Сесія паставіла адзнаку

Атрымала працяг практыка выязных пасяджэнняў. У чэрвені мінулага года дэпутаты разглядалі пытанне аб рабоце Ляхавіцкага дзяржаўнага аграрнага каледжа па грамадзянска-патрыятычным выхаванні навучэнцаў і азнаёміліся са створанымі ў ЛДАКу ўмовамі  для навучання і выхавання.

Час паказаў, што інфарматыўнай і выніковай формай работы з насельніцтвам з’яўляюцца Дні Савета. Кіраўніцтва раёна, дэпутаты і кіраўнікі раённых службаў, прадпрыемстваў і арганізацый наведваюць практычна ўсе сацыяльна значныя аб’екты таго ці іншага сельсавета, сустракаюцца з мясцовымі жыхарамі, цікавяцца іх праблемамі. Летась такая прадстаўнічая ”інспекцыя” пабывала ў Жарабковіцкім сельсавеце. Сёлета аналагічнае мерапрыемства запланавана ў Конькаўскім і Навасёлкаўскім сельсаветах.

Яўгеній Юрлевіч  расказаў пра  сумесную работу органаў выканаўчай улады і дэпутацкага корпуса раёна па вырашэнні праблемных пытанняў, якія ўздымаюцца ў зваротах грамадзян. Сельскія сходы, штомесячныя дні інфармавання, прыёмы грамадзян па асабістых пытаннях дапамагаюць быць у курсе надзённых праблем. Вывучэнне грамадскай думкі дазваляе больш аператыўна і аб’ектыўна вырашаць многія пытанні.

Старшыня райсавета праводзіць асабісты прыём грамадзян кожную трэцюю сераду месяца, рэгулярна сустракаецца з  працоўнымі калектывамі, выступае на сельскіх сходах, святах вёскі. Летась да яго з пытаннямі, якія датычацца  прыватызацыі жылля, рамонту дарог, навядзення парадку,  гандлёвага, медыцынскага абслугоўвання, пенсійнага забеспячэння, працаўладкавання, аптымізацыі ўстаноў адукацыі, культуры, звярнуліся 53 выбаршчыкі.

– З уласнага вопыту магу сказаць, што людзі лягчэй расказваюць пра свае праблемы не ў кабінеце, а, напрыклад, пры сустрэчы на месцах. Таму не прапускаю магчымасці выехаць у вёску, працоўны калектыў і пагаварыць, пацікавіцца, ці задаволены яны   работай тутэйшых паштальёнаў, сацыяльных работнікаў,  медыкаў, аўталаўкі, наколькі ўважліва ставяцца да надзённых пытанняў у сельвыканкамах і як іх вырашаюць, – падзяліўся  Яўгеній Юрлевіч.

У якасці станоўчага прыкладу старшыня  райсавета прыгадаў дэпутацкую дзейнасць Вячаслава Жукоўскага, Валерыя Равінскага, Уладзіміра Тадры, Мікалая Тарлюка, Юрыя Чаранкевіча і іншых.

Дзякуючы актыўнасці  народных абраннікаў рознага ўзроўню,  вырашаны многія пытанні добраўпарадкавання населеных пунктаў, ачысткі, падсыпкі дарог, зносу аварыйных дрэў, ліквідацыі стыхійных звалак.

Яўгеній Юрлевіч акцэнтаваў увагу на тым, што  сустрэчы дэпутатаў  з насельніцтвам не заўсёды праходзяць рэгулярна, недастаткова інфармацыі пра вынікі дэпутацкай дзейнасці, указаў на аслаблены кантроль з іх боку за выкананнем праграмы сацыяльна-эканамічнага развіцця рэгіёна, не ў поўным аб’ёме рэалізуюцца магчымасці па стварэнні спрыяльных умоў для самазанятасці насельніцтва. У гэтых накірунках работу дэпутатаў неабходна актывізаваць. І без канкрэтнай і штодзённай дапамогі  старастаў  (іх у раёне цяпер 59 не абысціся. Яны, як ніхто іншы, ведаюць пра  надзённыя клопаты насельніцтва, дапамагаюць сельвыканкамам своечасова рэагаваць на тую ці іншую сітуацыю. Важна, каб узаемасувязь паміж старастамі і сельвыканкамамі была пастаяннай. Кіраўнік дэпутацкага корпуса падзякаваў за плённую працу  старастам Людміле Сідорскай,Таццяне Горбік,Таццяне Русакевіч, Валянціне Маслоўскай.

