Інжынер РЭС Вікенцій Чайко (першы злева) з брыгадай па эксплуатацыі размеркавальных сетак выехалі на ўхіленне аварыйнай сітуацыі.
Са школы памятаем класічнае: энергія нікуды і ні пры якіх абставінах не знікае. Можа толькі пераўтварацца, пераходзіць з аднаго віду ў іншы. Напрыклад, механічная пры пэўных дзеяннях можа перарадзіцца ў цеплавую або электрычную. Ці наадварот. Але, калі забыцца на навуку і паразважаць з пункту гледжання простага абывацеля, кожны прыгадае, так бы мовіць, факты знікнення ў сваім доме электрычнай энергіі. Тыднёвай даўнасці правакацыйныя дзеянні мокрага цяжкага снегу, калі часткова або поўнасцю былі абясточаны амаль 4 дзясяткі населеных пунктаў раёна, адчулі многія. Ці не кожны з нас у тыя, у прамым сэнсе, цёмныя часы маліліся на спецыялістаў Ляхавіцкага раёна электрычных сетак. “Раённыя захавальнікі электрычнай энергіі” спрацавалі аператыўна. Паўтара сутак дзеянняў у рэжыме блізкім да “НС” вярнулі раённы электрарубільнік у становішча “ўсё ўключана”.
Адзіным зладжаным і гарманічна настроеным механізмам працавалі і працуюць, фактычна, усе службы, брыгады і групы РЭС. Пры гэтым на фоне ўдзячных галасоў, не-не ды і чуюцца незадаволеныя. Маўляў, доўга ехалі, не хутка рамантавалі і таму падобнае… У якасці законнага контраргумента – словы начальніка Ляхавіцкага РЭС Віктара Станкевіча:
– Па-першае, па дагаворы, пісьмова заключаным паміж арганізацыяй і канкрэтным карыстальнікам нашых паслуг, у выпадку аварыйных сітуацый дапускаецца перапынак ў электразабеспячэнні працягласцю да 24 гадзін. Калі больш – вы маеце законную нагоду як мінімум для дыялогу. Хоць такіх крайніх выпадкаў мы шчыра і з выключнай зацікаўленасцю імкнёмся не дапускаць. Па-другое, існуюць нормы, якія дакладна прапісваюць чарговасць пасляаварыйных падключэнняў. Спачатку – малочнатаварныя фермы, зернесушыльныя комплексы (калі на тое сезон), дзіцячыя сады і школы, установы аховы здароўя, прадпрыемствы і аб’екты жыццязабеспячэння і г.д. Прыватныя домаўладанні гэты спіс замыкаюць. Не памочнік нам ў пытаннях ліквідацыі аварыйных сітуацый і цёмны час сутак. У адпаведнасці з правіламі тэхнікі бяспекі, ноччу дазваляецца толькі лакалізацыя – выяўленне – аварыйнага ўчастка. З тым, каб з першым дзённым святлом, без прамаруджвання, прыступіць да аднаўленчых работ. Ні пры якіх абставінах не марудзіць – адзін з прынцыпаў работы Ляхавіцкага РЭС.
Гаспадарка арганізацыі “цягнецца” сотні кламетраў. Сілавымі лініямі ахоплівае тэрыторыю раёна ўздоўж і ўпоперак, на рознай вышыні і ў розных накірунках. Асабліва відавочнымі адным і з асноўных вытворчых актываў арганізацыі з’яўляюцца паветраныя лініі электраперадачы. Калі іх выпрастаць у адну шарэнгу, атрымаецца строй працягласцю каля 1200 кіламетраў. Сілавых кабельных ліній на балансе арганізацыі разоў у шэсць менш, але хіба проста трымаць іх у спраўнасці? У зоне адказнасці ляхавіцкіх захавальнікаў электрычнай энергіі – дзясяткі трансфарматарных падстанцый, “свая” міні-ГЭС. Бясспрэчным галоўным актывам арганізацыі з’яўляецца яе працоўны калектыў. 73 прафесіяналы сваёй справы: маладыя-перспектыўныя, вопытныя, чый стаж службы перавысіў 3 дзясяткі гадоў. У абсалютнай большасці – прадстаўнікі моцнай паловы чалавецтва. Увесь калектыў, а таксама ветэранаў Ляхавіцкага РЭС шчыра віншуем з надыходзячым прафесійным святам!
Іван КАВАЛЕНКА.
Фота Сяргея ВАРАНОВІЧА.
Начальнік Віктар Станкевіч (у цэнтры), дыспетчар Ігар Арцюшкевіч, інжынер Віталій Юруць.
Службу збыту электраэнергіі ўзначальвае намеснік начальніка РЭС Валерый Маслюк (трэці справа).