Рэзервы патрабуюць рэалізацыі. У Ляхавіцкім раёне падведзены вынікі работы жывёлагадоўчай галіны за мінулы год
Прааналізаваць, зрабіць высновы, выявіць рэзервы і шляхі вырашэння праблемных пытанняў – такія агульныя задачы перад кіраўнікамі і спецыялістамі сельгаспрадпрыемстваў , райсельгасхарчу паставіў старшыня райвыканкама Вячаслаў Сельмановіч на нарадзе па падвядзенні вынікаў работы жывёлагадоўчай галіны раёна за 2016 год.
Раслінаводства і жывёлагадоўля непарыўна звязаны паміж сабой. Леташні недабор збожжа, рапсу, ільновалакна, бульбы адмоўна паўплываў на тэмпы росту аб’ёмаў усёй валавай сельгаспрадукцыі (заданне ў раёне выканалі толькі КСУП“Ліпнянка” і “Востраў-Агра”).
Нягледзячы на тое, што кармы дабываліся з цяжкасцю, паліва дарагое, у некаторых гаспадарках не надта клапоцяцца пра захаванасць назапашанага. Траншэі не ўкрываюцца належным чынам, сілас ляжыць уперамешку са снегам, кармушкі своечасова не вычышчаюцца. У гэтым плане з лепшага боку адзначаны “Востраў-Агра”: яшчэ летам тут паклапаціліся пра зімоўку жывёлы, выдатна падрыхтавалі траншэі для захоўвання кармоў. Адпаведна ўзраслі і паказчыкі па надоях.
Намеснік начальніка райсельгасхарчу Ірына Страмавус падкрэсліла, што асноўная частка выручкі (больш за 60 працэнтаў) паступае ў гаспадаркі ад рэалізацыі прадукцыі жывёлагадоўлі, таму першачарговая роля павінна надавацца развіццю менавіта гэтай галіны. На парадку дня па-ранейшаму павелічэнне пагалоўя буйной рагатай жывёлы. Аднак, у раёне за мінулы год па гэтым паказчыку мінус, яго дапусцілі ААТ “Жарабковічы”, “Шлях новы”, “Ляхавіцкі райаграсэрвіс”, СТАА “Біфкам”.
Нягледзячы на пэўныя зрухі, актуальным застаецца і павелічэнне аб’ёмаў вытворчасці малака. Хаця ў цэлым сітуацыя з надоямі стабільная – 108,1 працэнта ў параўнанні з 2015 годам (зніжэнне дапушчана толькі ў райаграсэрвісе).
У якасці станоўчага прыкладу работы ў малочнай галіне старшыня райвыканкама назваў ЗАТ “Белпрампрыбор”. Сельгаспрадпрыемства не мае ў арсенале сучасных фермаў з даільнымі заламі, але гэта не перашкодзіла летась валавы надой малака давесці да 123 працэнтаў да ўзроўню 2015 года. Кожная рагуля дала 7704 кілаграмы — на 1370 больш,чым пазалетась. Больш за 96 працэнтаў з надоенай 3651 тоны рэалізавана гатункам экстра. У гаспадарцы створаны двухгадовы запас кармоў. Бясспрэчна, ёсць над чым працаваць, у першую чаргу, над аднаўленнем статка і ўтрыманнем маладняку.
Салідна выглядаюць гадавыя прыбаўкі ў “Ліпнянцы” – плюс 743 кілаграмы ад кожнай рагулі і “Тальмінавічах” (плюс 692).
Узмацненне тэхналагічнай дысцыпліны і адказнасці кожнага за свой участак работы, падбор кадраў, строгі кантроль, па словах Вячаслава Сельмановіча, паспрыялі паляпшэнню сітуацыі ў “Ліпнянцы”. І, напрыклад, у “Востраве-Агра”, дзе надой за год на адну карову вырас на 474 кілаграмы – да 3514. Для параўнання: у райаграсэрвісе ён знізіўся на 848 кілаграмаў і складае 2972. Асноўная прычына такога зніжэння – незбалансаваны рацыён кармлення.
Раённая група ў складзе спецыялістаў райсельгасхарчу, ветэрынарнай службы, малочнага завода кантралюе захаванне тэхналагічных рэгламентаў вытворчасці і рэалізацыі малака. Пэўныя станоўчыя вынікі ўжо ёсць. Летась на малочны завод прададзена на 454 тоны малака больш, чым годам раней, у тым ліку гатункам экстра і вышэйшым 81 працэнт. З даведзеным заданнем па рэалізацыі малака гэтых гатункаў справіліся СВК ”Ляхавіцкі”, ЗАТ “Белпрампрыбор”, аграрны каледж, ДП “Нача” і КСУП “Востраў-Агра”. Першым гатункам сельгаспрадпрыемствы раёна рэалізавалі 18,9 працэнта малака: найбольш “Ліпнянка”, “Біфкам”, “Тальмінавічы”. Па словах Ірыны Страмавус, такая сітуацыя тлумачыцца недастатковым набыццём ветэрынарных прэпаратаў. Як следства – саматычныя клеткі ў малацэ ад хворых кароў.
Далейшае дынамічнае развіццё малочнай жывёлагадоўлі і павышэнне прадукцыйнасці дойнага статка ў многім залежыць ад таго, як захоўваюцца тэхналогіі кармлення і ўтрымання кароў і цялушак.
Летась у гаспадарках раёна атрымана 11083 цяляці, на 91 больш, чым у 2015 годзе. У “Белпрампрыборы” ад 100 кароў атрымана 98 цялят (на 10 больш, чым пазалетась), “Востраў-Агра” – 76 (плюс 12), “Ляхавіцкім” – 91 (плюс 2). У той жа час у “Біфкаме” колькасць цялят на 100 кароў – 40, “Шляху новым” – 66. Найбольшае зніжэнне дапушчана ў “Тальмінавічах” (мінус 111 галоў).
Дарэчы, лічбы можна разглядаць пад розным ракурсам. Напрыклад, сярэднясутачныя прывагі буйной рагатай жывёлы летась у “Ліпнянцы” склалі 421 грам. З аднаго боку – самыя нізкія ў раёне (для параўнання, у “Ляхавіцкім” – 770 грамаў), з другога – на 80 грамаў больш, чым у 2015годзе, а гэты плюс – самы важкі ў раёне.
– Там недаатрымана, там недадоена, нізкія тлустасць, таварнасць, якасць малака, перарасход кармоў і ў выніку губляюцца грошы. Некаторыя ўмудраюцца страціць выручку там, дзе патрабуецца мінімальнае фінансаванне. Іншы раз дастаткова было проста навесці элементарны парадак, – зазначыў Вячаслаў Сельмановіч.
З-за невыканання даведзенага задання па таварнасці малака гаспадаркі раёна недаатрымалі 29,9 тысячы рублёў выручкі, ад рэалізацыі малака нізкай якасці – 4,84 тысячы, ад зніжэння прадукцыйнасці – 448,9 тысячы, нізкай тлустасці – 9,4 тысячы. Калі б уся недаатрыманая сума аказалася на рахунку сельгаспрадпрыемстваў, гэта дазволіла б павялічыць мясцовым аграрыям зарплату.
Кіраўнікам і спецыялістам гаспадарак указана на праблемы, якія неабходна вырашаць, прычым неадкладна. Час абяцанак, як зазначыў кіраўнік раёна, прайшоў: пара рэальна выпраўляць памылкі і несці адказнасць за іх дапушчэнне.
Галіна КАНЬКО.
Фота Сяргея ВАРАНОВІЧА.