Ад нашага стала – вашаму. Прапанова ад Ляхавіцкага кансервавага запатрабавана не толькі ў раёне /фота/
Прадукцыя ААТ “Ляхавіцкі кансервавы завод” добра вядома спажыўцам: закатаныя ў слоікі стравы з агародніны, садавіны, зяленіва славяцца якасцю, натуральнасцю і дамашнім смакам. Нямала яе прыхільнікаў і за межамі нашага раёна, вобласці, краіны.
Некалькі дзесяцігоддзяў назад ляхавіцкія кансервы пастаўляліся ў розныя рэспублікі былога СССР у вельмі значных аб’ёмах, пазней у суверэнныя краіны.
– Далёкі Усход, Казахстан, Туркменія, многія вобласці Расіі… Ляхавіцкія салаты, першыя стравы, павідла, варэнне, сокі ішлі ў паўсотні рэгіёнаў. На экспарт адпраўлялі да 70 працэнтаў нашай прадукцыі, – з гонарам і ў той жа час ноткай суму прыгадвае Леанід Лейчанка, які ўзначальвае завод ужо 37 гадоў. Сёння геаграфія экспартных паставак больш сціплая, і гэтаму ёсць тлумачэнне: ва ўсіх краінах-суседках актыўна развіваецца ўласная кансервавая вытворчасць. Але ўнутраны рынак без прадукцыі ляхавіцкай вытворчасці ўявіць немагчыма.
Менавіта завадчан – тых, хто працуе ў цэхах, на падсобнай гаспадарцы, у адміністрацыі завода – іншымі словамі, калектыў называе Леанід Паўлавіч галоўным здабыткам прадпрыемства, дзякуючы якому Ляхавіцкі кансервавы ёсць. Справа ў тым, што з 13 кансервавых прадпрыемстваў Брэстчыны цяпер засталося 3, сярод якіх і наша. У той час, калі іншыя закрываліся, не вытрымаўшы новых умоў гаспадарання, на мясцовым заводзе пралічвалі і прадумвалі кожны наступны крок. Напрыклад, куплялі абсталяванне з прадпрыемстваў, якія ліквідаваліся. Адрамантаванае і абноўленае, яно ўстанаўлівалася ў цэхах і яшчэ доўгі час выконвала сваю задачу.
Захаваны і калектыў, не дапушчана скарачэння кадраў, своечасова выплачваецца заработная плата (летась на прадпрыемстве яна ў сярэднім склала 694 рублі). Завод плаціць падаткі, гасіць крэдыты, разлічваецца за энерганосьбіты і г.д. І, бадай, галоўны аргумент на карысць паспяховасці – адкрытае акцыянернае таварыства “Ляхавіцкі кансервавы завод” было і застаецца прыбытковым. А прадукцыя, якая сыходзіць з канвеера, па-ранейшаму папулярная, запатрабаваная. Сярод галоўных спажыўцоў – вайсковыя часці, установы адукацыі і аховы здароўя, іншыя структуры.
У сярэднім за год выпускаецца і рэалізуецца больш за 20 мільёнаў умоўных слоікаў разнастайных кансерваў. Вінегрэт, салаты “Навінка”, “Брэсцкі”, “Нёманскі”, марынаваныя агуркі “Купалаўскія”, “Сталічныя”, нектары, сокі звычайныя і купажыраваныя, супы, гарніры… – у асартыменце – каля сотні найменняў прадукцыі.
Начальнік лабараторыі Соф’я Болтуць раскрывае сакрэт папулярнасці ляхавіцкіх кансерваў:
– Якасць, смак, цана. Прымальны апошні паказчык стаў магчымы ў тым ліку дзякуючы таму, што пераважная большасць агародніны і зяленіва для вытворчасці вырошчваецца ў сваёй падсобнай гаспадарцы, што, канешне, станоўча адбіваецца на сабекошце прадукцыі. Агародніна і зяленіва з падсобнай гаспадаркі паступаюць прама ў цэх ці складзіруюцца, каб зімой і ранняй вясной вытворчасць была забяспечана сыравінай. Мы беражліва захоўваем найбольш папулярныя рэцэпты і распрацоўваем новыя, у якіх максімальна захоўваюцца вітаміны. Усё гэта дазваляе выпускаць канкурэнтаздольную прадукцыю.
