Бяда сваімі рукамі

З надыходам вясны традыцыйна пачашчаюцца выпадкі выпальвання сухой расліннасці. Ужо сёлета на тэрыторыі нашага раёна зарэгістравана 16 такіх фактаў. Нярэдкія выпадкі, калі выпальванне травы выходзіць з-пад кантролю і стварае яўную пагрозу для размешчаных побач будынкаў, лясных масіваў і тарфянікаў. Днямі на тэлефон 101 звярнулася жанчына з Залужжа, якая паведаміла, што ў вёсцы гарыць сухая трава, і агонь хутка перакінецца на яе хату. Пажарныя ўтаймавалі агонь і прадухілілі магчымую трагедыю, а вакол дома засталіся чорныя плямы.

Жудасную карціну можна было ўбачыць і ў вёсцы Новыя Буды: з поля ў бок вёскі наступала вогненная лавіна, моцны вецер гнаў агонь на жылыя дамы і гаспадарчыя пабудовы. Са стыхіяй змагаліся падраздзяленні Ляхавіцкага і Ганцавіцкага РАНС. Агонь знішчыў каля 2 гектараў травы. Пажарная служба выязджала на ліквідацыю палаў у вёскі Мыслабаж і Свяціца. Прыйшлося прыкласці нямала намаганняў, каб полымя не перакінулася на жылыя будынкі.

Выратавальнікі яшчэ раз нагадваюць, што выпальванне сухой расліннасці і пажніўных рэшткаў забаронена, а за парушэнне гэтай забароны прадугледжаны штраф у памеры ад 10 да 40 базавых велічынь. Штраф да 12 БВ можна атрымаць за распальванне вогнішча ў забароненых месцах.

Каб папярэдзіць бяду, трэба выконваць элементарныя правілы пажарнай бяспекі: утрымліваць у чысціні тэрыторыі грамадскіх і вытворчых аб’ектаў, не разводзіць вогнішчы паблізу будынкаў і збудаванняў, не кідаць на зямлю непатушаныя цыгарэты, запалкі, падпаленыя прадметы. Спальваць смецце дазваляецца пры пастаянным кантролі ў бязветранае надвор’е на адлегласці не менш за 15 метраў ад будынкаў, пры гэтым месца для вогнішча неабходна абкапаць.

Не стварайце бяду сваімі рукамі.

Ірына ТУКАЙ, спецыяліст РАНС.

Фота РАНС,  г.Ляхавічы.