“Сюіта” для камбайна з аркестрам. На Ляхавіччыне працягваецца жніво

Міхаіл Дзядовіч і Яўгеній Камінскі – адзін з лепшых маладзёжных экіпажаў на жніве.

Большасць з нас на пытанне, што такое сюіта, адкажа, хутчэй за ўсё, проста і правільна – музычны твор. Спецыяліст, знаўца або аматар з прэтэнзіямі растлумачыць – музычны твор з некалькіх самастойных частак, аб’яднаных адной тэмай. Прафесіянал-аграрый нагадае, што такую назву носіць адзін з сартоў пшаніцы.

Пабываўшы ў мінулы чацвер на ўборачным палетку СВК “Шлях новы”, можна было адчуць высока-гарманічнае гучанне “сюіты”. Сярэдняя ўраджайнасць стабільна трымаецца ў межах 80 цэнтнераў зерня з гектара, у асобныя дні на асобных участках набліжаецца ўвогуле да адзнакі 90 цэнтнераў. Зрэшты, сорт — адна з перадумоў ураджайнага поспеху, аднак, не яго гарантыя. Галоўнае — хлебароб, яго ўменні, старанні, настойлівасць, добрасумленнасць і шчырасць у працы. Ну і, канешне ж, не пашкодзіць крыху прэферэнцый ад нябеснай канцылярыі. Апошняя ў гэтым годзе была для аграрыяў хутчэй саюзнікам.

— Якасць насення і захаванне тэхналогіі з’яўляюцца галоўным. Насенне ніжэй першай рэпрадукцыйнай катэгорыі мы не выкарыстоўвалі. Вось гэта азімая пшаніца, напрыклад, сеялася першай рэпрадукцыяй. Ну і тэхналогія: тэрміны сяўбы, паўната і своечасовасць унясення падкормак, выкананне неабходных хімапрацовак, некаторыя іншыя моманты. З пункту гледжання надвор’я год можна лічыць спрыяльным. Не засушыла, не вымачыла. Зіма была дастаткова мяккая, перазімоўка добрай атрымалася. Не спісалі ні аднаго гектара – якую колькасць пасеялі, столькі ж і ўбіраем, — да слоў галоўнага агранома гаспадаркі Аляксандра Рамейкі няма чаго і дабавіць.

Першы вадзіцель-тысячнік на адвозцы зерня ў раёне Мікалай Царык.

Хіба толькі тое, што надвор’е ўсё ж такі пакінула свой адбітак на пшанічных палетках. Прычым, у літаральным сэнсе: у выглядзе суцэльнай палёгліцы асобных участкаў. Адсюль і хлебаробская задача нумар адзін: завяршыць уборку “пацярпелых” участкаў да дажджоў. У адваротным выпадку не пазбегнуць зернестрат: вільгаць справакуе хуткі рост і прарастанне праз збажыну пустазелля, што, канешне ж, значна пагоршыць якасць камбайнавання. Усе асноўныя ўборачныя сілы іменна тут: 10 камбайнаў, МАЗы на адвозцы зерня – толькі з прычэпамі. Ну і абед – мы засталі якраз той час – толькі каб паабедаць, папоўніць запасы вады. І — за штурвал камбайна.

Дарэчы, за дзень да таго абед ва ўдзельнікаў жніва ў СВК “Шлях новы” быў пад музыку. Не факт, што на палетку з “сюітай” народны клуб аматараў песні, гумару і гульні “Вечарніца” Навасёлкаўскага СДК выконваў творы менавіта такога фармату. Аднак песень і жартаў было пад завязку. Мастацкі калектыў аб’ехаў практычна ўсе палі, дзе ў гэты час працуюць людзі, – ад цэнтра да перыферыі. Цёплы прыём, удзячныя апладысменты суправаджалі самадзейных артыстаў на ўсіх імправізаваных сцэнах. Асаблівы ж рэспект “Вечарніца” атрымала на былых дараўскіх палетках, якія з гэтага года далучыліся да “Шляху новага”. Песня не толькі будаваць, але хлеб убіраць дапамагае.

Іван КАВАЛЕНКА.

Фота Сяргея ВАРАНОВІЧА.

Абед па раскладзе

На палявой сцэне выступае народны клуб аматараў песні, гумару і гульні «Вечарніца».