Мы з табой адной крыві

У мінулы чацвер многія нашы землякі  прыйшлі  ў райбальніцу не за меддапамогай, а для бязвыплатнай здачы крыві.  Работнікі  сістэмы адукацыі і аховы здароўя, жыллёва-камунальнай службы, выратавальнікі далучыліся  да акцыі ”Бязвыплатнае донарства пачынаецца з мяне”. Наогул, з пачатку снежня  ў ёй прынялі ўдзел 36 жыхароў раёна.

Па інфармацыі Брэсцкага абласнога цэнтра гігіены, эпідэміялогіі і грамадскага здароўя, падчас акцыі агульная колькасць добраахвотных данацый склала 1276, а за ўвесь 2016 год – 3865 ці 13,6 працэнта ад агульнай колькасці кроваздач (для параўнання: у 2015 годзе толькі 7,5 працэнта). Сэканомленыя бюджэтныя грошы дазволяць, напрыклад,  закупіць сучаснае медыцынскае абсталяванне, вырашыць  іншыя медпатрэбы.

Для атрымання нагруднага  знака  Міністэрства аховы здароўя “Ганаровы донар Рэспублікі Беларусь”  неабходна здаць кроў не менш за 40  разоў, не менш за 80 разоў –лейкацытаў, трамбацытаў, на бязвыплатнай аснове гэта норма змяншаецца ўдвая. Званне дае дадатковыя льготы да пенсіі, у тым ліку і матэрыяльныя.

Наталля ПЕРАПЕЧКА.

Фота аўтара.