У Русиновичского ФАПа новая прописка

Чаканы падарунак нарэшце атрымалі жыхары аграгарадка Русінавічы і ўсіх навакольных вёсак: фельчарска-акушэрскі пункт пераехаў з невялікага старога будынка ў памяшканне былой пачатковай школы. Умовы для працы медыкаў, для пацыентаў непараўнальна лепшыя: памяшканне дагледжанае, прасторнае. Вакол прыгожыя сосны, а вясной і летам паветра напаўняецца водарам кветак.

У распараджэнні ФАПа кабінеты прыёму, акушэрскі, працэдурны. Як расказала загадчыца ўстановы Таццяна Грыкель, тэрыторыя яшчэ абжываецца, ўладкоўваюцца рабочыя месцы, наводзіцца парадак. А пацыенты ўжо наведваюцца па новым адрасе, атрымліваюць тут меддапамогу.

Па словах галоўнага ўрача раёна Уладзіміра Усцюшкова, пасля рамонту медустанове будзе нададзены новы статус – урачэбнай амбулаторыі. А гэта значыць, што кола медыцынскіх паслуг насельніцтву намнога пашырыцца. Будуць адкрыты фізіяпрацэдурны, стаматалагічны кабінеты, лабараторыя, па вызначаных днях тыдня прыём пацыентаў будзе весці ўрач.

Аліна ЛАПІЧ.

Фота Сяргея ВАРАНОВІЧА.