Напарнік Пальма
У міліцыянера-кінолага аддзялення па ахове аб’ектаў у г. Ляхавічы Баранавіцкага аддзела дэпартамента аховы МУС Беларусі Дзмітрыя Машэя надзейны чатырохногі напарнік, дакладней, напарніца – службовая аўчарка Пальма. На яе рахунку дзясятак раскрытых злачынстваў і шматлікія падзякі. Бярэ след, шукае, ахоўвае – такая дапамога часам неацэнная. Бездакорна выконвае каманды свайго гаспадара і разумее яго нават без словаў. Кінолаг свайму гадаванцу ўдзяляе максімум увагі. Трэніроўкі, прагулкі, павышэнне прафесійнага майстэрства – разам. Ежу чатырохногі ахоўнік бярэ толькі з рук Дзмітрыя. А калі той адчыняе багажнік аўтамабіля, Пальма ведае – час адпраўляцца на службу. Вельмі разумная, добрая, ласкавая, не церпіць злых людзей, гаворыць пра вернага памочніка прапаршчык Машэй.
Наталля ПЕРАПЕЧКА.
Фота Сяргея ВАРАНОВІЧА.