“Ліпнянка” ўсур’ёз настроена на пазітыў
Апошнім часам сённяшняе КСУП “Ліпнянка” мяняла не толькі назву, але і кіраўнікоў. Што на працягу некалькіх гадоў заставалася пастаянным, дык гэта сумнае лідарства са знакам мінус: і ў раслінаводчых, і ў жывёлаводчых раённых зводках сельгаспрадпрыемства было на апошніх месцах у “турнірных” табліцах аграрнай вытворчасці. Дысцыпліна на працоўных месцах кульгала, грошай часцяком не хапала на выплату зарплаты, кадры разбягаліся, вытворчыя паказчыкі падалі.
Раённая ўлада не пакідала “Ліпнянку” сам-насам з праблемамі: гаспадарцы аказвалася дзяржаўная падтрымка, яна мела датацыі, магчымасць набываць тэхніку ў лізінг.
З сакавіка мінулага года ў “Ліпнянцы” новы кіраўнік: Станіслаў Берташ вырашыў зрабіць стаўку на ўзмацненне дысцыпліны і на тэхналагічнасць вытворчасці. Канешне, ніхто не чакаў, што справы адразу пойдуць угору і праблемы вырашацца самі сабою. Але ўсё ж станоўчыя перамены ўжо відавочныя. Гэта адзначыў старшыня раённага Савета дэпутатаў Яўгеній Юрлевіч на справаздачным сходзе ў КСУП “Ліпнянка”, які адбыўся напрыканцы мінулага тыдня.
Кіраўнік дэпутацкага корпуса падкрэсліў, што летась у сельгаспрадпрыемстве рост валавой прадукцыі склаў 110,8 працэнта (у параўнанні з 2015 годам). Валавы надой малака (7 працэнтаў росту да пазалеташняга) – істотнае дасягненне для гаспадаркі. Важка выглядае і гадавая прыбаўка ў надоях ад кожнай каровы – плюс 743 кілаграмы (другі вынік у раёне). Фермы, як і людзі, што тут працуюць, засталіся ранейшымі. А станоўчыя змяненні сталі магчымымі менавіта дзякуючы ўзмацненню дысцыпліны. Павысілася персанальная адказнасць за справу – ад аператараў машыннага даення, даглядчыкаў да кіраўніцтва.
Менш аптымістычная карціна з выручкай, яна на 20 працэнтаў меншая. Паўплывала недастаткова высокая якасць малака і кармоў. Яўгеній Юрлевіч падкрэсліў: дабрабыт, зарплата кожнага працаўніка “Ліпнянкі” залежыць ад эканамічнага становішча сельгаспрадпрыемства. Таму трэба развіваць вытворчасць, клапаціцца пра якасць прадукцыі, рэнтабельнасць, працягваць пачатае ўдасканаленне.
На тым, якім быў год папярэдні і якія задачы ставяцца сёлета, акцэнтаваў увагу кіраўнік КСУП Станіслаў Берташ. Разам з відавочным салідным плюсам ў надоях якасць малака пакідае жадаць лепшага: 95 працэнтаў сыравіны рэалізавана на малочны завод першым гатункам. А гэта недаатрыманыя 100 тысяч рублёў. Нескладана падлічыць, наколькі б вырасла зарплата тутэйшых работнікаў, калі б замест першага гатунка быў вышэйшы ці экстра – больш за 30 працэнтаў. Але бясспрэчны плюс у тым, што ў “Ліпнянцы” працягваюць работу над памылкамі. Сітуацыя не пушчана на самацёк, тут актыўна спрабуюць змяніць яе ў лепшы бок. Не хапае сваіх спецыялістаў – звярнуліся за дапамогай у раённую ветэрынарную службу, якая паспрыяла з навядзеннем парадку ў ветэрынарным абслугоўванні статка. І, напрыклад, летась у чэрвені сельгаспрадпрыемства адправіла на перапрацоўку 30 працэнтаў малака вышэйшым гатункам.
Пакрысе пайшлі ў рост і сярэднесутачныя прывагі БРЖ – на 80 грамаў яны летась большыя, чым у 2015 годзе. Павялічылася і колькасць выхаду цялят на 100 кароў, але змінусавалі па штучным асемяненні цёлак.
– Нарыхтавалі кармоў, накармілі, падлячылі жывёлу. Але яшчэ многія праблемныя пытанні не вырашылі. І калі не будзе зацікаўленасці кожнага ў выніку працы на сваім, канкрэтным участку, захавання тэхналогіі вытворчасці, выканання ўсіх санітарных нормаў і правілаў, як дабіцца павышэння якасці малака?—задаў рытарычнае пытанне кіраўнік “Ліпнянкі”. Названая ўмова аднолькава адносіцца і да развіцця раслінаводства. Ураджайнасць зерневых у мінулым годзе склала 24,8 цэнтнера з гектара – 103 працэнты да жніва-2015. Стараліся механізатары (створаны мехатрад) і на нарыхтоўцы кармоў (назапашана 5900 тон сенажу, каля 4000 тон сіласу, 430 тон сена): і для свайго статка, і іншым гаспадаркам дапамаглі. На 20 працэнтаў былі павялічаны плошчы для вырошчвання шматгадовых траў.
Камбайнер Аляксандр Дыдышка па выніках касавіцы заняў трэцяе месца ў раённым спаборніцтве на нарыхтоўцы травяністых кармоў. Справіліся з пастаўленай задачай механізатары Васілій Гачко, Іван Буйкевіч, Аляксей Занько, Канстанцін Малевіч, вадзіцель на адвозцы зялёнай масы Валянцін Гатоўчыц. Сянажныя траншэі трамбаваў на “Амкадоры” Віктар Гачко. Вынік: 27 цэнтнераў кармавых адзінак на ўмоўную галаву жывёлы.
Паспрыяла і дзяржаўная падтрымка. Забяспечанасць мінеральнымі ўдабрэннямі, гаруча-змазачнымі матэрыяламі, запчасткамі, выдзяленне сродкаў на тэхабслугоўванне машынна-трактарнага парку – няпоўны пералік уліванняў у “Ліпнянку” з бюджэту.
Станіслаў Берташ паставіў перад работнікамі сельгаспрадпрыемства канкрэтныя задачы. Што датычыцца канкрэтыкі, то гэта – 4000 кілаграмаў малака ад каровы, не менш за 550 грамаў прываг маладняку БРЖ, выхад 90 цялят на 100 кароў, павелічэнне пагалоўя БРЖ з 1376 да 1550 галоў, стварыць паўтарагадовы запас якасных кармоў, для чаго работа механізатараў будзе арганізавана ў 2 змены. Ну, і якасць прадукцыі – на парадку дня.
Пра надзённае гаварылі на сходзе спецыялісты гаспадаркі, жывёлаводы, механізатары. Відавочна: “Ліпнянка” настроена на пазітыў.
Галіна КАНЬКО.