Творчая думка ў дапамогу

Такую інтрыгуючую   назву атрымаў праект,  ініцыяваны Брэсцкім абласным аграпрамысловым  саюзам і фермерскай гаспадаркай “ЛагуЦін”.  Асноўная яго  ідэя ў тым, што жыхары  сельскай мясцовасці, у прыватнасці Куршынавічаў і навакольных вёсак, дзе няма вялікіх сельскагаспадарчых прадпрыемстваў, змогуць развіваць прыватнае прадпрымальніцтва ў выглядзе міні-фермаў.  У бліжэйшых планах “ЛагуЦіна” – набыццё за сродкі ЕС-ПРААН статка племянных малочных  кароў у СВК “Ляхавіцкі”.

А далей – яшчэ больш цікава і  надзвычай прывабна для тых гаспадароў, хто  жадае завесці ўласны статак ці пашырыць наяўны. Цёлачак  ад племянных рагуль будуць перадаваць  на свяце вёскі Куршынавічы бясплатна менавіта ў асабістыя падвор’і. А вось першае народжанае цяля неабходна  на тых жа ўмовах – бясплатна – перадаць у іншае падвор’е. Племянныя каровы, якія потым папоўняць групу асноўнага статка,  стануць “ЛагуЦінскай”  уласнасцю. Выручка ад рэалізацыі малака пойдзе на зарплату жывёлаводам, а таксама на ўтрыманне племяннога статка.  Пры захаванні тэхналогій  ад кожнай каровы за час лактацыі рэальна атрымаць 8000 літраў малака: частку гаспадар зможа пакінуць для асабістых патрэб, частку (каля 5000 літраў)  прадаць малочнаму заводу.

– На Брэстчыне ўсяго 6 фермерскіх гаспадарак, якія займаюцца малочнай жывёлагадоўляй, таму, бясспрэчна, зацікавіліся ініцыятывай кіраўніцтва Ляхавіцкага райвыканкама, якое прапанавала “ЛагуЦіну” паўдзельнічаць у фінансаванні праекта па  развіцці племянной малочнай гаспадаркі. Канешне, былі здзіўлены, што два маладыя чалавекі не пабаяліся заняцца жывёлагадоўляй. Пазнаёміліся з іх планамі, убачылі перспектыву  праекта і вырашылі іх падтрымаць, – адзначыў выканаўчы  дырэктар Брэсцкага аграпрамысловага саюза  Мікалай Казак.

Дарэчы,  “Доўгая карова” прадугледжвае і стварэнне новых працоўных месцаў, у тым ліку і ў перспектыўным накірунку – самазанятасці,  што цяпер асабліва актуальна, тым больш у сельскай мясцовасці. Плануецца арганізацыя семінараў і майстар-класаў  для ўладальнікаў асабістых падсобных гаспадарак з удзелам выкладчыкаў Ляхавіцкага дзяржаўнага аграрнага каледжа. Дарэчы, гэта ўстанова таксама суаўтар фінансавання праекта.

На сённяшні дзень на тэрыторыі Ганчароўскага сельсавета ў асабістых падвор’ях утрымліваецца 54  рагулі. Пры рэалізацыі ініцыятывы “Доўгая карова” пагалоўе  сёлета павінна павялічыцца на 15 працэнтаў, а да 2020 года – як мінімум на 50 працэнтаў.  Далей гэты працэс выйдзе  за межы Куршынавіцкага і атрымае працяг  у іншых сельсаветах раёна.

Прыемная навіна: сёлета на гарадскім стадыёне “Колас” будзе ўладкавана воркаўт-пляцоўка. Аўтар сацыяльна-спартыўнай ініцыятывы “Даступны спорт для кожнага” – міжнароднае грамадскае аб’яднанне “ЭКАПРАЕКТ” ,  партнёр №1 – Ляхавіцкая дзіцяча-юнацкая спартыўная школа.

Старшыня цэнтральнай рады МГА  “ЭКАПРАЕКТ” Ірына Усава адзначыла, што ў  Ляхавічах ёсць уся  неабходная інфраструктура для стварэння такой  пляцоўкі, побач ДЮСШ з добрай базай. Але, бадай, галоўнае – адміністрацыя раёна зацікаўлена, каб насельніцтва – дзеці і дарослыя –  займалася фізкультурай. Таму і ініцыявана стварэнне такога спартыўнага міні-гарадка.  Плануецца, што ўжо гэтай восенню  кожны жадаючы бясплатна ў любы час  зможа наведваць  пляцоўку. Наш райцэнтр стане адным з першых сярод невялікіх гарадоў краіны, дзе ёсць такое месца. Па запрашэнні “ЭКАПРАЕКТА” на воркаўт-пляцоўку для прапаганды спорту і здаровага ладу жыцця  будуць прыязджаць і трэніравацца вядомыя беларускія спартсмены.

