Прадметная размова на англійскую тэму
Педагог не толькі па прафесіі, але і па прызванні – так можна ахарактарызаваць жыццярадасную і актыўную Вольгу Ланкуць. Другі год яна выкладае замежную мову ў СШ № 2. Умее запаліць агеньчык цікавасці ў вучняў і падтрымліваць яго ўвесь час. На настаўніцкім стале артыкулы з англамоўных газет, часопісаў, мастацкая літаратура на замежнай мове. Усё гэта для яе 5-9-класнікаў.
– У падручніках выкладаецца так званая літаратурная англійская мова, размоўная ж – больш жывая, непасрэдная. Таму і разбаўляю ўрокі разнастайнымі жыццёвымі гісторыямі, творамі вядомых аўтараў, з дапамогай якіх вывучаем граматыку. І тады нават самыя складаныя правілы становяцца зразумелымі і выдатна запамінаюцца. Хачу, каб рабяты свабодна валодалі замежнай мовай, не адчувалі цяжкасцяў у зносінах, – расказвае Вольга Аляксееўна і дадае, што ёй пашанцавала з калегамі: падказваюць і накіроўваюць, дапамагаюць і вераць у яе.
Улічваючы інтарэс сучасных дзяцей да камп’ютарных тэхналогій, настаўніца падтрымлівае цікавасць да свайго прадмета і праз сацыяльныя сеткі, у інтэрнэце змяшчае заданні для школьнікаў, выходзіць на ўроку на анлайн сувязь з носьбітамі мовы, выкарыстоўвае інтэрактыўную дошку. Вольга Ланкуць лічыць, што настаўнік павінен знаходзіцца на адной хвалі з вучнямі, быць для іх сябрам.
Малады педагог толькі ў пачатку працоўнага шляху, але ўжо мае падставы для гонару. У мінулым навучальным годзе заняла ў вобласці другое месца ў конкурсе “Мультымедыйны ўрок у адукацыйным працэсе”, у раёне – першае, нядаўна атрымала кваліфікацыйную катэгорыю.
… Хлопчыкі і дзяўчынкі са сцэны натхнёна дэкламуюць твор – ідзе рэпетыцыя гуртка “Я – акцёр”, якім кіруе Вольга Аляксееўна. Тэатральнае дзейства разгортваецца на англійскай мове, касцюмы падрыхтавалі самі. Так, прымяраючы ролі, адшукваючы цікавыя факты, аналізуючы і чытаючы кнігі, рабяты вучаць мову Уільяма Шэкспіра і Джэка Лондана.
Наталля ПЕРАПЕЧКА.
Фота Сяргея ВАРАНОВІЧА.