Супрацьпажарная бяспека
Супрацоўнікі РАНС правялі планавую праверку работы бляшаначнага завода “Інтэрлак” на прадмет забеспячэння і захавання правілаў пажарнай бяспекі на прадпрыемстве. Інспектараў інспекцыі нагляду і прафілактыкі РАНС цікавіла, як адміністрацыя і персанал выконваюць закон Рэспублікі Беларусь “Аб пажарнай бяспецы”, тэхнічныя нарматыўныя прававыя акты сістэмы супрацьпажарнага нарміравання і стандартызацыі.
Устаноўлена, што на заводзе своечасова праводзяцца мерапрыемствы па прадухіленні ўтварэння гаручага асяроддзя і забяспечэнні пажарнай бяспекі. Сёлета на гэта было выдзелена каля 10000 рублёў. Дадаткова закуплены вогнетушыцелі і праведзена іх выпрабаванне, а таксама ўнутраных пажарных кранаў і рукавоў, пажарнага гідранта. Спецыялізаваная арганізацыя па дагаворы праводзіць тэхнічнае абслугоўванне сістэмы аўтаматычнага пажаратушэння і аўтаматычнай пажарнай сігналізацыі. На прадпрыемстве арганізавана работа пажарна-тэхнічнай камісіі і добраахвотнай дружыны, штогод ажыццяўляецца адпаведны ўнутрыведамасны кантроль, распрацаваны інструкцыі па пажарнай бяспецы на аб’ектах, загадам кіраўніка размеркаваны абавязкі і адказнасць за захаванне работнікамі правілаў пажарнай бяспекі .
Праверка паказала, што на бляшаначным заводзе “Інтэрлак” ведаюць і добра разумеюць, што пажар лягчэй папярэдзіць, чым яго тушыць.
Валерый РАВІНСКІ, галоўны дзяржаўны інспектар раёна па пажарным наглядзе.