За двума зайцамі

Дырэктар адной з устаноў незаконна прысвойвала фінансавыя сродкі па фіктыўным працоўным пагадненні за работу, якая  на справе не выконвалася. У другім выпадку былы кіраўнік сельгаспрадпрыемства, калі ўзначальваў гаспадарку, выкарыстоўваючы  свае  службовыя паўнамоцтвы, украў шасі прычэпа перасоўнай даільнай устаноўкі коштам больш за 250 базавых велічынь.

Па словах намесніка старшыні камісіі, началь-ніка юрыдычнага аддзела райвыканкама Дзіны Дуброўкі, перадумовы для карупцыйных злачынстваў ствараюць карупцыйныя правапарушэнні.  З пачатку гэтага года пракуратура выявіла парушэнні ў арганізацыі правядзення закупак тавараў,  работ і паслуг за кошт бюджэтных і ўласных сродкаў у КСУП “Ліпнянка” і райбальніцы.

Як і ў папярэднія гады, маюць месца факты, калі работніку, які адсутнічае на працоўным месцы, у табелі ўліку рабочага часу прастаўляюцца працоўныя гадзіны. Так, на працягу трох дзён у верасні мінулага года двое рабочых бульбасховішча райаграсэрвіса замест выканання сваіх непасрэдных прафесійных абавязкаў пасвілі кароў загадчыка бульбасховішча. А ў табелі ўліку рабочага часу ў гэтыя дні насупраць іх прозвішчаў стаяла па 12 адпрацаваных гадзін. У бухгалтэрыю райаграсэрвіса перададзены  нарады  для налічэння не толькі зарплаты, але і прэміі гэтым работнікам. Такім чынам,  загадчык бульбасховішча саставіў, падпісаў і перадаў у бухгалтэрыю заведама непраўдзівую  інфармацыю, тым самым учыніў правапарушэнне  (абзац 7 часткі 1 артыкула 20 Закона Рэспублікі Беларусь “Аб барацьбе з карупцыяй”), што стварае ўмовы для карупцыі. Вінаваты прыцягнуты да матэрыяльнай і дысцыплінарнай адказнасці.

Загадчыца МТФ СВК “Жарабковічы” сёлета  з 7 па 16 красавіка ставіла ў табелі па 7 адпрацаваных гадзін у дзень слесару-вартаўніку, хаця, на самай справе, у гэты перыяд ён знаходзіўся на лячэнні ў райбальніцы.

Выяўляліся факты, калі чалавек знаходзіўся за межамі краіны, а ў табелі пазначана, што ў гэты ж самы час ён быў на працоўным месцы.

Да дысцыплінарнай адказнасці  прыцягнуты і былы старшыня Жарабковіцкага сельвыканкама, які не правёў усе належныя працэдуры дзяржаўнай закупкі  пры заключэнні дагавора на выкананне работ па ўладкаванні пляцовак і ўстаноўцы кантэйнераў для збору смецця.

Як адзначыла Дзіна Дуброўка, часцей за ўсё ўмовы для карупцыі ствараюць наступныя права-парушэнні: умяшальніцтва службовай асобы ў дзейнасць дзяржорганаў ці арганізацый, калі гэта не ўваходзіць у кола яе паўнамоцтваў; выкарыстанне службовага становішча пры вырашэнні пытанняў, якія закранаюць яе асабістыя, групавыя і іншыя пазаслужбовыя інтарэсы; стварэнне перашкод фізічным ці юрыдычным асобам у рэалізацыі іх правоў і законных інтарэсаў; парушэнне ўстаноўленага заканадаўствам парадку правядзення конкурсаў, аўкцыёнаў, працэдур закупак і іншае.

Члены камісіі разам з запрошанымі на пасяджэнне старшынямі сельвыканкамаў абмеркавалі, як выключыць карупцыйную рызыку пры правядзенні дзяржзакупак.

Адным з пытанняў на парадку дня лістападаўскага пасяджэння камісіі па супрацьдзеянні карупцыі стала крэдыторская і дэбіторская запазычанасць некаторых прадпрыемстваў раёна.

Канкрэтным было патрабаванне Таццяны Кацуба да адказных асоб ААТ “Ляхавіцкі льнозавод” і КУМВП ЖКГ “Ляхавіцкая ЖКГ” прыняць вычарпальныя  меры для змяншэння, а ў далейшым недапушчэння росту  запазычанасці.

Галоўны спецыяліст аддзела арганізацыйна-кадравай работы райвыканкама Іна Косціна паведаміла, што  сёлета дзяржслужачыя і кіраўнікі прадпрыемстваў і арганізацый  падалі 106 дэкларацый аб даходах, атрыманых за мінулы год. Падчас выбарачнай праверкі ў кампетэнтныя органы былі адпраўлены запыты. Парушэнняў не выяўлена.

Разгледжаны шэраг іншых пытанняў, прыняты план работы  камісіі на    наступны год.