Зялёная фатаграфія
Падведзены вынікі акцыі “Берагчы прыроду – значыць любіць Радзіму” – аднаго з мерапрыемстваў экалагічнага праекта па азеляненні і добраўпарадкаванні “Упрыгожым Беларусь кветкамі”, які яшчэ вясной аб’явіў рэспубліканскі цэнтр экалогіі і краязнаўства. Анастасія Русакевіч з Тухавіцкай СШ прыняла ўдзел ў акцыі і ў намінацыі “Зялёная фатаграфія: аб’екты прыроднай спадчыны” заняла ў вобласці трэцяе месца. Перамогу васьмікласніцы прынесла фота, якое яна зрабіла ў Дудутках, натхніўшыся навакольнымі краявідамі. З мамай, а па сумяшчальніцтве настаўніцай геаграфіі гэтай жа школы, назвалі работу “У царстве Берандзея”.Насця расказвае, што любіць фатаграфаваць усё прыгожае і незвычайнае. А потым здымкі дэманструе дома родным. Фатаграфіяй захапляецца і старэйшая сястра Таццяна. Яна, дарэчы, была нядаўна лепшай у абласным этапе экалагічнай акцыі ў намінацыі “Кармушка з другаснай сыравіны”. Зараз жа на конкурс кожная з дзяўчынак адправіла па некалькі фотаздымкаў, у лік пераможцаў трапіў толькі адзін.
Маці Людміла Аляксандраўна ўсяляк заахвочвае цікавасць дачок да краязнаўства і экалогіі. Разам адпраўляюцца і на экскурсіі, прагулкі, у паходы. Адзначае, што гэта дазваляе пашыраць кругагляд, атрымліваць новыя ўражанні і веды.
Наталля ПЕРАПЕЧКА.
Фота з сайта аддзела адукацыі, спорту і турызму Ляхавіцкага райвыканкама.
