Канкрэтныя даручэнні на зададзеную тэму

08/12/2015 116 redakcyja 1 Comment

Праблемы трэба вырашаць, а не замоўчваць – такую задачу паставіў старшыня райвыканкама Вячаслаў Сельмановіч перад усімі службамі на апаратнай нарадзе ў мінулы панядзелак.

У прыватнасці, нягледзячы на ранейшыя даручэнні, пакуль так і не прыняты меры адносна вадзіцеляў ці ўласнікаў вялікагрузных транспартных сродкаў, якія паркуюць машыны, у тым ліку, на прызначаных для легкавых аўтамабіляў дваровых стаянках. Спецыяльныя платныя стаянкі для вялікагрузаў прадугледжаны на тэрыторыі ДРБУ-200, ПМК-17, райаграсэрвісу. Яшчэ адно пытанне, якое патрабуе неадкладнага вырашэння – мыццё машын у дварах шматкватэрнікаў. Куды глядзяць міліцыя, прыродаахоўная і санітарная службы? – канкрэтнае пытанне да іх кіраўнікоў ад старшыні райвыканкама.

Чарговай нагодай для ўзмацнення кантролю спецыялістаў энерганагляду за спажываннем электраэнергіі стала пазаштатная сітуацыя ў мінулую нядзелю ў ЖБСК-11 па вуліцы Інтэрнацыянальнай у райцэнтры. З-за замыкання электраправодкі, выкліканага перагрузкай электрасетак, 4 кватэры былі поўнасцю абясточаны. Электрык, з якім кіраўніцтва кааператыва заключыла дагавор на абслугоўванне, на месца надзвычайнай сітуацыі не з’явіўся. Давялося выклікаць электраманцёраў камунгаса (хаця на балансе арганізацыі дом не знаходзіцца).

Доўгі час у аварыйным, небяспечным для пасажыраў стане, быў аўтобусны прыпынак у вёсцы Заліпенне. Нарэшце сіламі дарожнікаў гэта пабудова знесена. А што замест яе? Кіраўнік раёна зноў нагадаў старшыні Крывошынскага сельвыканкама і начальніку ДРБУ-200: праблему трэба вырашыць. Таксама дадзена даручэне ДРБУ-200 і ДЭУ-24 наводзіць парадак не толькі на аўтобусных прыпынках, вакол іх, але і паабапал дарог. Патрабуецца спіліць аварыйныя дрэвы на ўчастку аўтадарогі Ляхавічы-Баранавічы, якую абслугоўвае ДЭУ-24.

Вячаслаў Сельмановіч падвёў вынікі работы ўсіх сельвыканкамаў па навядзенні парадку на падведамасных тэрыторыях.

Кіраўнік раёна запатрабаваў ад райінспекцыі прыродных рэсурсаў і аховы навакольнага асяроддзя, землеўпарадкавальнай службы, раённага цэнтра гігіены і эпідэміялогіі больш цеснага ўзаемадзеяння з сельвыканкамамі: не толькі выяўляць недапрацоўкі, але і папярэджваць негатыўныя з’явы. Не будзе лішнім удзел спецыялістаў гэтых службаў у сельскіх сходах, асабісты прыём грамадзян.

– Зроблена нямала. Але праведзеных мерапрыемстваў недастаткова. Неабходна, у першую чаргу, наладзіць дыялог з насельніцтвам, не баяцца ісці да людзей, каб выяўляць праблемныя пытанні і разам іх вырашаць, – зазначыў старшыня райвыканкама.

Галіна КАНЬКО.