Гарачая прапанова ад Ляхавіцкага кааппрама радуе ляхавічан
Больш за месяц прапанова ад Ляхавіцкага кааппрама радуе ляхавічан. Гарачы хлеб розных гатункаў штодзень можна набыць на паліцах магазінаў сеткі райспажыўсаюза «Родны кут» па адрасах: вул. Леніна, 13, 24, 28 і 45. Менавіта сюды двойчы на дзень да 14 і 16 гадзін прывозяць хлеб, батоны, кандытарскія вырабы ПУП «Ляхавіцкі кааппрам».
Такая прапанова райпо хутка знайшла сваіх прыхільнікаў. Асаблівай папулярнасцю ў пакупнікоў карыстаецца хлеб подавы, батон, хала, булачкі з макам і карыцай. Як расказала дырэктар кааппрама Галіна Якубец, пастаянна вывучаецца пакупніцкі попыт на хлебабулачныя вырабы. Хутка ў продажы, напрыклад, з’явіцца хлеб з семачкамі. Вывучаецца пытанне пра пашырэнне не толькі асартыменту, але і павелічэння колькасці гандлёвых кропак, дзе будзе прадавацца гарачы хлеб. Выпечкай займаюцца не толькі ў хлебапечным цэху, але і ў кандытарскім. Як паведамілі ў кааппраме, вытворчасць хлебабулачных вырабаў за першы квартал года склала 111 працэнтаў у параўнанні з аналагічным перыядам мінулага года.
Чакаем новых прапаноў ад райпо, у тым ліку – і квас ляхавіцкай вытворчасці.
Галіна ЗАРЭЧНАЯ.