бег і скачкі), більярдзе, настольным тэнісе, шахматах і перацягванні каната.
Як расказаў дырэктар фізкультурна-спартыўнага клуба “Колас” Генадзій Новік, ва ўсіх відах спаборніцтваў удзельнічалі каманды СВК “Жарабковічы”, лясгаса, РАНС, аддзела адукацыі, спорту і турызму.
Што датычыцца асобных відаў спорту, то, напрыклад, у дартсе першынствавалі работнікі малочнага завода, у лёгкай атлетыцы – выратавальнікі, у падняцці гіры і шахматах — лясгасаўцы, у настольным тэнісе і перацягванні каната – камунгасаўцы, у більярдзе – работнікі СВК “Жарабковічы”.
Названы прозвішчы пераможцаў у асабістым заліку. У настольным тэнісе роўных не было Таццяне Царук (ЖКГ) і Аляксандру Бушэйку (ААФіС), більярдзе – Сяргею Новіку (“Жарабковічы”), лёгкай атлетыцы – Аляксандру Тычкову (лясгас) і Юліі Лешык (ААФіС), дартсе – Вадзіму Маневічу (ПМК-17) і Вользе Анікей (малочны завод), шахматах – Алене Тарлюк (лясгас) і Уладзіміру Цяцёркіну (ён выступаў толькі ў асабістым заліку), гіравым спорце ў розных намінацыях – Уладзіміру Зубіку, Валерыю Плюце, Юрыю Смаршчку (усе РАНС).
Па выніках другога этапа першынство за камандай СВК “Жарабковічы”, на 2-й і 3-й пазіцыях адпаведна лясгас і аддзел адукацыі, спорту і турызму. Наперадзе – спаборніцтвы па футболе і валейболе. Толькі тады будуць падведзены вынікі сёлетняй спартакіяды працоўных калектываў і названы каманды-пераможцы.
Галіна КАНЬКО.
