Чакаюцца наваселлі ў Ляхавічах
Паўтара гады назад былы інтэрнат аграрнага каледжа па вуліцы Леніна, 56 у райцэнтры набыў другое жыццё: шчаслівыя навасельцы атрымалі запаветныя ключы ад арэндных кватэр. Цяпер кардынальныя змены чакаюць і суседні з ім будынак, на першым паверсе якога доўгі час кватаравалі гандлёвыя кропкі, а верхнія паверхі пуставалі. Сродкі на рэканструкцыю выдаткоўвае абласны бюджэт. Тэндар на правядзенне работ выйграла ААТ “Пінсксаўгасбуд”.Галоўны спецыяліст аддзела архітэктуры і будаўніцтва райвыканкама Алена Міклашэвіч расказвае, што па праекце ў 35-кватэрным арэндным доме будзе 14 аднапакаёвых, столькі ж двухпакаёвых і 7 трохпакаёвых кватэр, што папоўняць жыллёвы фонд раёна. Права на квадратныя метры будуць мець тыя, хто стаіць на ўліку маючых патрэбу ў паляпшэнні жыллёвых умоў. Такіх у нашым раёне крыху больш за тысячу чалавек.
У мінулым годзе на Ляхавіччыне было ўведзена ў эксплуатацыю 7675 квадратных метраў жылля, сёлета – больш за 4500.
Наталля ПЕРАПЕЧКА.
Фота Сяргея ВАРАНОВІЧА.
