Калі чысціня і парадак – норма жыцця
Сярод пытанняў, якія выносіліся на парадак дня адзінаццатай сесіі раённага Савета дэпутатаў 27 склікання, – аб рабоце, што праводзіцца ў раёне па добраўпарадкаванні населеных пунктаў і аб’ектаў вытворчага і сацыяльна-культурнага прызначэння, навядзенні парадку на зямлі і зносе старых пустуючых дамоў у сельскай мясцовасці.
Галоўны дзяржаўны санітарны ўрач раёна Віталій Ціханаў асноўную ўвагу ў дакладзе акцэнтаваў на аб’ёмах выкананых работ па добраўпарадкаванні і навядзенні парадку на тэрыторыі рэгіёна, а таксама тых болевых кропках, якім патрабуецца тэрміновае “аздараўленне”.
Ён нагадаў прыклады сумеснай работы мясцовай улады з рознымі службамі, у прыватнасці, адзначыў супрацоўніцтва Ганчароўскага сельвыканкама з ПМС па пытаннях добраўпарадкавання могілак і зносу старых безгаспадарных дамоў. У СВК “Жарабковічы” ўласнымі сіламі зносяць пустуючыя дамы і па-гаспадарску распараджаюцца вызваленай зямлёй. У Начаўскім сельсавеце ў мінулым годзе праведзены акцыі “Чыстая вёс-ка”, “Чысты парк” з удзелам насельніцтва і арганізацый.
Актыўна ўзаемадзейнічаюць сельвыканкамы, камунгас і санслужба па заключэнні дагавораў на вываз цвёрдых камунальных адходаў. Так, пры ўвядзенні ў эксплуатацыю жылых дамоў райЦГіЭ патрабуе дагавор з камунальнікамі на вываз смецця, пра што на пачатковым этапе забудоўшчыкаў інфармуюць сельвыканкамы.
У мінулым годзе пад кантролем спецыялістаў санітарна-эпідэміялагічнай службы прыведзена ў належны санітарны стан тэрыторыя каля 1000 аб’ектаў, у тым ліку трох гаражных і дачных кааператываў, больш за 50 аб’ектаў сельскагаспадарчых арганізацый, 30 могілак, 3 зон адпачынку, ліквідавана 99 несанкцыянаваных сметнікаў і г.д.
Першыя памочнікі сельвыканкамаў у навядзенні парадку – старасты вёсак. Сярод самых ініцыятыўных Віталій Ціханаў назваў Валянціну Галоту, Надзею Патапчык, Людмілу Сідорскую, Святлану Вільчэцкую.
На жаль, іншы раз парадак наводзіцца толькі пасля правядзення рэйдаў, выдачы папярэджанняў і прыцягнення да адказнасці. За мінулы год райЦГіЭ выдаў 395 прадпісанняў і рэкамендацый аб ухіленні парушэнняў, 134 чалавекі аштрафаваны на суму больш за 100 мільёнаў рублёў, у органы ўлады і ведамствы накіравана 179 інфармацыйных пісьмаў з прапановамі па вырашэнні праблемных пытанняў, 11 хадайніцтваў.
Сярод галоўных парушэнняў – несанкцыянаванае размяшчэнне бытавых і будаўнічых адходаў на тэрыторыі сельскагаспадарчых аб’ектаў і населеных пунктаў, а таксама невыкананне заканадаўства пры ўтрыманні міні-палігонаў, зон адпачынку, гаражных масіваў, дачных і гаражных кааператываў. Прычым большасць з іх не патрабуе для ўхілення значных матэрыяльных затрат і ўкладанняў. Цэнтралізаваны збор камунальных адходаў арганізаваны ва ўсіх населеных пунктах, але застаецца дастаткова высокім працэнт скасавання домаўласнікамі дагавораў на вываз смецця. У выніку ўтвараюцца звалкі (у 2015 годзе іх выяўлена 99). Пастаяннай стала гэта з’ява па вуліцы Заводскай у Тухавічах, на тэрыторыі былога ФАПа ў Альхоўцах, Інтэрнацыянальнай у Сваятычах.
Для горада застаецца актуальнай праблема неналежнага санітарнага стану тэрыторыі асобных гаражных масіваў і кааператываў, кантэйнерных пляцовак і месц каля іх, што часта звязана з іх недастатковай санітарнай ачысткай, несістэмным вывазам смецця, але найперш – звычкай некаторых грамадзян смеціць вакол сябе. Каля сядзіб прыватнай забудовы па-ранейшаму можна ўбачыць гравій, пясок, іншыя будматэрыялы і зрэзаныя галіны, якія доўгі час псуюць навакольную карціну.
Адным з судакладчыкаў па першым пытанні выступіў начальнік райінспекцыі прыродных рэсурсаў і аховы навакольнага асяроддзя Уладзімір Пятроўскі, які даў характарыстыку прыродным рэсурсам Ляхавіччыны і акрэсліў экалагічныя праблемы рэгіёна.
Старшыня райсавета дэпутатаў Яўгеній Юрлевіч звярнуўся да кіраўнікоў арганізацый і прадпрыемстваў з просьбай далучыцца да добраўпарадкавання, а таксама звярнуў увагу дырэктара лясгаса Міхаіла Свістуна на выпадкі складзіравання лесу на палях, пашах, якія затым не заўсёды ў час падчышчаюцца.
Дэпутаты раённага Савета разгледзелі і шэраг іншых пытанняў, у тым ліку зацвердзілі праграму дзяржаўных гарантый па забеспячэнні грамадзян даступным медыцынскім абслугоўваннем на тэрыторыі раёна на 2016 год.
Па ўсіх пытаннях парадку дня прыняты адпаведныя рашэнні.
Наталля ПЕРАПЕЧКА.