Што такое Калёня?
Калёняй мясцовыя жыхары называлі месца пасялення палякаў. У размове вяскоўцы замест слова «калонія» вымаўлялі «калёня». Тлумачэнне назвы зрабілі пачаткоўцы СШ № 2 пад кіраўніцтвам настаўніцы Ніны Юрчык.
Невялікі і ўтульны аграгарадок Малое Гарадзішча мае сваю цікавую гісторыю. Хоць тут і не адбывалася маштабных падзей, але ў гэтых мясцін багатае мінулае. З даўніх часоў тут жылі людзі, апрацоўвалі зямлю, гадавалі дзяцей, абаранялі свой край ад ворагаў. А што мы ведаем пра сваіх продкаў, пра гісторыю родных мясцін? Ці памятаем, адкуль пайшла тая ці іншая назва?
У свой час Малое Гарадзішча стала цэнтрам гаспадаркі, сельсавета. Побач – Вялікае Гарадзішча, Волька, Завінне, Марынова, Падсаколле, Крывое Сяло, Літоўка. Пра кожную з вёсак ёсць што расказаць.
Завінне ўзгадваецца з 1589 года. У 1941-ым тут ішлі жорсткія баі з нямецка-фашысцкімі захопнікамі. У брацкай магіле пахаваны 245 байцоў Чырвонай Арміі. Марынова з’явілася пасля адмены прыгоннага права. А ў Малым Гарадзішчы і Крывым Сяле ў пачатку 20-х гадоў адкрыліся першыя школы…
Пасля Вялікай Айчыннай вайны вёсках пачалі арганізоўвацца калгасы – у акрузе налічвалася аж 7 калектыўных гаспадарак. Нялёгкі той час успамінае былая настаўніца мясцовай школы Надзея Карпейчык: “Часта ў думках вяртаюся да той вёскі, якая толькі станавілася на ногі. Не было нічога – толькі рукі людскія… Але як бы цяжка ні даводзілася, я заўсёды з цяплом успамінаю тыя часы”.
Хараство роднага краю, назва тых мясцін, дзе нарадзіліся, кранаюць душу. Бярэзнік, Чабакоўшчына, Калёня, Пастушкава паляна, поле Грынцэвічаў, поле Рутвінскіх – як можна забыць гэтыя сцяжынкі дзяцінства?!
На Калёні некалі была пачатковая Малагарадзішчанская школа, якая прыняла сваіх першых вучняў 1 верасня 1938 года. Гэта вельмі прыгожае месца, з усіх бакоў яго абдымаў лес. У гады Вялікай Айчыннай у будынку школы знаходзіўся нямецкі штаб. Пасля заканчэння вайны паўразбуранае памяшканне адрамантавалі і вучоба дзяцей прадоўжылася.
Поле Грынцэвічаў, поле Рутвінскіх славіліся добрым ура-джаем бульбы, Пастушкава паляна – грыбамі, а ў Бярэзніку, за сялом, вяскоўцы пасвілі сваю жывёлу. Жылі тут Віхноўскія, Карпейчыкі, Бурчыцы, Півавары, Пастушкі, Жывіцы. З расказа Галіны Жывіцы: “Дзяцінства і юнацтва прайшло на хутары пры лесе ў мястэчку Пожар. Пасля заканчэння школы вучылася ў Пінскім педвучылішчы, затым на філфаку Белдзяржуніверсітэта… Я імкнулася паспытаць сябе ў многім. У паэзіі, у спевах. Была салісткай народнага ансамбля “Палескія світанкі”, аб’ездзіла з гэтым калектывам усю Беларусь, гастралявалі ў Польшчы, Германіі, Францыі, Канадзе, Грэцыі і ў іншых краінах свету. Пашчасціла сустрэцца з многімі вядомымі музыкантамі: Цітовічам, Дрынеўскім, Роўдай, Семянякам, Захлеўным…
Маю вялікую радню, сярод якіх самыя блізкія людзі – сёстры, брат, матуля, бацька, які быў вядомым на ўсю акругу музыкантам-самавучкам. Люблю родныя мясціны:
Ну, страчай мяне,
роднае Рымшава поле,–
Стракацяць дзьмухаўцы
бесклапотна ва ўсю,
Нібы кветкі,
прынесла падзяку ў прыполе
Ад нашчадкаў
я дзеду свайму Кастусю.
Тут ён гэты суглінак
упарта скародзіў,
Клапаціўся пра дзетак,
пра будучнасць марыў,
Як у новай кашулі
з сявенькай выходзіў
І высейваў надзею
на тыя гектары.
Тут ён жаўранка слухаў
і цешыўся ўсходам,
Дбаў пра колас цяжкі
і не ведаў спачыну,
Працаваў-шчыраваў
аж да сёмага поту,
Каб сямейка не зведала
смаку мякіны.
І скаралася ты прад
заўзятым ратаем:
Зерне прутка цяснілася
ў коласе зноў,
І ўзыходзіла сонца
крутым караваем
Над Гарэшнікам праз
малако туманоў…”
У Вялікую Айчынную вайну большая частка мужчынскага насельніцтва пайшла на фронт. 126 землякоў не вярнуліся назад. Сёння ў Малым Гарадзішчы жыве ветэран Вялікай Айчыннай вайны Іван Віхноўскі і вязні фашысцкіх канцлагераў Яўгенія Кудзін і Таццяна Віхноўская.
Сучасная вёска мае развітую інфраструктуру – сярэдняя школа і філіял музычнай школы, дзіцячы сад, магазін, ФАП, лазня, Дом культуры з бібліятэкай, аддзяленне ЦБП Беларусбанка і пошта. У цэнтры населенага пункта – двухпавярховыя катэджы, пабудаваныя па праграме адраджэння вёскі. У 2002 годзе ў Малое Гарадзішча прыйшло блакітнае паліва. Вёска стала аграгарадком.
Валянціна КАРПОВІЧ,
бібліятэкар Малагарадзішчанскай СБ.
Фота Сяргея ВАРАНОВІЧА.