Падбароччанскае наваселле. У Ляхавіцкім раёне здадзена ў эксплуатацыю першая чарга Падбароччанскага комплексу
У даільнай зале Падбароччанскага комплексу.
На фоне зімовага лесу ярка пафарбаваныя будынкі жывёлагадоўчай фермы выглядаюць святочна. Але ж тут і сапраўды падзея: здадзена ў эксплуатацыю першая чарга Падбароччанскага комплексу, разлічанага на ўтрыманне 600 жывёл. Пакуль што наваселле адбылося ў адным памяшканні: тут зімуюць 126 нецеляў. Умовы ўтрымання самыя камфортныя: цёпла, прасторна, збалансаваныя рацыёны, кармавы стол запаўняе механізаваны раздатчык.
Непадалёку адміністрацыйнае памяшканне. Загадчыца МТФ Мая Зайцава, не хаваючы радасці, знаёміла з кабінетамі спецыялістаў, паказала пакой для адпачынку даярак, ёсць санвузлы, душавыя.
— Гатовая да работы даільная зала,— расказвае загадчыца. – Тут камп’ютарнае кіраванне і нават падлога з падагрэвам. Адразу будуць даіцца 28 кароў. У малочным блоку ўстаноўлены 2 халадзільнікі. У нас цяпер усё па-новаму, таму спадзяёмся, што і вынікі працы будуць радаваць.
Неўзабаве на Падбароччанскую ферму перавядуць 186 кароў, якіх будуць абслугоўваць 3 даяркі (адна падменная).
ААТ “Ляхавіцкі райаграсэрвіс” плануе адразу прыступіць да будаўніцтва жывёлагадоўчага памяшкання, дзе будуць пастаўлены на ўтрыманне яшчэ 400 кароў. Зразумела, што і кармавыя запасы для такога комплексу павінны захоўвацца побач: адна сянажная траншэя ўжо гатова, яшчэ тры – у планах.
Вясной рыхтуюцца здаць у эксплуатацыю другую чаргу комплексу. Калі першыя тоны малака адсюль адправяцца на перапрацоўку, можна будзе сказаць, што ў раёне запрацаваў па новых тэхналогіях яшчэ адзін жывёлагадоўчы комплекс.
Аліна ЛАПІЧ.
Фота Сяргея ВАРАНОВІЧА.
