Цёплы граніт. Валанцёрскі атрад «Міласэрнасць» Ляхавіцкага дзяржаўнага аграрнага каледжа наводзіць парадак ля «падшэфных» помнікаў /фота/
Валанцёрскі атрад «Міласэрнасць» Ляхавіцкага дзяржаўнага аграрнага каледжа сярод іншых падрыхтоўчых да юбілею спраў наводзіць парадак ля «падшэфных» помнікаў.
Малодшы сяржант Кабіхідзэ, сяржант Каплун, радавы Найдзёны і трое невядомых салдат, што пакояцца ў брацкай магіле ў вёсцы Задвор’е, канешне, ніколі не прымуць рапарт каляджан аб працоўным дэсанце сённяшняй моладзі – тады, у баі з фашыстамі, яны аддалі жыццё за наступныя мірныя вёсны.
Але, здаецца, нават халодны граніт пацяплеў ад шчырага жадання ўвасобіць сваю памяць пра герояў і подзвіг у добрыя справы, з якім валанцёры атрада «Міласэрнасць» прыйшлі навесці парадак на месцы, дзе пакояцца крочыўшыя ў бессмяротнасць салдаты Вялікай Айчыннай.
Намеснік дырэктара навучальнай установы па выхаваўчай рабоце Алег Ахрэмцаў расказаў, што гэта далёка не адзінкавы адрас увагі юнакоў і дзяўчат. А па даўняй традыцыі каляджане – навучэнцы і выкладчыкі – сумесна з работнікамі ваенкамата, членамі раённай арганізацыі Беларускага саюза афіцэраў і ў абавязковым парадку ветэранамі прымуць удзел у аўтамотавелапрабегу па маршруце Ляхавічы-Русінавічы-Курган Славы-Завінне-Альхоўцы-Задвор’е-Ляхавічы і ўскладуць кветкі да помнікаў загінуўшым у час вайны вызваліцелям і абеліскаў у іх гонар.
Вольга БАРАДЗІНА.
Фота Сяргея ВАРАНОВІЧА.