Хлебароб – гэта гучыць! Свята хлебаробаў “Дажынкі” ў раённым фармаце прайшло ў аграгарадку Русінавічы ў мінулую суботу.
Свята хлебаробаў “Дажынкі” ў раённым фармаце прайшло ў аграгарадку Русінавічы ў мінулую суботу. Сёлета Ляхавіччына мае важкі каравай – 80265 тон збожжа пры сярэдняй ураджайнасці 50,3 цэнтнера з гектара. А ў неаднаразовага пераможцы рэспубліканскіх, абласных і раённых спаборніцтваў на ўборцы збожжавых і зернебабовых СВК “Ляхавіцкім” яна адпаведна 69,5 цэнтнера на круг. Гаспадарка стала пераможцай на жніве-2014 у раёне. Дзе ж яшчэ было святкаваць дыжынкі як не тут?!
Старшыня “Ляхавіцкага” Аляксандр Вітко пра поспехі гаворыць сціпла, хаця гаспадарка адна з лепшых у вобласці і па ўраджайнасці, і па намалотах, і па выхадзе зерня на бала-гектар. Тое, што сёлета ўдалося сабраць значна больш, чым у мінулым годзе, Аляксандр Іванавіч лічыць заслугай усяго калектыву: “Паўсядзённая работа – гэта не подзвіг. Працуем без аўралаў. У добрым выніку заслуга кожнага нашага працаўніка. Ніхто не адседжваўся, працавалі дружна, адной камандай”.
Сёлетніх віноўнікаў урачыстасцей ў Русінавічах можна было ўбачыць здалёк, дзякуючы стужкам з надпісам “Пераможца”. Для загадчыка майстэрняў СВК “Жарабковічы” Георгія Жука жніво-2014 другое ў працоўнай біяграфіі ў якасці старшага камбайнера. І на гэты раз пераможнае – ён заняў другое месца сярод маладзёжных экіпажаў збожжаўборачных камбайнаў: “Уборка праляцела як адно імгненне. Дакладна ведаў : трэба працаваць хутка, якасна. Памочнік у мяне быў надзейны — Дзмітрый Лук’янчык. Работа спорылася і таму, што дома чакалі жонка і маленькі сын Захар”.
А вось для вадзіцеля СВК “Шлях новы” Дзмітрыя Анціпенкі быць перадавіком увайшло ў звычку. Ён неаднойчы быў першым у спаборніцтвах рознага ўзроўню як малады вадзіцель. А ў гэтым сезоне стаў пераможцам у раёне сярод “дарослых”: “Усё склалася як нельга лепш: пасеялі своечасова, збожжа ўрадзіла на славу, надвор’е не падвяло, хаця і спякотна было ў машыне. Лічу, што 3 тысячы тон перавезенага мною зерня не мяжа. У наступным годзе паспрабую пабіць уласны рэкорд”, – гаворыць Дзмітрый.
У гэты вераснёўскі дзень нават сама прырода, якая так паспрыяла і падчас жніва, падарыла ляхавіцкім рупліўцам выдатнае надвор’е, нібы вярнула ў лета.
Вось яно, урачыстае шэсце галоўных герояў, рупліўцаў зямлі ляхавіцкай! Як і належыць, у першых радах героі-перадавікі, кіраўнікі сельгаспрадпрыемстваў. Святочная калона прайшла перад гасцямі фестывалю, якія шчыра віталі лепшых хлебаробаў. Кульмінацыя свята разварочвалася на сцэне СДК.
Як сімвал багацця і працвітання Ляхавіччыны прыгожы каравай, спечаны з мукі новага ўраджаю, быў уручаны старшыні райвыканкама Вячаславу Сельмановічу. Не менш прыгожы атрымаў і гасцінны гаспадар — Аляксандр Вітко.
“Наша зямля славіцца шчырымі, працавітымі, таленавітымі людзьмі. Гэта, дзякуючы вам, шаноўныя хлебаробы, мы па праву ганарымся сёлетнімі намалотамі. Менавіта мудрасць аграрыяў, набытая за многія гады, вылілася ў такі важкі каравай. Дзякуй вам за нястомную працу, за адданасць справе”, — звярнуўся кіраўнік раёна да герояў свята.
Нямала цёплых слоў у адрас ляхавіцкіх аграрыяў сказаў намеснік старшыні Брэсцкага аблвыканкама Віктар Сакоўскі.
Сярод пераможцаў раённага спаборніцтва на жніве, узнагароджаных дыпломам І ступені,– лепшыя з лепшых камбайнеры, вадзіцелі на адвозцы зерня, машыністы зернетакоў. Не адставала ад прызнаных майстроў жніва і моладзь. Гэта значыць, што будучыня беларускай вёскі, яго лепшыя традыцыі ў надзейных руках маладога пакалення. Сярод узнагароджаных ганаровымі граматамі і падзячнымі пісьмамі райвыканкама, якія ўручыў Вячаслаў Сельмановіч, – механізатары, аграномы, кіраўнікі гаспадарак.
Шчыра падзякаваў за паспяховае жніво-2014 старшыня раённага Савета дэпутатаў Яўгеній Юрлевіч і ўручыў дыпломы пераможцам за другое месца, граматы і падзячныя пісьмы райсавета.
Пад апладысменты прысутных падымаліся на сцэну СДК і ўладальнікі дыпломаў ІІІ ступені, якія атрымалі з рук намесніка старшыні райвыканкама Сяргея Баргамона. Некаторыя працаўнікі адзначаны граматамі райкама прафсаюза работнікаў АПК.
Яшчэ больш узняў настрой удзельнікаў урачыстасці выдатны канцэрт, падрыхтаваны бадай самымі лепшымі самадзейнымі калектывамі і асобнымі выканаўцамі Ляхавіччыны.
Свята разгортвалася і за сценамі СДК. Выступаў самы гумарыстычны народны тэатральны калектыў “Вастраўчане” Востраўскага СДК, жартавала ляхавіцкая, дакладней, навасёлкаўская Лявоніха і яе сябры. Гучалі песні ў выкананні іншых творчых калектываў.
Народныя майстры, прычым не толькі з нашага раёна, але, напрыклад, з Пінска, прывезлі на фэст свае работы — керамічныя, саламяныя, вышываныя, плеценыя, каваныя вырабы.
Бойка ішоў гандаль у аб’ектах раённага спажывецкага таварыства. Многія ўдзельнічалі ў бяспройгрышнай латарэі. Гандлёвыя палаткі працавалі на працягу ўсяго свята — і тавары тут прапаноўваліся на розны густ, узрост і кашалёк. Дзеці з задавальненнем прыгалі на батуце, ласаваліся цукровай ватай і поп-корнам, прымалі ўдзел у атракцыёнах і гульнях. Свята стала сямейным.
Госці і гаспадары былі задаволены. Асабліва радаваліся святу мясцовыя жыхары – іх аграгарадок нібы памаладзеў і яшчэ больш папрыгажэў. А фінальным акордам святкавання стала дыскатэка – да поўначы.
Галіна КАНЬКО.
Фота Сяргея ВАРАНОВІЧА.