Нам давяраюць! У Мінску праходзіць XXI Міжнародная спецыялізаваная выстава «СМІ ў Беларусі» /фотарэпартаж/
З 3 па 6 мая ў Минску праходзіць XXI Міжнародная спецыялізаваная выстава «СМІ ў Беларусі». На плошчы больш чым за тысячу квадратаў размясцілася каля 100 экспанентаў, якія прадстаўляюць больш за 400 друкаваных СМІ, тэле- і радыёпраграм і каналаў з Беларусі , Азербайджана, Балгарыі, Германіі, Грузіі, Індыі, Латвіі, Літвы, Расіі і іншых. Спецыяльны госць выставы — сродкі масавай інфармацыі Кітая. Дэвіз выставы — «Нам давяраюць!».
Наведвальнікі выставы знаёмяцца з рэспубліканскімі і рэгіянальнымі друкаванымі і электроннымі СМІ, спецыялізаванымі і ведамаснымі выданнямі, газетамі вышэйшых навучальных, прамысловых прадпрыемстваў, навуковых арганізацыі. Для іх — прэзентацыі інфармацыйных і інтэрнэт-праектаў, аўтограф-сесіі, майстар -класы і многае іншае.
Прывітанне ўдзельнікам, гасцям і арганізатарам XXI Міжнароднай спецыялізаванай выстаўкі «СМІ ў Беларусі» накіраваў Прэзідэнт Рэспублікі Беларусь Аляксандр Лукашэнка. «Гэта маштабная падзея мае ў нашай краіне вялікі грамадскі рэзананс. Штогадовая дэманстрацыя магчымасцей нацыянальных сродкаў масавай інфармацыі пераканаўча сведчыць аб іх значным патэнцыяле», — гаворыцца ў прывітанні. — Упэўнены, што правядзенне дыскусій, круглых сталоў, майстар-класаў вядучых журналістаў паслужыць павышэнню прафесійнага майстэрства і далейшаму развіццю дзелавых і творчых кантактаў у сферы сродкаў масавай інфармацыі», — падкрэсліў беларускі лідар.
— Вы так шчыра запрашаеце, што не змог не зайсці да вас, — падзяліўся адзін з наведвальнікаў павільёна Брэсцкай вобласці. Перад экспазіцыйным стэндам Брэстчыны заўсёды шматлюдна. Тут і канцэрт самадзейных артыстаў, і тэматычныя прэзентацыі раённых выданняў, і выстава Брэсцкай бібліятэкі да 500-годдзя беларускага кнігадрукавання «Ад буквіцы да слова» і многае іншае. Але галоўнай фішкай стала рамесная майстэрня-анімацыя «Брэсцкі манетны двор» Ігара Міхальчука, дзе ўсе жадаючыя маглі паспрабаваць сябе ў ролі каваля і атрымаць на памяць самабытны цудоўны сувенір — манетку-барацінку.
У дзень урачыстага адкрыцця выставы прайшла канферэнцыя «СМІ ў змяняючымся свеце. Прафесіяналізм і адказнасць». Яе арганізатарамі выступіла Міністэрства інфармацыі Рэспублікі Беларусь пры ўдзеле грамадскага аб’яднання «Беларускі саюз журналістаў». Удзельнікі форуму гаварылі пра развіццё інфармацыйнай прасторы Беларусі, прафесійную этыку журналістаў, замежны вопыт дзейнасці сродкаў масавай інфармацыі і г.д.
4 мая Міністэрства ўнутраных спраў Рэспублікі Беларусь урачыста і вельмі святочна падвяло вынікі прэстыжнага творчага конкурсу на лепшае асвятленне ў сродках масавай інфармацыі органаў унутраных спраў і ўнутраных войскаў МУС і ўзнагародзіла пераможцаў. На разгляд камісіі было прадстаўлена 185 работ творчых калектываў і асобных аўтараў.
Рэдакцыя раённай газеты «Ляхавіцкі веснік» сярод пераможцаў конкурсу і ўзнагароджана дыпломам у намінацыі «Лепшая раённая газета» за актыўную работу па фарміраванні станоўчага іміджу міліцыі і актуальнасць матэрыялаў аб дзейнасці вартавых правапарадку. З Брэсцкай вобласці ў розных намінацыях конкурсу былі адзначаны старшы ўчастковы інспектар групы інфармавання і грамадскіх сувязей Баранавіцкага ГАУС старшы лейтэнант міліцыі Вольга Сакута і карэспандэнт аддзела навін тэлеканала «Варяг» (Пінск) Ірына Водчыц.