Заснавальнікі ТАА «Кампазітная кампанія» Аляксей Клявец, Віктар Яфімік, Юрый Піваш.
ТАА “Кампазітная кампанія” сёлета стала пераможцам нацыянальнага конкурсу “Прадпрымальнік года”. Нашы землякі сярод сямі лепшых прыватных прадпрыемстваў краіны – па адным ад кожнай з абласцей і горада Мінска – у намінацыі “Паспяховы старт”.
Кампанія – аб’ект нашай увагі – не згубілася на рынку, хоць і губляецца ў прамысловай зоне Ляхавіч. У самых яе глыбінях, на неабсяжнай для вока тэрыторыі базы хімічных паставак райаграсэрвіса. Гэта неабсяжнасць – прадукт былых часоў, іншых патрабаванняў і, верагодна, магчымасцяў. Асобныя з размешчаных тут сцен успрымаюцца рэччу ў сабе – стаяць без выкарыстання. У шэрагу іншых “прапісаліся” арандатары. Падведзеная чыгуначная ветка, думаецца, з’яўляецца ліквідным актывам, доўгія, складскога тыпу будынкі дзеляць, у тым ліку, і прыватныя фірмы – у якасці вытворчых пляцовак.ТАА “Кампазітная кампанія” адна з іх. І адзіная ў сваім родзе.
Сваё летазлічэнне кампанія вядзе з лістапада 2013-га. Незадоўга да неюбілейнай, але і нерадавой даты мы пабывалі на прадпрыемстве: і паглядзелі, і паслухалі. На пытанне пра складанасці, што сустракаюцца ў рабоце, дырэктар кампаніі Аляксей Клявец заўважыў:
– Спытайце лепш пра “лёгкасці”. Стартаваць у бізнесе, ды яшчэ і з вытворчым праектам – задача няпростая і нятанная. Патрэбны пачатковы капітал, які выражаецца не толькі ў наяўнасці ці ва ўменні знайсці пэўную колькасць грашовых знакаў. Ідэя і настойлівасць у яе матэрыялізацыі каштуюць танней, але ацэньваюцца па куды больш высокай шкале.
Задумка запусціць вытворчасць вырабаў з палімерных матэрыялаў узнікла ў галаве некага з тройкі заснавальнікаў фірмы. А можа гэта быў і плод сумеснага мазгавога штурма Аляксея Кляўца, Віктара Яфіміка і Юрыя Піваша. Прынцыповасць не ў гэтым, а, як пацвердзілася ў ходзе сканіравання рынку, у яе арыгінальнасці. Зыходзячы з чаго ТАА “Кампазітная кампанія” можна і трэба класіфікаваць як імпартазамяшчальны праект.
Матэрыялізацыя пачалася з набыцця тэхналагічнага абсталявання, аснову якога складаюць станкі-тэрмапластаўтаматы. Пацягнуць новыя – задача невырашальная, знайшлі, прыцаніліся і спыніліся на пары былых ва ўжытку агрэгатаў. Прывезлі, усталявалі, наладзілі, запусцілі ў дзеянне. З нямецкай педантычнасцю – а краінай-вытворцам станкоў з’яўляецца іменна Германія – тыя працягваюць служыць: штампуюць рознага калібру апоры і падпятнікі для мэблі, разьбовыя заглушкі і мантажныя прыстасаванні для ацяпляльных радыятараў, арміраваныя для трываласці металам ручкі, некаторае іншае. На сённяшні дзень наменклатурны рад прадукцыі кампаніі складаецца з прыкладна дзясятка найменняў. Асвоіць выраб нейкай новай дэталі – азначае абзавесціся новай формай для ліцця. Што магчыма, аднак зусім няпроста. Няпроста па цане: кошт формы можа даходзіць да дзясятка тысяч долараў ЗША ў эквіваленце. Такія інвестыцыі могуць уяўляць цікавасць толькі ў выпадку выпуску вялікіх партый прадукцыі. Няшмат, мякка кажучы, і гатовых узяцца за выкананне заказу на выраб той або іншай пластформы. Пры тым, што агульная канструктарская дакументацыя распрацоўваецца ўнутры кампаніі – не ўсе прадпрыемствы-машынабудаўнікі гатовы да супрацоўніцтва.
Адзін з вырабаў кампаніі, а гутарка аб арміраванай пластыкавай ручцы, заказчыкі хочуць бачыць не толькі трывалым і эрганамічным – ярка-бліскучым. Кажучы проста і зразумела – закамуфліраваным пад жоўты метал. За металізацыю таксама гатовы брацца не многія. У гэтым “Кампазітная кампанія” спадзяецца і імкнецца наладзіць супрацоўніцтва з адным буйным і вядомым сталічным заводам. Кропка ў перамовах пакуль не пастаўлена.
Не адкрыем Амерыкі, калі скажам, што канкурэнтным на рынку з’яўляецца тавар належнай якасці і па разумнай цане. З мэтай змяншэння сабекошту прадукцыі, чытай –
адпускной цаны, у якасці зыходнай сыравіны кампанія выкарыстоўвае так званы другасны пластык. Страціўшыя сваю першачарговую функцыю скрынкі, каністры, іншыя ёмістасці і не толькі здрабняюцца, у выпадку неабходнасці пластыкавы шрот сепарыруецца ад старонніх уключэнняў і становіцца гатовым для перапрацоўкі. У плане сказанага, ТАА “Кампазітная кампанія” выконвае яшчэ і санітарную ці хутчэй экалагічную функцыю. Даводзіцца практыкаваць пластычнасць падыходаў пры рабоце з другасным пластыкам. Каб набраць неабходнае, а вытворчая магутнасць прадпрыемства дасягае 5 тон сыравіны ў месяц, збіраць – дырэктарская цытата – “па ўсім свеце”.
Іменна восень з’яўляецца найбольш багатым для кампаніі перыядам года. У сэнсе загружанасці заказамі і, адпаведна, работай. Так што гэтымі кастрычніцкімі днямі работнікі кампаніі выхадных не ведаюць і, мяркую, не жадаюць. Працоўныя нарматывы і звышнарматывы, відавочны факт, трансфармуюцца ў заробленыя рублі.
Штат кампаніі складае дзясятак чалавек. Некаторыя скажуць – усяго, мне ж здаецца гаварыць “аж” будзе больш па сітуацыі. Фактычна з нічога матэрыялізаваць вытворчую тэму – дарагога варта.
Пры тым, што задавальняцца зробленым заснавальнікі не збіраюцца. Жывуць і працуюць у тым ліку і планамі выхаду на замежны рынак, пашырэннем вытворчасці і асваеннем новых накірункаў дзейнасці. Хто хоча, той даб’ецца.
Іван КАВАЛЕНКА.
Фота Сяргея ВАРАНОВІЧА.
Начальнік цэха Аляксандр Піваш.