– Не трэба займаць пасіўную і сузіральную пазіцыю пры вырашэнні праблем грамадзян. У рабоце са зваротамі неабходны ўважлівасць, індывідуальны падыход. І ні ў якім разе нельга даваць пустыя абяцанні, – перакананы старшыня райсавета.

Па-ранейшаму на парадку дня – выяўленне пустуючых жылых дамоў і зямельных участкаў, знос безгаспадарных пабудоў і,канешне,  чысціня і парадак на тэрыторыі сельсаветаў. За 2016 год, на-прыклад, абследаваны 543 дамы, выяўлены 171 пустуючы, вядзецца пошук іх гаспадароў. Уладальнікі яшчэ 372 дамоў паведамілі пра намер  выкарыстоўваць будынкі, забяспечваць за імі і прылягаючымі тэрыторыямі належны догляд. Летась знесена 59 безгаспадарных пабудоў.  На гэтыя мэты з раённага бюджэту было выдаткавана 38246 рублёў. Найбольш актыўна спрацавалі ў Ганчароўскім і Крывошынскім сельсаветах,   дзе знесена адпаведна  17 і 18 дамоў.

На асаблівым кантролі, у тым ліку і райсавета, – сацыяльная падтрымка ветэранаў, пенсіянераў, інвалідаў, адзінокіх грамадзян.  На парадку дня і пытанне занятасці насельніцтва. Летась у сельскай мясцовасці створана 109 працоўных месцаў, з якіх 27 – у прыватных структурах.  Лепшыя паказчыкі – у Жарабковіцкім (51 месца), Крывошынскім (25) сельсаветах. Для параўнання: у Ганчароўскім  створаны 3 новыя працоўныя месцы, Начаўскім – 1.

Райсавет трымае на кантролі пытанні прафілактыкі правапарушэнняў і злачынстваў. У гэтай справе важнае  цеснае ўзаемадзеянне ўсіх зацікаўленых службаў – сельвыканкамаў, навучальных устаноў, участковых інспектараў міліцыі. Асаблівую заклапочанасць выклікае  сітуацыя з п’янствам і алкагалізмам. Летась  кожнае трэцяе зарэгістраванае ў раёне злачынства ўчынена  нецвярозымі грамадзянамі, павялічылася колькасць тых, хто стаіць на ўліку ў нарколага. 1117 жыхароў раёна прыцягнуты да адміністрацыйнай адказнасці за распіццё спіртных напіткаў ці знаходжанне ў грамадскіх месцах у нецвярозым стане. Супрацоўнікі РАУС спынілі 114 фактаў незаконнай рэалізацыі алкагольнай прадукцыі,  адабралі і знішчылі больш як 2000  літраў самагону і брагі, 18 самагонных апаратаў.  На прымусовае лячэнне ад алкагалізму  адпраўлены 195 чалавек, у лячэбна-працоўныя прафілакторыі асуджаны 28 хранічных алкаголікаў.

П’юць дарослыя – пакутуюць дзеці. У мінулым годзе 108 непаўналетніх з 51 сям’і прызнаны ў сацыяльна-небяспечным становішчы. Узмацняць барацьбу з негатыўнымі з’явамі, выкарыстоўваць для гэтага ўсе магчымыя меры – задача і для дэпутатаў.

Справаздачу аб сваёй дзейнасці ў акругах трымалі дэпутаты  Валерый Равінскі, Анатолій Жабік, Юрый Чаранкевіч, Ірына Страмавус.

На сесіі абмяркоўваліся і іншыя пытанні, у прыватнасці, прааналізавана работа Ляхавіцкага райпо па арганізацыі гандлёвага абслугоўвання насельніцтва, агучаны перспектывы развіцця раённага спажывецкага таварыства.  Заслухана паведамленне начальніка ўпраўлення па працы, занятасці і сацыяльнай абароне  райвыканкама Леаніда Калбасы аб рабоце па выкананні  Дэкрэта № 3,  аб стане спраў на рынку працы, кірмашах вакансій.

Па ўсіх разгледжаных пытаннях прыняты  адпаведныя рашэнні.