Фізкультура – гэта цікава
У навасёлкаўскіх школьнікаў фізкультура бадай адзін з любімых прадметаў. Яны актыўныя ўдзельнікі не толькі раённых, але і абласных спаборніцтваў па розных відах спорту. Вось і ў мінулую суботу сталі лепшымі баскетбалістамі сярод зборных каманд устаноў адукацыі раёна. – Галоўнае ў спорце зацікавіць, захапіць і павесці за сабой. А яшчэ многа працаваць – тады вынік гарантаваны, – лічыць настаўнік фізічнай культуры і здароўя Навасёлкаўскай СШ Аляксей Наздрын. За больш чым 2 дзесяцігоддзі педагагічнай дзейнасці ён напрацаваў уласныя методыкі і прыёмы. Урокі Аляксея Рыгоравіча – не проста стандартны 45-мінутны занятак. Гэта сапраўдны майстар-клас, і не толькі па развіцці фізічных уменняў і вынослівасці. Ён не стамляецца настаўляць хлопчыкаў і дзяўчынак на актыўны лад жыцця, вучыць дасягаць пастаўленай мэты. Таму і выбіраюць многія з іх не камп’ютары і планшэты, а спартыўныя секцыі пад кіраўніцтвам таленавітага педагога.
Два гады запар навасёлкаўскія юныя спартсмены лідзіравалі ў спартакіядзе школьнікаў раёна. Усе гэтыя і іншыя дасягненні сталі падставай для занясення на раённую Галерэю славы партрэта Аляксея Наздрына.
Наталля ПЕРАПЕЧКА.
Фота Сяргея ВАРАНОВІЧА.
