Для гаспадароў аднаго з падвор’яў вёскі Нача Ляхавіцкага раёна новы год пачаўся з непрыемнасцяў
Для гаспадароў аднаго з падвор’яў вёскі Нача новы год пачаўся з непрыемнасцяў: у час кармлення кот падрапаў гаспадыню, а назаўтра здох. Пра гэта гаспадар паведаміў у дзяржветслужбу. Ветэрынарныя спецыялісты неадкладна выехалі на месца здарэння і ўстанавілі папярэдні дыягназ: шаленства. Пры вірусалагічным даследаванні паталагічнага матэрыялу ў абласной ветлабараторыі дыягназ пацвердзіўся. На гэтым падвор’і аб’яўлены каранцін. Санітарная і ветэрынарная службы раёна праводзяць адпаведныя мерапрыемствы.
Шаленства – вострае інфекцыйнае захворванне нервовай сістэмы, якое выклікаецца спецыфічным вірусам. Яно з’яўляецца смяротным як для жывёл, так і для людзей. Усюды, дзе ёсць ачагі шаленства жывёл, пад пагрозу заражэння трапляюць і людзі. Часцей за ўсё інфекцыю распаўсюджваюць лісіцы, каты, сабакі. Захворванне перадаецца чалавеку праз укусы, драпіны, асліненне скуры і датыкненне да прадметаў ці адзення, якія забруджаны слінай ашалелай жывёлы.
Спецыялісты дзяржаўнай ветэрынарнай службы раёна нагадваюць жыхарам, што імунізацыі супраць шаленства падлягае ўся жывёла без выключэння.
Іна КУЧЫНСКАЯ,
ветурач-эпізаатолаг райветстанцыі.