Шчасця многа не бывае. 15 мая – Дзень сям’і

Пакуль усе ”пры справе”, мама Света ўвіхаецца дома: прыбраць, памыць-папрасаваць адзенне, прыгатаваць што-небудзь смачнае для вялікай сям’і – ці мала клопатаў у мнагадзетнай мамы. Дарэчы, што датычыць прыгатаваць:  з  “мучнога” Марцінкевічы купляюць толькі хлеб, усё астатняе – смачныя пірагі, булачкі, пячэнне, пірожныя па-майстэрску пячэ гаспадыня. Любімы пачастунак сям’і – фірменныя маміны піражкі з разнастайнай начынкай.

У бясконцай чарадзе клопатаў, хоць і прыемных,  маладая жанчына знаходзіць час і для сябе. Вось ужо 2 гады кожную раніцу пры любым надвор’і  выходзіць на абавязковую прабежку. Упэўнена: здаровы лад жыцця і заняткі спортам дапамагаюць не толькі трымаць сябе ў тонусе, але і заставацца  бадзёрай, энергічнай.

Па прафесіі Святлана будаўнік, з будучым мужам Уладзімірам  пазнаёміліся падчас сумеснай вучобы.  Праўда, цяпер галава сям’і працуе  на Ляхавіцкім кансервавым заводзе.

– Адразу пасля работы спяшаюся дамоў,  трэба і жонцы дапамагчы, і з дзецьмі  хочацца пагуляць, – гаворыць шчаслівы бацька. У яго таксама ёсць  занятак для душы – рыбалка.

Свае захапленні і ў малых: Алеся і Жэня займаюцца танцамі, Алёшу падабаецца ўсё – маляваць, танцаваць, спяваць. Гарой стаяць адзін за аднаго: заступаюцца, клапоцяцца – так іх выхоўваюць бацькі. Дарэчы,  дома галоўны – Жэнька. Хлопчык сочыць за парадкам, нагадвае, каб сястрычка і брацік прыбіралі за сабой раскіданыя цацкі. Ён  для іх – аўтарытэт.

Вельмі многія пытанні, што даводзіцца вырашаць сям’і, здымаюцца пры дапамозе бацькоў Уладзіміра, а таксама  яго   бабулі, якія заўсёды гатовы падтрымаць.

Святлана і Уладзімір прызнаюцца: быць мнагадзетнымі не марылі. Але бязмежна рады такому шчасцю. І перакананы, што адкрылі для сябе сакрэт шчаслівага сямейнага жыцця, абавязковымі ўмовамі для якога лічаць каханне, узаемаразуменне, павагу, уменне знаходзіць кампраміс, старацца нават самую складаную сітуацыю не даводзіць да спрэчак.