«Малы» паспяхова развіваецца
Першы значны ўраджай буякоў атрымала сёлета фермерская гаспадарка “Прадславіна”. І вось нядаўна зарэгістравана яшчэ адно прадпрыемства малога бізнесу, якое арганізавала не зусім звычайную для нашага рэгіёна справу. У Перахрэсці фермер разводзіць смаўжоў.
Сёлета ў раёне за 8 месяцаў створана 9 новых прадпрыемстваў (2 – у горадзе, астатнія ў сельскай мясцовасці) і, адпаведна, 125 рабочых месцаў. Напрыклад, у Свяціцы наладжана вытворчасць сталярных вырабаў. Нядаўна адкрытае прыватнае прадпрыемства “Трансэлектрабуд” займаецца вытворчасцю вырабаў з пластмасы, якія будуць рэалізоўвацца не толькі ў нашай краіне. Дзве прыватныя фірмы спецыялізуюцца на вытворчасці аконных блокаў і іх камплектуючых.
Прыватны бізнес трывала прапісваецца і ў сельскай гаспадарцы. У вёсцы Вялікая Лотва новая фермерская гаспадарка “У Мікалая” вырошчвае буйную рагатую жывёлу, “Лагуцін” у Куршынавічах займаецца раслінаводствам. Як паведаміла начальнік аддзела эканомікі райвыканкама Людміла Матчэня,т удзельная вага прадпрыемстваў малога бізнесу складае 17,5 працэнта ад занятых у эканоміцы раёна. 25,8 працэнта экспартуемай прадукцыі таксама прыходзіцца на прыватнікаў.
Галіна ЗАРЭЧНАЯ.