Вучні прымералі прафесію настаўніка

Дзень 18 лістапада ў Крывошынскай САШ быў асаблівым, не падобным на іншыя. І адрознівала яго тое, што гэта быў дзень школьнага самакіравання. Яго чакалі ўсе: вучні, якія замянілі настаўнікаў і адміністрацыю, дзеці ў класах. Хваляваліся таксама ўсе, асабліва “настаўнікі”, якім старэйшыя “калегі” дапамагалі старанна падрыхтавацца да ўрокаў. Але атрымалася як мага лепш!
А пачыналася ўсё з лінейкі, на якой юным грамадзянам нашай краіны былі ўрачыста ўручаны пашпарты, – нібы пацвярджаючы права рабят на тую ролю, якую яны сёння выконвалі: выхавальнікаў, класных кіраўнікоў.
Падчас падвядзення вынікаў дня рабяты прызналіся: быць настаўнікам вельмі адказна, трэба шмат ведаць. Вельмі прыемна, што трое нашых вучняў падзяліліся сваімі планамі ў будучым стаць сапраўднымі настаўнікамі, а выпускнік-выдатнік пацвердзіў, што менавіта гэты дзень канчаткова пераканаў яго ў жаданні стаць настаўнікам матэматыкі і інфарматыкі.
Старт школьнаму самакіраванню дадзены, і рабяты вырашылі працягнуць гэту цікавую і карысную справу. А педагогі падтрымалі іх ініцыятыву.
Святлана САПЕГА, намеснік дырэктара па выхаваўчай рабоце Крывошынскай САШ.