Сябры, цудоўны наш саюз! Прафесійны
Сярод пераможцаў галіновага агульнарэспубліканскага агляду-конкурсу на лепшае правядзенне пярвічнымі прафсаюзнымі арганізацыямі грамадскага кантролю за выкананнем заканадаўства аб ахове працы ў 2016 годзе – і пярвічка СШ №1 г. Ляхавічы. На працягу двух гадоў да гэтага яна была сярод лепшых у абласным этапе конкурсу, які штогод праводзіць Беларускі прафесійны саюз работнікаў адукацыі і навукі.
У чым сакрэт поспеху пярвічкі, якая аб’ядноўвае ўсіх членаў калектыву?
– У згуртаванасці і саюзе аднадумцаў. Да таго ж, склаўся актыў, у якім гарманічна спалучаюцца ініцыятыва і вопыт. Кожны з сямі членаў прафкама адказвае за канкрэтны напрамак дзейнасці, але, калі неабходна, ніхто не дзеліць абавязкі, – падкрэслівае старшыня прафсаюзнай арганізацыі СШ №1 Таццяна Абражэвіч.
Кантроль за выкананнем заканадаўства аб працы і ахове працы – адзін з прыярытэтных напрамкаў дзейнасці прафсаюза.
– Перамога ў такім конкурсе – і гонар, і адначасова вялікая адказнасць, бо настаўнік клапоціцца не толькі пра ўласную бяспеку, але і пра бяспеку сваіх вучняў, – адзначае Таццяна Абражэвіч.
Грамадскія камісіі правяраюць выкананне тэхнікі бяспекі на ўроках фізічнай культуры і спорту, у час работы прышкольнага аздараўленчага лагера, захаванне санітарна-гігіенічных нормаў у харчаблоку, тэмпературнага рэжыму ў кабінетах, забяспечанасць медыцынскімі аптэчкамі і многае іншае.
Для школьных работнікаў быць членам прафесійнага саюза – гэта гарантыя сацыяльнай абароны і каля паўсотні дадатковых ільгот. Сярод іх, напрыклад, кампенсацыя паловы кошту пуцёўкі на санаторна-куротнае аздараўленне, навагоднія падарункі, аплата камандзіровачных для здачы экзаменаў на вышэйшую катэгорыю і г.д. Асаблівая ўвага прафсаюза – бацькам, якія маюць дваіх і больш непаўналетніх дзяцей. Раз у месяц ім прадастаўляецца свабодны ад работы дзень з захаваннем заработнай платы. Пры нараджэнні дзіцяці, згодна калектыўнага дагавора выплачваецца сума ў памеры 5 базавых велічынь. Напярэдадні новага навучальнага года малазабяспечаным сем’ям па заяве выдзяляецца матэрыяльная дапамога. Безумоўна, такі саўдзел арганізацыі ў жыцці сваіх членаў вельмі прыемны і важны.
Маладым спецыялістам адразу выплачваецца матэрыяльная дапамога на ўладкаванне, штомесяц ідзе 10-працэнтная даплата да стаўкі, прыемны бонус – 2 базавыя для кампенсацыі расходаў па аплаце жылля. Яны не застаюцца сам-насам у працоўным плаванні, за кожным замацоўваецца вопытны калега, які падкажа, падзеліцца напрацоўкамі і г.д.
Традыцыі пярвічкі прымнажаюцца. Сёння ў яе радах 113 чалавек, якія поплеч не толькі працуюць, але разам адзначаюць святы, ездзяць на экскурсіі, культурна адпачываюць.
Ні адзін дакумент, у якім закранаюцца інтарэсы працоўных, не прымаецца без удзелу прафсаюза. Дзякуючы ўзгодненым і зладжаным дзеянням прафкама і адміністрацыі СШ, паспяхова вырашаюцца пытанні абароны працоўных правоў і сацыяльна-эканамічных інтарэсаў. Дырэктар школы Наталля Кулак зацікаўлена падтрымлівае прафсаюзныя ініцыя-тывы і прапановы.
Плённае супрацоўніцтва толькі за апошнія 3 гады дало выдатны вынік: пярвічка СШ №1 атрымала 14 узнагарод рознай вартасці. “Больш справаў – менш словаў” – яе дэвіз.
Таццяна Абражэвіч на чале школьнай пярвічкі больш за дзесяцігоддзе і вельмі добра памятае свае першыя крокі ў арганізацыі. Расказвае, што пачынаць было надзвычай адказна. Гэта зараз ёсць інтэрнэт, можна пачытаць усё пра ўсё. Але яе падтрымалі, у яе паверылі калегі, калектыў. Увяла ў курс, узяла шэфства старшыня райкама прафсаюза работнікаў адукацыі і навукі Святлана Бялецкая.
Разам працуюць і цяпер. У прафсаюза спраў шмат.
Наталля ПЕРАПЕЧКА.
Фота Сяргея ВАРАНОВІЧА.