Нават немагчыма цяпер уявіць вуліцу Дзесюкевіча без кансервавага завода. А ў сярэдзіне сямідзясятых гадоў ХХ стагоддзя планавалася перанесці прадпрыемства за рысу горада, бо надта ж дымела чорнымі клубамі. Дзякуючы мадэрнізацыі, удалося захаваць старэйшае прадпрыемства раёна на першапачатковым месцы. Леанід Лейчанка, які ўзначаліў кансервавы ў 1979 годзе, паставіў перад сабой задачу ўдыхнуць у завод другое жыццё. І гэта пры падтрымцы калектыву атрымалася.
За без малога сямідзесяцігадовую біяграфію Ляхавіцкі кансервавы і яго працаўнікі атрымалі не адзін дзясятак узнагарод, за кожнай з іх добрасумленная, адказная праца кожнага на сваім месцы.
– Амаль 32 гады я на кансервавым заводзе, 26 з іх – на пасадзе галоўнага бухгалтара. Многае змянілася за мінулыя дзесяцігоддзі: выраслі аб’ёмы вытворчасці, заработная плата, удасканалілася тэхналогія. На змену ручной працы прыйшла механізацыя амаль на ўсіх участках. Напрыканцы 2009 года запусцілі новы
цэх па выпуску садавінна- агароднінных кансерваў, а праз год – адрэкан-струяваны цэх па вытвор-часці сокаў. Калі бачу на паліцах магазінаў нашу прадукцыю, адчуваю радасць і задаволенасць, –
расказвае галоўны бухгалтар прадпрыемства Ала Жагунь.
Пасля заканчэння тэхналагічнага інстытута ў Святланы Зязюлі былі два адрасы для размеркавання: Растоў-на-Доне і Ляхавічы. Выбрала наш райцэнтр. Спачатку працавала падлікоўцам шклотары – іншых вакантных пасад не было. З абавязкамі спраўлялася добра, і кар’ера паступова пайшла ўверх: хімік, майстар, працяглы час была галоўным інжынерам. Цяпер Святлана Адамаўна – намеснік дырэктара прадпрыемства па камерцыйных пытаннях:
– Наш галоўны козыр – натуральнасць, адсутнасць хімічных дабавак і даволі прымальны кошт прадукцыі.
У цэхах, на падсобнай гаспадарцы, у кабінетах, за рулём аўтамабіляў працавалі і працуюць ветэраны завода: падрыхтоўшчыкі сыравіны Наталля Буйкевіч, Данута Лапіч, Іна Панцялеева, укладчыкі-ўпакоўшчыкі Валянціна Кузьміцкая, Віктар Жабік, апаратчык стэрылізацыі Антаніна Мельнікава, варшчыца Марыя Кулак, майстар цэха Зоя Скіндзер, начальнік аўтатранспартнага ўчастка Мікалай Богдан, бухгалтар па зарплаце Галіна Янкоўская. Упоравень з імі шчыруе моладзь.
– Удзячны лёсу, што атрымаў магчымасць працаваць на такім прадпрыемстве і з такімі людзьмі. Сёння ў калектыве 136 чалавек. Наша вытворчасць – высокатэхналагічны працэс, патрабуюцца веданне і навыкі працы на новым абсталяванні, высокая кваліфікацыя і строгая дысцыпліна. Паўтару: галоўная ўмова поспеху – людзі. А яны на кансервавым з добрай працоўнай загартоўкай, – гаворыць Леанід Лейчанка.
Галіна КАНЬКО.
Фота Сяргея ВАРАНОВІЧА.