Пачалася рэгістрацыя кандыдатаў у дэпутаты

У акруговую выбарчую камісію Баранавіцкай сельскай выбарчай акругі № 7 паступілі дакументы ад трох асоб, вылучаных кандыдатамі ў дэпутаты.

Рэгістрацыя кандыдатаў у дэпутаты Палаты прадстаўнікоў Нацыянальнага сходу Беларусі шостага склікання пачалася 2 жніўня і прадоўжыцца да   11 жніўня ўключна.

Рэгістрацыя праводзіцца акруговымі выбарчымі камісіямі, якія разглядаюць пададзеныя патэнцыяльнымі кандыдатамі дакументы з улікам шэрага крытэрыяў. Так, у рэгістрацыі будзе адмоўлена пры наяўнасці судзімасці ў асобы, якая вылучана кандыдатам, і непрадстаўленні аднаго або некалькіх неабходных дакументаў. Адмовяць у рэгістрацыі, калі ў падпісных лістах па вылучэнні кандыдата ў дэпутаты будзе больш як 15 працэнтаў недакладных подпісаў выбаршчыкаў (ад агульнай колькасці правераных). Пасведчанне кандыдата таксама не выдадуць у выпадку, калі адкрыюцца факты выкарыстання ў інтарэсах выбрання грашовых сродкаў або іншай матэрыяльнай дапамогі замежных дзяржаў і арганізацый, замежных грама-дзян і асоб без грамадзянства, міжнародных арганізацый і г.д.

Акруговая камісія мае права адмовіць у рэгістрацыі пры прадстаўленні ў дэкларацыі аб даходах і маёмасці асобы, вылучанай кандыдатам у дэпутаты, не адпаведных сапраўднасці звестак, якія маюць істотны характар.

У рэгістрацыі можа быць адмоўлена, калі будуць выяўлены факты ўзнагароджання выбаршчыкаў за ўнясенне подпісу, удзелу адміністрацыі арганізацыі ў зборы подпісаў выбаршчыкаў або прымушэння ў працэсе збору подпісаў.

Пасля рэгістрацыі кандыдаты пачнуць вядзенне перадвыбарнай агітацыі, гэты перыяд прадаўжаецца непасрэдна да выбараў. Аднак агітацыя ў дзень выбараў (у выпадку з парламенцкімі выбарамі ў Беларусі гэта 11 верасня) забаронена.