Педагог-псіхолаг цэнтра карэкцыйна-развіваючага навучання і рэабілітацыі Дар’я Жэрка з выхаванцамі цэнтра Мацвеем Маслоўскім, Каралінай Казловай, Дамінікай Жэрка.
Вельмі чакалі сустрэчы з Дзедам Марозам і Снягуркай выхаванцы Ляхавіцкага цэнтра карэкцыйна-развіваючага навучання і рэабілітацыі. Разам з бацькамі і выхавальнікамі развучвалі песні, вершы, прыдумвалі касцюмы. І вось у мінулы панядзелак уся ў бліскучым убранні святочная зала цэнтра гасцінна расчыніла дзверы і запрасіла рабят і дарослых на навагодні ранішнік ля ёлкі.
Казачныя персанажы ні на хвіліну не давалі хлопчыкам і дзяўчынкам сумаваць, весялілі іх гульнямі, песнямі, загадкамі, карагодамі, сюрпрызамі. І свяціліся радасцю вочы дзяцей ад кожнага чароўнага казачнага імгнення.
Навагодняе прадстаўленне падрыхтавалі для сваіх маленькіх землякоў педагогі цэнтра дадатковай адукацыі дзяцей і моладзі.
Не абышлося на свяце без самага галоўнага і доўгачаканага моманту: Дзед Мароз і Снягурка ўручылі рабятам навагоднія падарункі. Іх падрыхтавалі даўнія сябры ЦКРНіР: супрацоўнікі раённага аддзела Следчага камітэта, раённага аддзела ўнутраных спраў, Наталля Лойка і калектыў кафэ “Калі ласка”, калектывы цэнтра банкаўскіх паслуг Беларусбанка і гімназіі, прыхаджане Навасёлкаўскай царквы, райкам прафсаюза работнікаў адукацыі і навукі. Так нераўнадушныя землякі далучыліся да рэспубліканскай дабрачыннай акцыі “Нашы дзеці”, якая крочыць па краіне.
– Шчасце – бачыць радасць у дзіцячых вачах. І яшчэ невядома, каму больш патрэбны такія акцыі: хлопчыкам і дзяўчынкам ці нам, дарослым. Рабіць дабро надзвычай прыемна. Вось ужо тры гады мы на святы спяшаемся да нашых маленькіх сяброў з добрым настроем і абавязкова з падарункамі. Акрамя іншага, прынеслі рабятам скрынку жаданняў – магчыма, нейкія іх мары спраўдзяцца ўжо сёлета, – расказвае начальнік Ляхавіцкага РАСК Віталій Лабанаў.
Навагодні ранішнік, апошнім часам, не адзіны цуд для гэтых хлопчыкаў і дзяўчынак. 21 снежня пяцёра выхаванцаў ЦКРНіР сталі ўдзельнікамі чароўнага дзейства – дабрачыннага навагодняга свята, якое ладзілася ў абласным цэнтры маладзёжнай творчасці і сабрала з усёй Брэстчыны больш за 250 дзяцей з асаблівасцямі псіхафізічнага развіцця. Кожны з іх вярнуўся дамоў з добрым настроем і падарункамі. А таленавітая юная ляхавічанка Крысціна Ракашэвіч – пераможца раённай і ўдзельніца абласной выставы дэкаратыўна-прыкладной творчасці – атрымала яшчэ і ноўтбук. Дарэчы, Крысціне дапамагла падрыхтавацца да выставы выхавальнік ЦКРНіР Наталля Русакевіч.
Чацвёрты год запар народная эстрадная студыя “Экспрэс” праводзіць калядныя дабрачынныя канцэрты. 25 снежня ў ГДК быў аншлаг – усе білеты раскуплены. Поўная зала прыхільнікаў творчасці “Экспрэса”, што сабраліся на дабрачынны канцэрт “Ад сэрца да сэрца!”, таксама паўдзельнічала ў акцыі “Нашы дзеці”: 600 рублёў, сабраных за продаж білетаў, пералічаны на рахунак ЦКРНіР.
Галіна КАНЬКО.
Фота Сяргея ВАРАНОВІЧА.
