Яблыні цвітуць
Дагледжаная прыгажосць – гэта пра яблыневы сад у двары гімназіі, які больш за дзесяцігоддзе майскімі днямі бела-ружовай квеценню радуе дзяцей і дарослых. Саджанцы для яго набыў ТАА “Трансэлектракамплект”, а пасадзілі іх гімназісты ў гонар 65-годдзя Вялікай Перамогі. Шэфства над садам – абавязак дзесяцікласнікаў. Кожны год у яблыняк – новыя сябры-садаводы. Няцяжка падлічыць, колькі старшакласнікаў за 12 гадоў клапацілася пра іх. Дрэўцы шчодра аддзячваюць пышным цвіценнем, добрым цяньком у спякоту і, канешне, шчодрым ураджаем, які перадаецца ў мясцовую сталоўку для прыгатавання абедаў гімназістам.
4 гады назад у маі па ініцыятыве колішняй настаўніцы геаграфіі Любові Каваленка квітнеючы сад упершыню на дзень ператварыўся ў паэтычную гасцёўню на свежым паветры. З таго часу з’явілася традыцыя праводзіць тут літаратурныя чытанні. Кожны год новая тэма і вялікая колькасць удзельнікаў.
– Рабяты з 5 па 11 класы рыхтуюцца да гэтага агульна-гімназічнага свята, падчас якога гучаць вершаваныя і празаічныя радкі, прыгожыя мелодыі, – гаворыць намеснік дырэктара гімназіі па выхаваўчай рабоце Аксана Гатоўчыц. Летась на літаратурныя чытанні быў запрошаны ветэран Вялікай Айчыннай вайны Фёдар Лойка, які і сам прачытаў верш. А сёлетняя літаратурна-музычная кампазіцыя будзе прысвечана тэме “Любоў да цудоўнага – вялікае мастацтва”.
Паціху прыжываюцца туі, клапатліва пасаджаныя землякамі – ветэранамі, кіраўніцтвам раёна, прадстаўнікамі працоўных калектываў падчас раённай акцыі “Пасадзі дрэва памяці” ў гонар 70-годдзя вызвалення Беларусі ад фашысцкіх захопнікаў.
“Сад мары” з яблыняк (саджанцы дабрачынна перададзены індывідуальным прадпрымальнікам Валерыем Радзюком) цягнецца да сонейка каля СШ № 2. Іх пасадзілі самыя актыўныя піянеры і бээрэсэмаўцы, члены педагагічнага атрада, настаўнікі. Вельмі хваляваліся, каб халады не пашкодзілі дрэўцы. На шчасце, абышлося – перазімавалі добра. Напачатку вясны юныя садаводы сад пабялілі, цяпер вось у чаканні яблыневага цвіцення.
Два гады назад у вёсцы Ураджайная ў гонар юбілею Вялікай Перамогі на месцы былога будынка СДК каля абеліска землякам, якія не вярнуліся з франтоў вайны, высадзілі 150 маладзенькіх соснаў, елак, бярозак, якія бязвыплатна перадаў лясгас. Актыўна ўдзельнічалі ў пасадцы парку члены БРСМ і вучні Навасёлкаўскай СШ, ветэраны вайны і працы, супрацоўнікі Навасёлкаўскага сельвыканкама. Сёлета на добраўпарадкаванні сквера будуць працаваць не толькі мясцовыя жыхары, а і навучэнцы Ляхавіцкага дзяржаўнага аграрнага каледжа.
Дрэва, алея, сад… Як сімвалічна, што яны рукамі землякоў садзяцца, пестуюцца, а сэрцамі землякоў прысвячаюцца Подзвігу і героям.
Галіна КАНЬКО.