Вернае сэрца Аляксандра Саладухі
Кожны яго прыезд становіцца падзеяй у культурным жыцці нашага горада. Канцэрты праходзяць з нязменным аншлагам і пры шчодрых апладысментах. Прычына такога ажыятажу – любоў слухачоў і гледачоў. Творчасць артыста многім падабаецца менавіта сваёй шчырасцю, пранікнёнасцю.
Дарэчы, пачынаючы з 2006 года, калі Аляксандр Саладуха набыў юрыдычны статус як артыст, ён даў ужо больш за 500 канцэртаў. Дакладней, 16 снежня гэтага года ў Мінску адбудзецца 555-ы.
У межах гастрольнага тура 9 снежня Аляксандр Саладуха зноў у Ляхавічах. На гэты раз з юбілейным, дзясятым па ліку, альбомам пад назвай “Вернае сэрца”. Карэспандэнт “ЛВ” патэлефанаваў артысту, які быў на гастролях у Магілёўскай вобласці, і ўзяў у яго інтэрв’ю.
— Аляксандр, ведаем, што ў вас з нашым горадам ёсць агульныя біяграфічныя радкі. Якія ўражанні застаюцца ад сустрэч з ляхавіцкімі гледачамі?
— Уражанні самыя прыемныя – здорава адчуваць, што твая творчасць падабаецца, на канцэртах людзі, незалежна ад узросту, атрымліваюць задавальненне, радасць і добры настрой. Для артыста гэта дадатковы стымул, натхненне.
Падабаецца прыязджаць у Ляхавічы і таму, што менавіта сюды я быў размеркаваны ў 1982 годзе пасля заканчэння Мінскага медыцынскага інстытута ў санэпідэмстанцыю загадчыкам санітарнага аддзела. Праўда, пераразмеркаваўся ў Мінск, дзе працаваў у санстанцыі, а потым 4 гады — інспектарам рыбнагляду.
— “Берагі”, “Сотні кіламетраў да кахання”, “Усяго толькі 50”… З гэтымі канцэртнымі праграмамі вы аб’ездзілі ўсю Беларусь і не толькі. Чым парадуеце прыхільнікаў сваёй творчасці цяпер?
— “Вернае сэрца”— праграма, разлічаная амаль на 2 гадзіны выступлення. Прэзентаваць яе пачалі сёлета ў студзені. Альбом, як і папярэдні, запісваўся ў Маскве, аранжыроўшчыка мне парэкамендаваў вядомы расійскі спявак Стас Міхайлаў.
З “Верным сэрцам” паспелі пабываць ужо ў многіх гарадах Беларусі. Ад кожнай сустрэчы са слухачамі — мора станоўчых эмоцый. У першым аддзяленні праграмы — новыя кампазіцыі, напісаныя на працягу апошніх двух гадоў. Лірычныя песні “Мая жанчына”, “Не прымушайце жанчын доўга чакаць” — пра каханне, трэкі “Афіцэрам”, “Сынам” — патрыятычнай тэматыкі. Як пацвердзіў ужо не адзін канцэрт, яны не пакідаюць людзей абыякавымі. Гэта вельмі важна.
Дарэчы, у альбом увайшлі 9 песень майго сябра таленавітага кампазітара Алега Елісеенкава. Нашаму творчаму саюзу 26 гадоў.
Потым на сцэну выйдуць мае сыны Аляксандр і Антон, якія прадстаўляюць маладзёжную групу “Элемент”, з новымі песнямі з альбома “Мы”.
У другім аддзяленні прагучаць самыя вядомыя песні, што даўно сталі хітамі: ”Чужая мілая”, “Адзінокі”, “Зялёны вінаград”, “Каліна”, “Карусель” і іншыя. Дарэчы, кожную кампазіцыю будзе суправаджаць слайд-шоу на вялікім экране з сямейнага архіва, фрагментаў ранейшых канцэртаў і відэакліпаў. Абяцаю і іншыя сюрпрызы. Пасля канцэрта кожны жадаючы зможа ўзяць аўтограф, набыць дыскі з песнямі. І пры жаданні – фотасесія.
— А што, на вашу думку, гарантуе песням і выканаўцу поспех?
— Канешне, прыемна, калі тое, чым займаешся, прыносіць радасць іншым. Паспяховасць артыста дасягаецца толькі пры поўнай аддачы справе. Калі не выкладацца на ўсе 100 працэнтаў, слухачы не павераць у тваю шчырасць. А калі не павераць, то ў наступны раз на канцэрт не прыйдуць . Без прыхільнікаў творчасць развівацца не будзе — гэта адназначна. На ўсё, што я раблю на працягу амаль 30 гадоў, натхняеце мяне вы, мае слухачы. З любоўю аддаю сваё вернае сэрца і душу любімым гледачам. Жадаеце пераканацца? Прыходзьце на канцэрт, не пашкадуеце!
— Вы заўсёды спартыўны, падцягнуты, стыльны. Як гэта ўдаецца пры такім рытме жыцця?
— Чалавек выглядае на той узрост, на які сябе адчувае. Не важна, колькі табе — 25, 40, 55 ці 70 гадоў. Галоўнае — быць патрэбным іншым, неабыякавым, думаць не пра ўзрост, а пра тое, як зрабіць кожны дзень асаблівым, радаваць сваіх блізкіх. Мой любімы занятак спортам – сольныя канцэрты. Так, там аддаеш сілы і энергію, але не меншую атрымліваеш і ад слухачоў. Гэта і ёсць сакрэт маладосці. Ну і яшчэ зімой заўсёды сам ачышчаю двор загараднага дома ад снегу.
— Вы шчаслівы чалавек?
— Адназначна. Галоўнае, што падтрымлівае мяне заўжды і ва ўсім, – любоў. Я шчаслівы тым, што займаюся любімай справай, не ўяўляю сябе без сцэны, выступленняў, запісу новых песняў. Вельмі люблю сваіх дзяцей – сыноў і дачушку, жонку Наталлю. Ганаруся Беларуссю. Галоўнае ў маіх песнях —любоў. Каб аддаваць яе гледачам, неабходна быць самому улюбёным – у работу, жыццё, людзей. Яшчэ перакананы: шчасце не даецца проста так. Яго неабходна заслужыць, зарабіць. І абавязкова — верыць у сябе, свае сілы.
— Аляксандр, што пажадаеце чытачам “Ляхавіцкага весніка”, сярод якіх нямала прыхільнікаў вашай творчасці?
— Мае дарагія! Жадаю ўсім шчасця, моцнага здароўя, дабра, удачы, веры ў сябе. Часцей усміхайцеся і радуйцеся кожнаму пражытаму дню. Шчыра ваш, Аляксандр Саладуха!
Гутарыла Галіна КАНЬКО.