Ветэранскае сугучча. Ляхавіцкая раённая арганізацыя адзначыла 30-годдзе

Старшыня раённага Савета дэпутатаў Яўгеній Юрлевіч ад імя мясцовай улады  павіншаваў ветэранаў і  ўручыў Падзячныя  пісьмы райвыканкама і райсавета  актывістам ветэранскага руху.

Цёпла вітаў калег, гаварыў пра гісторыю станаўлення арганізацыі, пра безліч ідэй і тое, што наперадзе шмат спраў, у цэнтры якіх – пажылы чалавек, старшыня раённага савета ветэранаў Мікалай Юруць.

Быць ва ўзросце – не толькі  звацца дзядулем і бабуляй. Гэта значыць мець вопыт і падзяліцца ім з маладымі, знайсці цікавы занятак і авалодаць яго сакрэтамі, паспытаць сябе ў творчасці, быць цікавым для іншых.

Шмат гадоў узначальвае пярвічку  начаўскіх ветэранаў Міхаіл Варановіч. Часта сустракаецца з мясцовымі школьнікамі. Пад уплывам такіх сустрэч   многія з рабят  па-новаму  адкрываюць для сябе малую радзіму, яе сённяшні дзень і гісторыю. Напрыклад, не ўсе ведалі, што памятнік перад Начаўскім СДК   выкананы  па праекце  Мікалая Якавенкі і сімвалізуе працоўны подзвіг людзей, якія заваявалі Перамогу і  аднавілі народную гаспадарку. Скульптура з’явілася,  дзякуючы племзаводу “Нача”. Каб  зберагчы  памяць пра герояў,  па крупінках збіралі звесткі пра іх подзвіг, аднаўлялі прозвішчы загінуўшых  землякоў.

На юбілейнай урачыстасці  агучана радасная вестка: Міхаілу Лявонцьевічу за актыўную шматгадовую плённую работу ў  ветэранскай арганізацыі і ўдзел у патрыятычным выхаванні моладзі ўручана пасведчанне “Ганаровага ветэрана” Беларускага грамадскага аб’яднання  ветэранаў.

Гутарыць з цікавымі і нераў-надушнымі землякамі  – адно задавальненне. Марыя Тамашэўская амаль 10 гадоў была дырэктарам кінатэатра “Кастрычнік”. Узгадвае, як у 80-ыя людзі любілі кіно і ішлі на сеансы сем’ямі. Колькі сустрэч ладзілася, разнастайных мерапрыемстваў. У “Кастрычніку” пасля выхаду фільма “Вазьму твой боль” выступаў знакаміты рэжысёр, наш зямляк Міхаіл Пташук, які расказваў  пра здымкі, гаварыў пра вайну і мір…

Многія  падрабязнасці, звязаныя з гісторыяй і лёсам гарадскіх-раённых  аб’ектаў, можна даведацца з вуснаў людзей, якія ўдзельнічалі ў іх  стварэнні і станаўленні.

Ганаровай граматай Брэсцкага абласнога савета ветэранаў ўзнагароджана старшыня ветэ-ранскай  пярвічкі аграрнага каледжа Аляксандра Матчэня, граматай раённага савета ветэранаў –

старшыні Жарабковіцкай пярвічкі Ніна Праневіч, Валянціна Паўлоў-ская (РКЦ №35 Белаграпрамбанка), Валянціна Чаранкевіч (рай-аграсэрвіс), Таццяна Таранда (завод “Металапластмас”),  член прэзідыума раённага савета ветэранаў Генрых Траццяк.

У аглядзе-конкурсе на лепшую пярвічку  першае месца ў ветэранаў аддзела адукацыі, спорту і турызму райвыканкама (старшыня Кацярына Легеда), другое месца раздзялілі ветэраны ЛДАКа (Аляксандра Матчэня) і фізічнай культуры і спорту (Станіслаў Жагунь), трэцяе – Крывошынскага сельсавета (старшыня Людміла Лешык).

Шчымлівы  момант: кветкі ад дзяцей ганаровым  гасцям свята – ветэранам  Вялікай Айчыннай вайны і былым  вязням фашысцкіх канцлагераў.

Свае творчыя віншаванні дарылі юбілярам самадзейныя артысты, выхаванцы цэнтра дадатковай адукацыі дзяцей і моладзі. Атмасфера ў зале была цёплай і ўтульнай, нібы сабралася вялікая сям’я на дзень нараджэння  блізкага і дарагога чалавека.