За фальшыўку спытаюць
Мінулым летам жанчына спрабавала абмяняць на рынку ў райцэнтры некалькі купюр наміналам 100 долараў кожная. Закон грамадзянка парушыла двойчы: праводзіла незаконныя аперацыі з валютай і займалася фальшываманецтвам (купюры аказаліся несапраўднымі). Аналагічных фактаў збыту падробленых грашовых знакаў летась у нашым раёне выяўлена 5.
Сёлета судом Ляхавіцкага раёна разгледжаны крымінальныя справы і вынесены абвінаваўчы прыгавор адносна 31-гадовага грамадзяніна і 21-гадовай грамадзянкі, якія захоўвалі і спрабавалі збыць падробленыя долары. У іх канфіскавана 8 купюр наміналам па 100 долараў. Мужчына асуджаны на 4 гады пазбаўлення волі з накіраваннем у папраўчую ўстанову адкрытага тыпу, дзяўчына – на 2 гады.
Як паказвае практыка, амаль уся пад-робленая замежная валюта вырабляецца на высакаякасным паліграфічным абсталяванні і паступае ў Беларусь у асноўным з Расіі, Польшчы, Украіны і Літвы. У большасці выпадкаў увоз падробак адбываецца ў так званым прыватным парадку грамадзянамі, якія працуюць за мяжой ці адпраўляюцца ў турпаездкі, у госці, а таксама прадпрымальнікамі, якія закупляюць імпартныя тавары.
Фальшываманецтва адносіцца да катэгорыі цяжкіх злачынстваў. За выраб і збыт фальшывых грошай прадугледжана крымінальная адказнасць – ад 2 да 5 гадоў абмежавання волі ці ад
2 да 7 гадоў пазбаўлення волі з канфіскацыяй ці без канфіскацыі маёмасці. За такія ж дзеянні паўторна ці арганізаванай групай або ў асабліва буйных памерах можна апынуцца за кратамі на тэрмін ад 5 да 15 гадоў з канфіскацыяй маёмасці.
У тым, што трапілі на вудачку фальшыва-манетчыкаў, нярэдка вінаваты і самі грамадзяне, напрыклад, тыя, хто ў парушэнне ўстаноўленага парадку правядзення валютных аперацый ажыццяўляе продаж кватэр, аўтамашын і іншых таварна-матэрыяльных каштоўнасцей за замежную валюту. У некаторых выпадках бестурботнасцю грамадзян карыстаюцца так званыя валютчыкі, паслугі якіх, на жаль, па-ранейшаму запатрабаваныя. Для грамадзян, якія прымаюць замежную валюту ў якасці плацёжнага сродку штраф складзе ад 50 да 100 БВ, індывідуальнаму прадпрымальніку ці юрыдычнай асобе за аналагічнае правапарушэнне давядзецца заплаціць ад 100 да 200 БВ.
Адміністрацыйная адказнасць прадугледжана і за скупку, продаж, абмен замежнай валюты без спецыяльнага дазволу (ліцэнзіі) ці дзяржаўнай рэгістрацыі: штраф у памеры ад 50 да 150 БВ з канфіскацыяй прадмета адміністрацыйнага правапарушэння і грашовых сродкаў, якія знаходзіліся ў вінаватага на момант учынення правапарушэння, ці без канфіскацыі. За паўторныя дзеянні – штраф ад 150 да 200 БВ. Перш чым разлічыцца за абноўку на рынку доларамі або расійскімі рублямі, падлічыце, на колькі мільёнаў апусцее ваш кашалёк.
Аляксандр ТРАЯНОЎСКІ,
намеснік начальніка РАСК.