– Турнікі, брусы, шведская сценка, лаўкі і іншыя спартыўныя прылады  будуць усталяваны на гумавым пакрыцці – усё нетраўматычнае.  Таксама тут  размесціцца спецыяльны корпус для заняткаў  людзей з абмежаванымі фізічнымі магчымасцямі. Улічаны і экалагічны бок: вакол будзе  добраўпарадкавана  тэрыторыя, устаноўлены  кантэйнеры для паасобнага збору смецця, – гаворыць  эксперт па арганізацыі мясцовых мерапрыемстваў “ЭКАПРАЕКТА” Максім Рэут.

Яшчэ нядаўна  заказ талона да ўрача праз інтэрнэт для жыхароў раёна  быў немагчымы. Сёння пытанне вырашана.

– Павышэнне якасці і даступнасці аказання медыцынскай дапамогі насельніцтву – адна з  прыярытэтных задач  у тым ліку і для ляхавіцкіх медыкаў.  Каб  інфармацыйныя сувязі паміж усімі падраздзяленнямі ЦРБ былі не толькі надзейнымі, але і высокаскораснымі, неабходна стварэнне лакальнай камп’ютарнай сеткі. Гэта дазволіць  укараніць электронныя рэцэпты і медкарты, скараціць час афармлення меддакументацыі, аптымізаваць штат паліклінікі, забяспечыць аператыўны кантроль за паказчыкамі работы, – тлумачыць асноўныя аспекты  інавацыі праекта “Камп’ютарызацыя і інфарматызацыя аховы здароўя Ляхавіцкага раёна”  галоўны ўрач  райбальніцы  Георгій  Хлябовіч.

Ляхавіцкая ЦРБ у праекце  выступіла  як арганізацыя-заяўнік. Гэта мясцовая ініцыятыва накіравана ў тым ліку і на скарачэнне чэргаў на прыём, дазволіць урачу  аператыўна атрымліваць інфармацыю аб дыягнастычных даследаваннях пацыента, выніках яго лячэння ў стацыянары.  Нямала плюсаў  і для  пацыентаў – так званы сацыяльны эфект ад рэалізацыі праекта.  Праз інтэрнэт можна будзе ўдакладніць графік работы  медустаноў, асобных спецыялістаў, разлічыцца за платныя медпаслугі.  Наяўнасць лакальнай вылічальнай і камп’ютарнай сеткі дазволіць  аптымізаваць работу ўсіх службаў ЦРБ, што сэканоміць штогод суму эквівалентную за 5600 долараў.

Міжнародны дом мастацтваў у вёсцы Куршынавічы не першы год пад сваім дахам збірае мастакоў, музыкантаў, літаратараў, майстроў самых розных рамёстваў не толькі з Беларусі. Тут прахо-дзяць  міжнародная алімпіяда мастацтваў, фестывалі традыцыйнай культуры і рамёстваў,  сучаснага мастацтва,  творчыя форумы, а ў іх межах – разнастайныя майстар-класы.  Заснавальнік і дырэктар установы Валерый Ясевіч стаў ініцыятарам яшчэ аднаго праекта-пераможцы  “Падтрымка дзелавой ініцыятывы насельніцтва на аснове развіцця народнай творчасці і адраджэння рамёстваў”.

Прадугледжана арганізацыя майстэрняў, у якіх запрошаныя майстры будуць навучаць дзяцей і дарослых  сваім рамёствам, у тым ліку  звязаным з мясцовымі традыцыямі і звычаямі.

–Перадумовы для аднаўлення старадаўніх беларускіх рамёстваў у нас ёсць. Летась ў Ляхавіцкім раёне афіцыйна  гэтай справай займаліся 11 чалавек. Планую, што пры завяршэнні іх колькасць павялічыцца ўдвая і больш – а гэта яшчэ  дадатковыя рабочыя месцы. Сувеніры  будуць прадавацца ў тым ліку і турыстам.  Рэалізацыя праекта дазволіць  павысіць турыстычную прывабнасць Ляхавіцкага краю, у тым ліку і Куршынавічаў, – раскрывае мэту ініцыятывы  Валерый Ясевіч.

У вучэбных майстэрнях   адзінага ў рэспубліцы рэсурснага  цэнтра  развіцця  творчасці і мясцовых ініцыятыў будуць  створаны належныя ўмовы  для якаснага засваення практычных навыкаў,  аказвацца  метадычная і кансультатыўная дапамога па ткацтве, жывапісу,  маляванні на спілах дрэў, пляценні з газеты, сучасных тэхніках – дэкупажы, квілінгу, энкаўсціцы і інш.

Навучальныя праграмы прадугледжаны для школьнікаў і  дарослых, у тым ліку і інвалідаў – усяго плануецца ахапіць гэтай ініцыятывай каля 2500 чалавек.