Агонь жартуе сур’ёзна. З 20 кастрычніка па 20 лістапада праходзіць пажарна-прафілактычная акцыя «За бяспеку разам». «ЛВ» неаднойчы звяртаўся да гэтай тэмы
З 20 кастрычніка па 20 лістапада праходзіць пажарна-прафілактычная акцыя «За бяспеку разам». «ЛВ» неаднойчы звяртаўся да гэтай тэмы. На мінулым тыдні пацікавіўся ходам месячніка ў аграгарадку Востраў і вёсцы Заполле.
На гэтым доме па вуліцы Савецкай у Заполлі чырвоная зорачка: тут жыве ўдзельнік Вялікай Айчыннай вайны Аляксандр Гунько. Гаспадар вельмі нахвальваў сваю абноўку – новую печ:
– Цяга што трэба. Ні чаду, ні дыму. Прапальваць адно задавальненне, не тое, што было раней.
Гэта адзін з падарункаў ветэрану ў год юбілею Вялікай Перамогі. Усталявалі новую печ і замянілі электраправодку за кошт бюджэтных сродкаў. Непаладкі і няспраўнасці ў пячным ацяпленні і збоі ў падачы электраэнергіі заўважыў сам гаспадар, гэта пацвердзілася і падчас штогадовага абследавання ўмоў жыцця састарэлых людзей. Дзеці і ўнукі наведваюць Аляксандра Гунько часта, але ж большую частку года ён жыве адзін, таму да яго, як і да іншых 433 адзінока пражываючых на тэрыторыі Востраўскага сельсавета грамадзян, – увага асаблівая. Як, дарэчы, і да 18 мнагадзетных і 35 неўладкаваных сем’яў, 29 інвалідаў І групы – яны ў пастаянным полі зроку мясцовай улады.
– Гэтым людзям увага першачарговая. Пажылым самастойна цяжка клапаціцца пра ўласную бяспеку. Стараюся як мага часцей бываць у кожнага, наведваюць іх і сацыяльныя работнікі, шэфствуюць школьнікі. На кантролі і сем’і, дзе не ўсё ладзіцца, – расказвае старшыня Востраўскага сельвыканкама Уладзімір Тадра.
З кіраўніком тутэйшай адміністрацыі сустрэліся пры падрыхтоўцы артыкула аб ходзе пажарна-прафілактычнай акцыі “За бяспеку разам”, што доўжыцца з 20 кастрычніка па 20 лістапада.
Уладзімір Тадра ехаў пасля размовы з сумна вядомым мясцовым грамадзянінам, дом якога ў Заполлі ноччу 7 жніўня ператварыўся ў папялішча (неаднойчы да таго здарэння гаспадара папярэджвалі пра неабходнасць захавання правілаў пажарнай бяспекі).
СВК “Востраў-Агра”, у якім працуе пагарэлец, выдзеліў яму для часовага пражывання дом у Рагачах. А вось разабраць рэшткі згарэлага вясковец так і не сабраўся: кіраўнік сельвыканкама называе апошні тэрмін – да 1 снежня, інакш будзе складзены адміністрацыйны пратакол.
Такіх патэнцыяльных правакатараў няшчасных выпадкаў у сельсавеце хоць і нямнога, але ёсць. Небяспеку ўяўляюць і пустуючыя дамы. Менавіта іх часта аблюбоўваюць бамжы, п’яныя кампаніі. Вось ужо каторы год, скардзіцца Тадра: ніяк не могуць “зладзіць” з уласнікам амаль разваленага дома на вуліцы Савецкай у аграгарадку Востраў. Цяпер міліцыя далучылася да яго пошуку. Закінуты дом псуе агульную карціну добраўпарадкавання і, галоўнае, – вельмі небяспечны. Дастаткова кінуць непатушаны акурак ці запалку – і агонь забушуе.
