Дэкрэт, правы і абавязкі

Па стане на 22 лютага, збор на фінансаванне дзяржрасходаў выплацілі больш за 54 тысячы грамадзян, у бюджэт паступіла Br16,3 мільёна. Пры гэтым значная колькасць грамадзян звярнулася ў мясцовыя органы ўлады з заявамі аб вызваленні ад выплаты збору.

У Міністэрстве па падатках і зборах удакладнілі, што грамадзяне прадаўжаюць прадстаўляць даныя, у тым ліку праз інтэрнэт, што яны не з’яўляюцца плацельшчыкамі збору. МПЗ будзе разглядаць гэтыя даныя і прымаць рашэнне аб магчымым вызваленні ад выплаты збору.

З улікам вялікай колькасці зваротаў грамадзян па пытаннях рэалізацыі нормаў Дэкрэта № 3 праводзяцца выязныя прыёмы кіраўніцтвам Адміністрацыі Прэзідэнта, памочнікамі Прэзідэнта –  галоўнымі інспектарамі ў рэгіёнах і начальнікамі асноўных структурных падраздзяленняў Адміністрацыі ў рай- і гарвыканкамах, адміністрацыях раёнаў у гарадах.

Памочнік Прэзідэнта – галоўны інспектар па Брэсцкай вобласці Васілій Герасімаў правёў у абласным выканаўчым камітэце прыём грамадзян па пытаннях рэалізацыі нормаў Дэкрэта №3. На прыём звярнуліся каля чатырох дзясяткаў грамадзян, усе атрымалі растлумачэнні па сваіх пытаннях.

У раёнах працягваюць работу камісіі па разглядзе заяў грамадзян па пытаннях рэалізацыі Дэкрэта № 3.

Нагадваем, што ў грамадзян ёсць права звярнуцца ў райвыканкам з заявай аб вызваленні ад выплаты збору ў сувязі са знаходжаннем у цяжкай жыццёвай сітуацыі. Звяртацца неабходна ў фінансавы аддзел райвыканкама (кабінет № 320).