Па-людску. Ляхавіцкая раённая арганізацыя Чырвонага Крыжа аб’ядноўвае каля 7000 чалавек
Калі ўпершыню сутыкаешся з сур’ёзна хворымі дзецьмі, якія вымушаны літаральна кожную хвіліну змагацца з болем і адчаем, але ў той жа час напоўнены такой шчырай любоўю да жыцця, якую рэдка сустрэнеш нават у здаровых, адчуваеш нешта падобнае на шок. І пачынаеш многае пераасэнсоўваць. Становіцца сорамна скардзіцца на лёс з-за адсутнасці нейкіх дробных даброт. Абуджаецца міласэрнасць і жаданне дапамагчы.
Гуманнасць, незалежнасць, добраахвотнасць, адзінства, універсальнасць, нейтральнасць – асноўныя прынцыпы дзейнасці рэспубліканскага грамадскага аб’яднання “Беларускае таварыства Чырвонага Крыжа”, якое мае ўнікальны статус і добра вядомую ва ўсім свеце эмблему. Галоўнай крыніцай існавання гэтай дабрачыннай структуры з’яўляюцца добраахвотныя ахвяраванні насельніцтва, арганізацый як айчынных, так і замежных.
Старшынёй Ляхавіцкай раённай арганізацыі Чырвонага Крыжа сёмы год з’яўляецца загадчыца аддзялення сацыяльнай адаптацыі і рэабілітацыі тэрытарыяльнага цэнтра сацыяльнага абслугоўвання насельніцтва Жанна Лешык. Чалавек нераўнадушны, мэтанакіраваны, ініцыятыўны, яна аб’яднала вакол сябе аднадумцаў, гатовых падтрымаць іншых.
— У раёне членамі таварыства з’яўляюцца каля 7000 чалавек – гэта педагогі, медыкі, школьнікі, студэнты, прадстаўнікі іншых прафесій, аб’яднаныя ў 82 пярвічкі. Хачу запрасіць уступаць у арганізацыю ўсіх жадаючых, хто мае добрае сэрца, умее спагадаць і жадае дапамагаць трапіўшым у цяжкую жыццёвую сітуацыю, — зазначае Жанна Леанідаўна.
Пад асаблівым патранажам – мнагадзетныя сем’і. У маі па 25 такіх адрасах дастаўлялі прадуктовыя наборы, а ў 10 дамах падчас сумеснай з раённым аддзелам па надзвычайных сітуацыях акцыі ўстаноўлены аўтаномныя пажарныя апавяшчальнікі.
Пад сцягам Чырвонага Крыжа аб’яднаны людзі, якім баліць чужое гора. Напрыклад, ляхавічане збіралі сродкі і рэчы для перасяленцаў з Украіны, якія прыехалі з Луганскай і Данецкай абласцей на часовае ці пастаяннае пражыванне ў наш раён. 4 сям’і і 6 маладых людзей атрымалі прадуктовыя і гігіенічныя наборы, адзенне, абутак, і інш. А зусім нядаўна Беларускі Чырвоны Крыж ініцыяваў акцыю “Дапамога Непалу” па зборы сродкаў для пацярпелых ад землятрасення ў Непале, ініцыятыву падтрымалі і ляхавічане. Хто жадае дапамагчы, тэлефануйце па нумары 2-03-20.
Чырвонакрыжаўскі рух не робіць адрозненняў па веры, нацыянальнасці, палітычных поглядах – дапамагае ўсім, прычым бясплатна. Кожны, хто становіцца членам аб’яднання дэманструе сваю прыхільнасць ідэалам гуманізму, міласэрнасці, бо асноўнае ў рабоце, у тым ліку і раённай арганізацыі – гуманітарная дапамога людзям. Асаблівая ўвага – сацыяльна неабароненым грамадзянам: адзінокапражываючым, састарэлым, інвалідам, дзецям-сіротам, так званым цяжкім падлеткам.
Жанна Лешык расказвае, што вельмі папулярнай сярод ляхавічан стала акцыя “З рук у рукі”, падчас якой нашы землякі перадаюць для іншых людзей адзенне, абутак, цацкі і г.д. Найбольш актыўныя – Ірына Гатоўчыц, Наталля Бурбіцкая, Вячаслаў Новік, Пётр Юзэфовіч, Кацярына Навагран, Марыя Цімончык, Наталля Мацкевіч і іншыя.
Ніколі не адмаўляюць у дапамозе Чырвонаму Крыжу, робяць ахвяраванні многія арганізацыі і індывідуальныя прадпрымальнікі, сярод якіх СААТ ”Ляхавіцкі малочны завод”, ТАА “Трансэлектракамплект”, Віктар Яраш, ТДА “Карвента”.
Ёсць у старшыні раённай арганізацыі і надзейныя намеснікі, у якіх мноства ідэй і прапаноў, – намеснік дырэктара гімназіі Аксана Гатоўчыц і настаўніца гісторыі СШ № 2 Нэлі Пастушак. Прычым і старшыня і яе намеснікі працуюць у Чырвоным Крыжы на грамадскіх пачатках.
Адзін з асноўных накірункаў дзейнасці раённай арганізацыі БТЧК – валанцёрскі рух. На Ляхавіччыне актыўна працуюць рознаўзроставыя валанцёрскія атрады. Добраахвотнікі арганізоўваюць і праводзяць разнастайныя акцыі, наведваюць тых, каму патрэбны клопат і падтрымка. Калі стваралі першыя валанцёрскія брыгады, часам Жанне Лешык задавалі пытанне: “А колькі мне за гэта заплацяць?”. Цяпер такіх пытанняў не задаюць, а жадаючых дапамагаць становіцца ўсё больш. Хаця быць валанцёрам зусім няпроста. Цёплыя словы ўдзячнасці ад падапечных чуюць члены валанцёрскіх груп “Пошук” з гімназіі,
“Данка” з СШ № 2, “Чыстыя сэрцы” з СШ № 1. Адна з апошніх паспяховых акцый – “Душэўныя сэрцы”, прымеркаваная да 70-годдзя Вялікай Перамогі. Школьнікі пабывалі ў ветэранаў Вялікай Айчыннай вайны, уручылі падарункі ад Чырвонага Крыжа і, самае галоўнае, запісалі такія дарагія сэрцу ўспаміны ветэранаў. Усе нататкі ўвойдуць у Кнігу памяці, якая будзе выдадзена за сродкі арганізацыі ў кастрычніку гэтага года.
А яшчэ традыцыйна валанцёры праводзяць акцыі ў падтрымку здаровага ладу жыцця і супраць шкодных звычак. 23 мая група “Данка” арганізавала на вуліцах горада акцыю “Спынім спайс”. Чырвонакрыжоўцы актыўна ўдзельнічалі ў Сусветным дні супраць курэння. Не абыходзяцца без іх удзелу конкурсы дружын, спартыўныя спаборніцтвы і дабрачынныя мерапрыемствы. А нядаўна вельмі цікава і насычана прайшоў першы ў раёне валанцёрскі злёт.
Спраў у ляхавіцкіх актывістаў БТЧК хапае. Самае галоўнае, па словах Жанны Лешык, што неабыякавых людзей, гатовых адгукнуцца на сігнал аб дапамозе, становіцца ўсё больш. Гэта абнадзейвае.
Галіна КАНЬКО.
Фота Сяргея ВАРАНОВІЧА.