Людзі з вялікім сэрцам
Валанцёр – гэта той, хто робіць жыццё іншых лепшым і цікавейшым бескарысліва – не просіць нічога ўзамен. Валанцёр – чалавек з вялікім сэрцам і шчырай душой, не дзеля славы і матэрыяльных даброт імкнецца зрабіць як мага больш карысных спраў. Яшчэ некалькі дзесяцігоддзяў таму слова “валанцёр” было ня-звыклым і незразумелым. А сёння сусветны добраахвотніцкі рух аб’ядноўвае ў сваіх радах усё больш людзей. Прыемна, што ён існуе і на Ляхавіччыне, у тым ліку ў гімназіі. Каля 30 хлопчыкаў і дзяўчынак аб’яднаны ў гімназічны атрад валанцёраў, сярод яго ўдзельнікаў 11-класніцы Вольга Войцік і Марыя Пішч.
— Чаму вы вырашылі стаць валанцёрамі?
Марыя:
— Аднойчы ў гімназіі выступала старшыня Ляхавіцкай раённай арганізацыі таварыства Чырвонага Крыжа Жанна Лешык. Яна расказвала пра валанцёрскі рух, пра яго значнасць і неабходнасць. Мяне і маіх сяброў гэта вельмі зацікавіла, таму мы вырашылі стаць валанцёрамі.
— Якімі справамі вы займаецеся?
Вольга:
— Наша дзейнасць у асноўным накіравана на дапамогу дзецям-інвалідам. Ездзілі з гульнёвай праграмай і падарункамі ў Баранавіцкі дзіцячы прытулак. Праводзілі акцыю “Міласэрнасць – наша пакаянне”, збіралі грошы на экскурсію для дзяцей-інвалідаў і для набыцця цацак для рабят з неўладкаваных сем’яў.
— Працаваць з людзьмі з асаблівасцямі псіха-фізічнага развіцця складана. Абавязкова трэба знайсці правільны падыход да кожнага. Як гэта ў вас атрымліваецца?
Марыя:
— Лічу, што самае галоўнае – ні ў якім разе не паказваць такім дзецям свайго жалю, а размаўляць з імі на роўных. Дзеці-інваліды амаль нічым не адрозніваюцца ад астатніх равеснікаў і маюць права на шчасце, радасць, любоў і разуменне.
— Што змянілася ў вашым жыцці пасля таго, як сталі валанцёрамі?
Марыя:
— Узнікла ўсведамленне таго, што мы патрэбны іншым. Спадзяюся, што наша з рабятамі дапамога прынясе шмат карысці, у тым ліку і нам самім, бо, як сказана ў Бібліі, “шчаслівыя міласэрныя – таму, што яны атрымаюць міласэрнасць”. Міласэрнасць засцерагае душу ад ачарсцвення, дапамагае заўжды заставацца чалавекам.
Гутарыла Ганна РАГАЎЦОВА,
выпускніца гімназіі