Здарэннi
Пагасцявалі
У адным з дамоў па вуліцы Камсамольскай у райцэнтры ляхавічанка выцягнула з чужога кашалька 350 тысяч рублёў.
Жыхар Рагачоў прыйшоў у госці да сваёй сястры тайна. Пасля такога “гасцявання” гаспадыня недалічылася грошай і трох бутэлек гарэлкі.
Чакала-чакала тухавічанка, пакуль аднавясковец верне ёй 300 тысяч пазычаных рублёў, так і не дачакалася — звярнулася за дапамогай у міліцыю.
Сварка з крымінальным ухілам
Не змяншаецца колькасць правапарушэнняў і злачынстваў на сямейна-бытавой глебе.
Узбуджана крымінальная справа ў адносінах 48-гадовага жыхара вёскі Гулічы, які падчас сваркі з жонкай ударыў яе нажом, з-за вялікай страты крыві жанчына памерла на месцы здарэння.
Гэтая вясковая трагедыя не паслужыла ўрокам для некаторых аматараў высвятляць адносіны і даказваць сваю праўду з дапамогай сілы. Мужчына з Заполля пагражаў забойствам сваёй старой маці, у Свяціцы малодшы брат душыў і спрабаваў стукнуць сякерай старэйшага брата. Давядзецца адказваць перад законам і ляхавічаніну, які не толькі пагражаў забойствам сваёй жонцы, але і на справе спрабаваў пазбавіць жанчыну жыцця.
“П’яныя” траўмы
З розніцай у некалькі дзён на лячэнне ў райбальніцу дастаўлены ляхавічанін і жыхар вёскі Нача. Аб’ядноўвае мужчын тое, што яны атрымалі цялесныя пашкоджанні, калі знаходзіліся ў стане алкагольнага ап’янення.
Трагедыя каля Вострава
30 жніўня трагедыя адбылася на палявой дарозе каля Вострава. 6-гадовы хлопчык з Туркменістана, які гасцяваў летам у бабулі, катаўся на веласіпедзе. Вадзіцель аўтамабіля “ЗІЛ” (жыхар Баранавіч) заўважыў дзіця вельмі позна…
Ад атрыманых траўмаў хлопчык памёр на месцы здарэння.
Праводзіцца следства.
Водна-бензінавы кактэйль
Узбуджана крымінальная справа ў адносінах неўстаноўленай асобы, якая сярод белага дня ў калодзеж каля аднаго з дамоў па вуліцы Зялёнай у вёсцы Петухоўшчына, выліла бензін, чым наўмысна забрудзіла пітную ваду.
Ліса бывае куслівай
Нязваны агрэсіўны госць з лесу з’явіўся днём у мінулую суботу ў вёсцы Падбарочча. У адзін з двароў забегла ліса, пакусала сабаку на прывязі і ўцякла. Як расказаў намеснік начальніка РАНС Уладзімір Радчанка, сабака пасля вакцынацыі супраць шаленства будзе знахо-дзіцца пэўны час пад наглядам ветэрынарнай службы. Жыхарам вёсак, якія знаходзяцца недалёка ад лесу, неабходна праяўляць пільнасць.
Са зводкамі РАУС і РАНС знаёмілася
Галіна ЗАРЭЧНАЯ