Разам з інспектарам аддзялення сацыяльнай дапамогі на даму тэрытарыяльнага цэнтра сацыяльнага абслугоўвання насельніцтва Святланай Гарон заходзім у суседні дом. Яшчэ з падворка відаць – жыве дбайны гаспадар. Як аказалася – гаспадыня, 76-гадовая Марыя Качан, якой дапамагае спраўляцца па доме сацыяльны работнік. Да ацяпляльнага сезона Марыя Канстанцінаўна падрыхтавалася добра: усё раскладзена-расстаўлена, дровы складзены ў спецыяльнай пабудове, брыкет – у іншай, балон са звадкаваным газам, як і належыць, у спецыяльнай скрыні на вуліцы пад замком. Дарэчы, заяўкі на замену балонаў выконваюцца па меры паступлення, а газавікі бываюць у аграгарадку і вёсках штотыдзень. Марыя Канстанцінаўна расказвае, што сыны абавязкова раз, а то і двойчы ў год прачышчаюць комін:
– Яшчэ некалі мае бацькі вучылі: печ трэба даглядаць, чысціць, бяліць абавязкова, тады яна і грэць будзе добра і бяспечна.
Як расказалі ў сельвыканкаме, у пастаяннай прафілактычнай практыцы – сельскія сходы, на якіх ідзе гаворка пра правілы бяспекі, акцэнтуецца ўвага і на адміністрацыйнай адказнасці за выяўленыя парушэнні. Такія сходы сёлета прайшлі ў Любейках, Рагачах, Куліках, Гуце, Заполлі, Востраве. Плануецца да канца года наведаць усе 11 вёсак сельсавета, у якіх пражывае 1936 чалавек. А яшчэ пры сельвыканкаме дзейнічае савет па прафілактыцы.
Заходзім да 87-гадовай Ніны Туміла. Для адзінокай Ніны Фамінічны першы памочнік і вельмі неабходны чалавек – сацыяльны работнік Наталля Гутырчык. Яна і ў хаце прыбярэ,і прадукты купіць, і ў іншых клопатах дапаможа. Гаспадыня прывыкла паліць печку толькі дровамі.
– Адзін дзень прапальваю печ, другі – “стаяк”, так і чаргую. Яны ў мяне хоць і ва ”ўзросце” больш за 40 гадоў, але дагле-джаныя, – расказвае гаспадыня. У доме ў абавязковым парадку – аўтаномны пажарны апавяшчальнік.
Наступны прыпынак – вёска Заполле. У сенцах дома, куды зайшлі, у кутку акуратна складзены дроўцы, з хаты цягне цяплом ад распаленай печкі. Кацярына Русакевіч, абапіраючыся на кіёк, ветліва сустракае нязваных гасцей. Ёй 82 гады, здароўе падводзіць, перанесла аперацыю, таму з удзячнасцю расказвае пра сацыяльнага работніка Таццяну Гібеж. Дзеці Кацярыну Анатольеўну не забываюць, прыязджаюць. Сама на зіму збіраецца да дачкі ў Мінск. Але, нягледзячы на гэта, дроў і брыкету запасла, печ абнавіла, аўтаномны пажарны апавяшчальнік спецыялісты праверылі.
– Дзякуй уладзе, што старых не забывае. Старшыня сельвыканкама Уладзімір Фёдаравіч цікавіцца нашым жыццём, пытаецца і пра праблемы. Людскі ён чалавек, – гаворыць гаспадыня.
На тэрыторыі Востраўскага сельсавета за апошнія гады сітуацыя з пажарамі адносна стабільная: пачынаючы з 2012 года па 3 (выключэнне – 2013г. – 5). Сёлета выратавальнікі прыязджалі ўтаймоўваць агонь у Заполле, Тухавічы і Траццякоўцы. У двух апошніх вёсках гарэлі нежылыя дамы.
Ацяпляльны сезон толькі пачаўся. Таму існуе злабадзённая неабходнасць зноў агледзець прыборы ацяплення, адрамантаваць тое, што не паспелі раней. Элементарныя правілы – не перапальваць печ, прапальваць яе да адыходу да сну, не складваць побач гаручыя матэрыялы, адсунуць фіранкі… І гэтыя элементарныя дзеянні могуць выратаваць чыёсьці жыццё.
Галіна КАНЬКО.
Фота аўтара.