«Рэквіем па мары»
Праблема алкагалізму, курэння, наркаманіі, на жаль, па-ранейшаму застаецца актуальнай, а гэтыя шкодныя звычкі ўсё больш распаўсюджваюцца. Пад іх уздзеянне трапляюць школьнікі, якія ўпершыню спрабуюць выкурыць цыгарэту-другую ці каштуюць “градусныя напоі”. Для некаторых рабят – гэта спроба нечага новага, нязведанага, таго, што забараняюць дарослыя. Непрыкметна чалавека “засмоктвае”, і першая спроба паступова і даволі хутка перарастае ў звычку. А, як вядома, вызваліцца з абдымкаў тытуню, алкаголю і наркотыкаў надзвычай цяжка. Таму з гэтымі шкоднымі для здароўя звычкамі неабходна змагацца ўсімі магчымымі сродкамі.
Творчая група сацыяльнага тэатра “Адлюстраванне”, што дзейнічае ў гімназіі, не змагла застацца ў баку ад гэтай глабальнай сацыяльнай праблемы, быў пастаўлены спектакль пад назвай “Рэквіем па мары” ці “Абмежаванае ў сваёй свабодзе жыццё”. Галоўная задача спектакля – паказаць жыццё звычайных людзей, якія вучацца, працуюць, мараць, кахаюць, спадзяюцца… Але толькі адзін няправільны крок – і ўсё рушыцца, белае надзвычай хутка ператвараецца ў чорнае. Здавалася б, нічога такога чалавек не зрабіў, проста пачуў смак у наркотыках, цыгарэце ці алкаголі. Ахвяры гэтых звычак не жывуць, а існуюць, з кожным днём з чалавека ператвараюцца ў істоту – і гэта суровая праўда… Мы паказалі барацьбу дабра і зла.
Да прэм’еры былі 4 месяцы напісання сцэнарыя, шматлікія рэпетыцыі, падрыхтоўкі дэкарацый і рэквізіту. А колькі было спрэчак! Але ў выніку ўсё атрымалася, і ў многім дзякуючы нашаму кіраўніку Марыі Зубрылавай. Юныя аматары-тэатралы Жанна Гвоздзь, Аляксандра Кавалеўская, Таццяна Магала, Марта Кудзіна, Анастасія Бецька, Наталля Калоша, Алёна Ушко, Аліна Гатоўчыц, Дар’я Морская, Ганна Петравец, Вольга Міклашэвіч, Юлія Дарахлевіч і Дар’я Тумаш вельмі хваляваліся, каб усё атрымалася.
Прэм’ера адбылася яшчэ ў сакавіку, канешне ж, у нашай роднай гімназіі
Пасля прагляду спектакля было бачна, што і рабяты, і настаўнікі асэнсавалі ўбачанае, абменьваліся думкамі. Нам, артыстам-аматарам, было вельмі прыемна чуць добрыя водгукі наконт выступлення. Самадзейныя артысты гатовы выступіць з пастаноўкай у іншых навучальных установах Ляхавіччыны. Запрашайце!
Ганна РОГАЎЦАВА,
выпускніца гімназіі.